Konda Surekha | నా బిడ్డ వ్యాఖ్యలకు నన్నెట్ల బలిపశువును చేస్తరు?.. కాంగ్రెస్‌పై కొండా సురేఖ ప్రశ్నల వర్షం

Konda Surekha | మంత్రివర్గం నుంచి బర్తరఫ్‌ అవ్వడానికి ముందు ఢిల్లీలో, బర్తరఫ్‌ అనంతరం హైదరాబాద్‌లో మీడియా సమావేశంలో కొండా సురేఖ రేవంత్‌ సర్కార్‌, కాంగ్రెస్‌ అధిష్ఠానంపైనా కీలక వ్యాఖ్యలు చేశారు. ఈ సందర్భంగా సురేఖ లేవనెత్తిన అంశాలు..

Konda Surekha | వరంగల్‌, సెప్టెంబర్‌ 3 (నమస్తే తెలంగాణ ప్రతినిధి)/ హైదరాబాద్‌: ‘ఒక్క మహిళను మంత్రివర్గం నుంచి బర్తరఫ్‌ చేస్తే ముగ్గురు మహిళలకు అవకాశం కల్పించాం అని రేవంత్‌రెడ్డి సర్కార్‌లోని ఆయన వర్గం సర్దిచెప్పుకోవచ్చు. కానీ, మంత్రివర్గం నుంచి బర్తరఫ్‌ చేసిన అనంతరం కొండా సురేఖ చేసిన వ్యాఖ్యలకు, ఆమె సంధించిన ప్రశ్నలకు సమాధానం చెప్పకుండా మా ప్రభుత్వం ఎంతోకాలం తప్పించుకోలేదు’ అని కాంగ్రెస్‌ పార్టీలో సీనియర్‌ నాయకులు ఒకరు వ్యాఖ్యానించారు.

మంత్రివర్గం నుంచి బర్తరఫ్‌ అవ్వడానికి ముందు ఢిల్లీలో, బర్తరఫ్‌ అనంతరం హైదరాబాద్‌లో మీడియా సమావేశంలో కొండా సురేఖ రేవంత్‌ సర్కార్‌, కాంగ్రెస్‌ అధిష్ఠానంపైనా కీలక వ్యాఖ్యలు చేశారు. ముగ్గురు మహిళలకు అవకాశం కల్పించడాన్ని కొండా సురేఖ స్వాగతించారు. ‘నా ఒక్కదాన్ని తప్పించి బదనాం కాకుండా ఉండేందుకు ముగ్గురు మహిళలకు అవకాశం కల్పించాం’ అని చెప్పుకోవటానికే ఇదంతా చేశారని పేర్కొన్నారు. తన బిడ్డ చేసిన వ్యాఖ్యలకు తల్లిగా తనను దండించటం ఏంది? అంటూ అనేక ప్రశ్నలు సంధించారు. తప్పులను ఎత్తిచూపారు. రేవంత్‌ నాయకత్వంలోని ప్రభుత్వం అనుసరిస్తున్న వైఖరిని ఎండగట్టారు. కాంగ్రెస్‌ పార్టీ కొందరి చేతుల్లో కీలుబొమ్మగా మారిందని ఆవేదన వ్యక్తంచేశారు. ఈ సందర్భంగా సురేఖ లేవనెత్తిన అంశాలు..

సురేఖ సూటి ప్రశ్నలు..

• నా కూతురు చేసిన వ్యాఖ్యలకు నాకు నోటీసులు ఇవ్వటం ఎంత వరకు కరెక్ట్‌?
• మహిళలు స్వతంత్రంగా ఉండాలి. స్వేచ్ఛగా వారి అభిప్రాయాలు వెల్లడించాలి అని రాహుల్‌గాంధీ పదే పదే చెప్తుంటారు. రాహుల్‌ చేసిన వ్యాఖ్యల స్ఫూర్తిగా నా కూతురు సుస్మితా పటేల్‌ తన అభిప్రాయాన్ని వెల్లడించింది. అందుకు నేనెట్ల బాధ్యత వహిస్తాను?
• నా బిడ్డ చేసిన వ్యాఖ్యలకు నన్ను ఎందుకు బలిపశువును చేశారు?
• పార్టీ నేతలందరి విషయంలోనూ ఇలాగే వ్యవహరిస్తున్నారా?
• బీసీని కాబట్టే మంత్రివర్గం నుంచి నన్ను గెంటేస్తున్నారా?
• నాపై చర్యలు తీసుకోవటం కోసం చిన్నారెడ్డిని బలిపెడుతారా?
• రెడ్డి తప్పుచేసినా..బీసీ తప్పుచేసినా ఒక్కటే అని నిరూపించదలచుకున్నారా?
• మంత్రివర్గం నుంచి ఒక్క మహిళను తీసేస్తే ముగ్గురికి అవకాశాలు కల్పించాం అని చెప్పుకోవటానికే గద్వాల విజయలక్ష్మి, నేరెళ్ల శారద, గుండు సుధారాణికి అవకాశం కల్పించారా?
• రేవంత్‌రెడ్డి రూ. 50 కోట్లు పెట్టి పీసీసీ పోస్టును కొనుక్కున్నాడు? అని ఆరోపణలు చేసినవారిని అధిష్ఠానం ఎందుకు ఉపేక్షించింది?
• జగ్గారెడ్డి టికెట్‌ అధిష్ఠానం చూసుకున్నప్పుడు.. మరి పరకాల టికెట్‌ను సీఎం ఎట్లా ప్రకటిస్తారు? ఇది ద్వంద్వ ప్రమాణం కాదా?
• పరకాలలో మమ్మల్ని రెచ్చగొట్టేందుకే రేవంత్‌రెడ్డి ప్రకటించారా?
• పదేండ్లు సీఎంగా నేనే ఉంటా అని ప్రకటించుకున్న వారిపై చర్యలేం తీసుకోరా?
• పార్టీని నమ్ముకున్నవారికో న్యాయం మాకో న్యాయమా?
• డిప్యూటీ సీఎం భట్టి విక్రమార భార్య కమీషన్లు తీసుకుంటున్నారు అని ఆరోపణలు వచ్చాయి. వాటిపై చర్యలేమైనా తీసుకున్నారా?
• రెవెన్యూ మంత్రి పొంగులేటి కుమారుడు భూ దందాలు చేస్తున్నారని, అక్రమ మైనింగ్‌కు పాల్పడుతున్నారని ఆరోపణలు వచ్చాయి. మరివాటిపై చర్యలెందుకు తీసుకోలేదు? వాటిపై సీఎం మౌనంగా ఎందుకున్నారు? ఆ మౌనం వెనుక ఆంతర్యం ఏంది? వాటిని అంగీకరించటమా? అయితే, వాళ్లమీద చర్యలెందుకు తీసుకోలేదు?