వాట్సాప్‌లో ప్రశ్నల సాధన

విద్యార్థుల్లో ప్రశ్నల సాధనను అలవాటు చేసేందుకు పాఠశాల విద్యాశాఖ కీలక నిర్ణయం తీసుకున్నది. విద్యార్థుల ప్రగతిని ఆన్‌లైన్‌లో అంచనా వేసేందుకు గతేడాదే వాట్సాప్‌ చాట్‌బోట్‌ యాప్‌ను అందుబాటులోకి తెచ్చింది. ఈ విద్యాసంవత్సరం సైతం ఈ యాప్‌ను

ఈ ఏడాది కూడా వాట్సాప్‌ చాట్‌బోట్‌ యాప్‌ వినియోగించాలని
అధికారుల ఆదేశం ఇదే యాప్‌లో వర్క్‌షీట్ల నిర్వహణ

హైదరాబాద్‌, ఫిబ్రవరి 28 : విద్యార్థుల్లో ప్రశ్నల సాధనను అలవాటు చేసేందుకు పాఠశాల విద్యాశాఖ కీలక నిర్ణయం తీసుకున్నది. విద్యార్థుల ప్రగతిని ఆన్‌లైన్‌లో అంచనా వేసేందుకు గతేడాదే వాట్సాప్‌ చాట్‌బోట్‌ యాప్‌ను అందుబాటులోకి తెచ్చింది. ఈ విద్యాసంవత్సరం సైతం ఈ యాప్‌ను వినియోగించాలని అధికారులు ఆదేశాలు జారీచేశారు. కరోనాతో చదువులు అంతంత మాత్రంగా సాగుతున్నాయి. ఈ నేపథ్యంలో వాట్సాప్‌ ద్వారా విద్యార్థుల సామర్థ్యాలు, ప్రతిభను పరీక్షించేందుకు ఈ యాప్‌ దోహదపడుతున్నది. రాష్ట్ర విద్యాపరిశోధనా శిక్షణ మండలి (ఎస్సీఈఆర్టీ) 1- 10 తరగతులవారికి సబ్జెక్టువారీగా వర్క్‌షీట్లను రూపొందించింది. వాటిని ఉపయోగించి, ఈ యాప్‌ ఆధారంగా విద్యార్థుల సామర్థ్యాలను పరీక్షించనున్నారు. ఈ యాప్‌లో ప్రాక్టీస్‌ చేసిన విద్యార్థుల వివరాలను ISMS పోర్టల్‌తో అనుసంధానిస్తారు. విద్యార్థులవారీగా, తరగతులవారీగా ప్రతిభను ఈ యాప్‌ ద్వారా అంచనావేయవచ్చని అధికారులు తెలిపారు. ఏవైనా సమస్యలు తలెత్తితే 011 -40747485 నంబర్‌ను సంప్రదించాలని సూచించారు.

ప్రక్రియ ఇలా..

• విద్యార్థి 85955 24405 నంబర్‌కు వాట్సాప్‌తో ‘హాయ్‌, హల్లో, నమస్తే’ అని టైప్‌చేసి విద్యార్థి పేరు, తరగతి, మీడియం తదితరాలను నమోదుచేసుకోవాలి.
• తరగతులవారీగా ప్రతీవారం రెండు సబ్జెక్టులకు సంబంధించిన 8-10 ప్రశ్నలు వాట్సాప్‌లో ప్రత్యక్షమవుతాయి.
• విద్యార్థి వీటికి సమాధానాలివ్వగానే కొద్ది క్షణాల వ్యవధిలోనే తప్పుగా చేశారో, కరెక్ట్‌గా చేశారో తేల్చి ఫలితాన్ని సైతం ప్రకటిస్తుంది.
• తప్పుగా సమాధానాలిచ్చిన అంశాలకు సంబంధించిన పాఠ్యాంశాలు, వీడియోలు మరలా చదువుకోవడానికి వీలుగా వాట్సాప్‌తో ప్రత్యక్షమవుతాయి. వీటి ద్వారా విద్యార్థులు చేసిన లోపాలను సవరించినట్టవుతుంది.
• రోజువారీగా ఎంత మంది విద్యార్థులు వాట్సాప్‌ చాట్‌బోట్‌ను వినియోగించుకుంటున్నారు.. ఎంత మంది గణితం, భౌతికశాస్త్రం, సాంఘికశాస్త్రం సహా సబ్జెక్టుల్లో సామర్థ్యాలు ఎలా ఉన్నాయో తేలిపోతుంది.