Visit:
హైదరాబాద్, ఆగస్టు 26 (నమస్తే తెలంగాణ) : రాష్ట్రంలో ఎల్ నినో ప్రభావం పెరుగుతున్నది. రాష్ట్రంలో వర్షపాతం గణనీయంగా తగ్గే సూచనలు కనిపిస్తున్నాయని తెలంగాణ వెదర్మ్యాన్ బాలాజీ వెల్లడించారు. రానున్న 10 రోజుల్లో ఎండలు పెరుగనున్నాయని, ఉక్కపోత అధికమవుతుందని చెప్పారు. సెప్టెంబర్ మొదటి వారం వరకు ఈ పరిస్థితులు కొనసాగే అవకాశమున్నదని తెలిపారు. రాష్ట్ర సగటు వర్షపాత లోటు 20 శాతానికి పైగా, హైదరాబాద్లో మైనస్ 25 శాతానికి చేరే అవకాశమున్నదని బాలాజీ వెల్లడించారు.
నీటిని పొదుపుగా వాడుకోవాలని సూచించారు. బుధవారం ఆదిలాబాద్, కుమ్రం భీం ఆసిఫాబాద్, మంచిర్యాల, నిర్మల్, నిజామాబాద్, జగిత్యాల, రాజన్న సిరిసిల్ల, కరీంనగర్, పెద్దపల్లి, జయశంకర్ భూపాలపల్లి, ములుగు, భద్రాద్రి-కొత్తగూడెం, వరంగల్, హనుమకొండ, సిద్దిపేట, రంగారెడ్డి, హైదరాబాద్, మేడ్చల్-మల్కాజిగిరి, వికారాబాద్, సంగారెడ్డి, మెదక్, కామారెడ్డి, మహబూబ్నగర్, నాగర్కర్నూల్, వనపర్తి, నారాయణపేట, జోగుళాంబ గద్వాల జిల్లాల్లో అక్కడక్కడ తేలికపాటి వర్షాలు కురిసినట్టు అధికారులు తెలిపారు.
