కొత్త చట్టాలపై వినోద్‌ న్యాయపోరాటం

కేంద్రం అమల్లోకి తెచ్చిన మూడు కొత్త న్యాయ చట్టాలపై మాజీ ఎంపీ బోయినపల్లి వినోద్‌కుమార్‌ సుప్రీం కోర్టుకు వెళ్లారు. ఆయన దాఖలు చేసిన రిట్‌ పిటిషన్‌ను జస్టిస్‌ సూర్యకాంత్‌, జస్టిస్‌ ఉజ్జల్‌ భూయాన్‌తో కూడిన ధర్మాసనం పరిశీలించి టేబులార్‌ ఫార్మాట్‌లో తిరిగి సమర్పించాలని సూచించింది.

• సుప్రీంకోర్టులో మాజీ ఎంపీ పిటిషన్‌
• విచారణకు స్వీకరించిన ధర్మాసనం
• టేబులార్‌ ఫార్మాట్‌లో ఇవ్వాలని సూచన

హైదరాబాద్‌, సెప్టెంబర్‌ 18 (నమస్తే తెలంగాణ): కేంద్రం అమల్లోకి తెచ్చిన మూడు కొత్త న్యాయ చట్టాలపై మాజీ ఎంపీ బోయినపల్లి వినోద్‌కుమార్‌ సుప్రీం కోర్టుకు వెళ్లారు. ఆయన దాఖలు చేసిన రిట్‌ పిటిషన్‌ను జస్టిస్‌ సూర్యకాంత్‌, జస్టిస్‌ ఉజ్జల్‌ భూయాన్‌తో కూడిన ధర్మాసనం పరిశీలించి టేబులార్‌ ఫార్మాట్‌లో తిరిగి సమర్పించాలని సూచించింది. కొత్త నేర, న్యాయచట్టాల్లోని నిబంధనలు రాజ్యాంగ విరుద్ధంగా ఉన్నాయని పిటిషన్‌లో బోయినపల్లి పేర్కొన్నారు. రాజ్యాంగంలోని ఆర్టికల్‌ 14, 21 కింద నిందితులకు ఉన్న ప్రాథమిక హకులకు భంగం కలిగే అవకాశాలున్నాయని పేర్కొన్నారు. ఆర్టికల్‌ 348 ప్రకారం అధికార ఉత్తర, ప్రత్యుత్తరాలన్నీ ఇంగ్లిష్‌లో ఉండాలి. కానీ, కొత్తచట్టాల పేర్లను హిందీలో పెట్టారు. న్యాయ సంహిత, న్యాయ సురక్ష సంహిత, సాక్ష్య అధినియమ్‌ అర్థాలు ఆంగ్ల నిఘంటువుల్లో లేవని, క్షేత్రస్థాయిలో ఈ చట్టాలను అమలు చేయాల్సింది రాష్ట్ర ప్రభుత్వాలే కాబట్టి వారి సూచనలు స్వీకరించి చట్టాల్లో ఉన్న లోపాలను సరిదిద్దాలని కోరారు. భారతీయ నాగరిక్‌ సురక్ష సంహితలోని సెక్షన్లు 15, 43(3), 94, 96, 107, 185, 187, 349, 479, 118, 152, భారతీయ సాక్ష్య అధినియమ్‌లోని సెక్షన్‌ 23 రాజ్యాంగంలోని ఆర్టికల్‌ 14, 19, 21, 348కి విరుద్ధంగా ఉన్నందున వాటిని కొట్టేయాలని వినోద్‌కుమార్‌ కోరారు.

నోట్‌ దిస్‌పాయింట్‌

సుప్రీంకోర్టు ధర్మాసనానికి బోయినపల్లి సమర్పించిన పిటిషన్‌లోని అంశాల్లో కొన్ని…

• 160 మంది ప్రతిపక్షాల సభ్యులను సస్పెండ్‌ చేసి, పార్లమెంట్‌లో సమర్థవంతమైన చర్చ జరగకుండానే ఈ మూడు చట్టాలను ఆమోదించారని పేర్కొన్నారు.
• భారతీయ న్యాయ సంహిత (బీఎన్‌ఎస్‌) గ్యాంగ్‌, మొబైల్‌ ఆర్గనైజ్డ్‌ క్రైమ్‌ గ్రూప్స్‌ వంటి పదాలను నిర్వచించలేదు.
• మానసిక అస్వస్థత నిర్వచనంలో మెంటల్‌ రిటార్డేషన్‌ అంశాన్ని మినహాయించారు. మానసికంగా ఎదుగుదలలేని వ్యక్తులను ప్రాసిక్యూట్‌ చేయవచ్చునని పేర్కొనటం అభ్యంతరకరం.
• దేశ సార్వభౌమాధికారం, ఐక్యత, సమగ్రతలకు ముప్పు కలిగించే దేశద్రోహ చర్యల స్థానంలో కొత్త నేరాన్ని ప్రవేశపెట్టారు.
• భారతీయ సాక్ష్య అధినియం, 2023 ప్రకారం ఎలక్ట్రానిక్‌ రికార్డులు ప్రాథమిక సాక్ష్యాధారాలుగా పరిగణిస్తారు. పాత చట్టంలో వీటిని సెకండరీ సాక్ష్యాలుగా పేరొన్నారు.
• ఎఫ్‌ఐఆర్‌ నమోదుకు 15 రోజులు, పోలీస్‌ కస్టడీకి 14 రోజులకు బదులు 90రోజుల దాకా అవకాశమిచ్చారు. తద్వారా బాధితుడికి అన్యాయం జరుగుతుంది.
• బార్‌ కౌన్సిల్‌ ఆఫ్‌ ఇండియా, బార్‌ అసోసియేషన్ల అభిప్రాయం తీసుకోకుండా ఏకపక్షంగా చట్టాలను తీసుకురావటం వల్ల వీటిపై సమగ్ర చర్చ జరగలేదనే విషయాన్ని గుర్తించాలని న్యాయస్థానాన్ని అభ్యర్థించారు.
• పార్లమెంట్‌ స్టాండింగ్‌ కమిటీ కొత్త చట్టాలను పరిశీలించి అనేక సూచనలు చేసినా కేంద్ర ప్రభుత్వం వాటిని పట్టించుకోలేదన్న విషయాన్ని ఉటంకించారు.
• దేశవ్యాప్తంగా ఉన్న సీనియర్‌ న్యాయవాదులు, మేధావులు, సుప్రీంకోర్టు, హైకోర్టు మాజీ న్యాయమూర్తులు కొత్త చట్టాలను వ్యతిరేకిస్తున్న ఉదంతాలను ఆయన ఉదహరించారు.