Visit:
నమస్తే తెలంగాణ నెట్‌వర్క్‌, నవంబర్‌ 29: తెలంగాణ ప్రత్యేక రాష్ట్రం ఏర్పాటు చేయాలంటూ కేసీఆర్‌ ఆమరణ నిరాహార దీక్ష చేపట్టిన నవంబర్‌ 29వ తేదీని దీక్షాదివస్‌గా పలు యూనివర్సిటీలో శనివారం ఘనంగా నిర్వహించారు. తెలంగాణ ఉద్యమ స్మృతులు, కేసీఆర్‌ దీక్ష గురించి నేటితరానికి చాటిచెప్పేలా ఓయూ ఆర్ట్స్‌ కళాశాల వేదికగా బీఆర్ఎస్వీ రాష్ట్ర అధ్యక్షుడు గెల్లు శ్రీనివాస్‌యాదవ్‌ ఆధ్వర్యంలో నిర్వహించిన కార్యక్రమానికి ముఖ్య అతిథిగా తెలంగాణ ఎస్సీ, ఎస్టీ కమిషన్‌ మాజీ చైర్మన్‌ ఎర్రోళ్ల శ్రీనివాస్‌ హాజరయ్యారు.రాజేంద్రనగర్‌ ప్రొ. జయశంకర్‌ తెలంగాణ వ్యవసాయ విశ్వవిద్యాలయంలో రంగారెడ్డి డీసీఎంఎస్‌ చైర్మన్‌, వర్సిటీ దీక్షాదివస్‌ ఇన్‌చార్జి మధుకర్‌రెడ్డి ఆధ్వర్యంలో విద్యార్థులు పెద్ద ఎత్తున పాల్గొన్నారు.
ఎంజీయూలోని దీక్షాదివస్‌లో మాట్లాడుతున్న మాజీ ఎమ్మెల్యే డా. గాదరి కిశోర్‌కుమార్‌
ప్రొ. జయశంకర్‌ సర్‌ విగ్రహం ముందు ఏర్పాటు చేసిన కార్యక్రమాన్ని పోలీసులు అడ్డుకోవడంతో కళాశాల ఆవరణలో పండ్లు , స్వీట్లు పంచుకుని సంబురాలు నిర్వహించారు. హనుమకొండ కాకతీయ యూనివర్సిటీ ఎస్డీఎల్సీఈ ప్రాంగణంలో విద్యార్థి ఉద్యమ నాయకుడు కేతిరెడ్డి వాసుదేవరెడ్డి దీక్షాదివస్‌ను నిర్వహించారు. మహబూబ్‌నగర్‌ జిల్లా కేంద్రంలోని పాలమూరు యూనివర్సిటీలో బీఆర్ఎస్వీ పీయూ అధ్యక్షుడు గడ్డం భరత్‌బాబు ఆధ్వర్యంలో అమరవీరులకు నివాళులర్పించారు. నల్లగొండలోని మహాత్మాగాంధీ యూనివర్సిటీలో బీఆర్ఎస్వీ ఆధ్వర్యంలో నిర్వహించిన కార్యక్రమానికి తుంగతుర్తి మాజీ ఎమ్మెల్యే గాదరి కిశోర్‌కుమార్‌ హాజరై కాంగ్రెస్‌ పార్టీ మోసాలను వివరించారు.
కరీంనగర్‌ జిల్లా కేంద్రంలోని శాతవాహన యూనివర్సిటీ ఆవరణలో నిర్వహించిన దీక్షాదీవస్‌లో కూర్చొన్న నాయకులు
కరీంనగర్‌ జిల్లా కేంద్రంలోని శాతవాహన యూనివర్సిటీలో గ్రంథాలయ సంస్థ మాజీ చైర్మన్‌ పొన్నం అనిల్‌ కుమార్‌గౌడ్‌ ఆధ్వర్యంలో దీక్షాదివస్‌ నిర్వహించగా, మాజీ మంత్రి కరీంనగర్‌ ఎమ్మెల్యే గంగుల కమలాకర్‌ హాజరై మాట్లారు. బీఆర్‌ఎస్‌ దీక్షా దీవస్‌ ఇన్‌చార్జి చిరుమల్ల రాకేశ్‌, మాజీ ఎమ్మెల్సీ నారదాసు లక్ష్మణ్‌రావు, బీఆర్‌ఎస్‌ నగర అధ్యక్షుడు చల్ల హరిశంకర్‌ కేసీఆర్‌ చిత్రపటానికి పాలాభిషేకం చేశారు. నిజామాబాద్‌ జిల్లా డిచ్‌పల్లి మండలంలోని తెలంగాణ యూనివర్సిటీలో బీఆర్‌ఎస్‌ సీనియర్‌ నాయకుడు రాజారాం ఆధ్వర్యంలో దీక్షాదివస్‌ నిర్వహించారు. పోలీసులు యూనివర్సిటీ గేటు ఎదుట ఏర్పాటు చేసిన టెంట్‌ కూల్చివేసి, మైక్‌ తొలగించడమే కాకుండా ఫ్లెక్సీలు చించివేశారు. యూనివర్సిటీ విద్యార్థులతో కలిసి వీసీ, రిజిస్ట్రార్‌ కార్యాలయంలో రాజారాంయాదవ్‌ బైఠాయించారు.
