హైదరాబాద్ సిటీబ్యూరో, డిసెంబర్ 17 (నమస్తే తెలంగాణ): అధిక బరువు తగ్గించుకొనేందుకు, బరువు పెరుగకుండా ఉండేందుకు చాలామంది కేలరీలు తక్కువగా ఉండే ఆర్టిఫిషియల్ స్వీట్నర్లను వాడుతున్నారు. మెట్రో నగరాల్లో నివసించే ప్రజలు వీటిని ఎక్కువగా తీసుకొంటున్నారు. అయితే, ఆర్టిఫిషియల్ స్వీట్నర్లతో టైప్ 2 డయాబెటిస్ ముప్పు పొంచి ఉందని జాతీయ పోషకాహార సంస్థ (ఎన్ఐఎన్) అధ్యయనంలో తేలింది. అలాగే, వీటిని క్రమం తప్పకుండా వాడుతున్నవారిలో గుండె సంబంధ వ్యాధులతోపాటు, హైబీపీ, కొలెస్ట్రాల్, హర్మోన్ల అసమతుల్యతలాంటి సమస్యలు కనిపిస్తున్నట్టు పరిశోధకులు తేల్చారు.
బేకరీ, రెస్టారెంట్లలో తినే ఆహారంతోపాటు కూల్డ్రింక్స్ ద్వారా కూడా ఆర్టిఫిషియల్ స్వీట్నర్లు శరీరంలోకి చేరుతున్నాయని గుర్తించారు. శాకరీన్, సైక్లామేట్, అస్పార్టేమ్, ఎసిసల్ఫేమ్ కే, సుక్రలోజ్లాంటి ఆర్టిఫిషియల్ స్వీట్నర్లు ఆరోగ్యానికి చేటు చేస్తున్నాయని కనుగొన్నారు. 27 శాతం మంది శాకరీన్, 25 శాతం సుక్రలోజ్, 23 శాతం అస్పర్టేమ్తో చేసిన ఆహారపదార్థాలు, పానీయాలను తీసుకొంటున్నట్టు తేల్చారు. ఈ ఆర్టిఫిషియల్ స్వీట్నర్లను తీసుకునేవారిలో యువత ఎక్కువగా ఉన్నట్టు గుర్తించారు. వీటిని వెంటనే మానేయకుంటే తీవ్ర అనారోగ్య సమస్యలు తప్పవని పరిశోధకులు హెచ్చరించారు.