Korean Flycatcher | రాష్ట్రంలో మరో కొత్తజాతి పక్షి.. మహబూబాబాద్‌ జిల్లాలో కొరియన్‌ ఫ్లైక్యాచర్‌

తెలంగాణ పక్షుల వైవిధ్యానికి నెలవుగా మారుతున్నది. ఇందుకు నిదర్శనంగా రాష్ట్రంలో మరో కొత్తజాతి పక్షి వెలుగుచూసింది. ప్రముఖ పక్షి పరిశీలకుడు హరిగోపాల్‌ శ్రీరంగం.. మహబూబాబాద్‌ జిల్లాలోని భీమునిపాదం జలపాతం వద్ద ఏప్రిల్‌ 23న పసుపువర్ణంతో కూడిన ఓ పక్షిని చూశాడు.

• భీమునిపాదం జలపాతం వద్ద కొరియన్‌ ఫ్లైక్యాచర్‌ గుర్తింపు

Korean Flycatcher | హైదరాబాద్‌, డిసెంబర్‌ 25 (నమస్తేతెలంగాణ) : తెలంగాణ పక్షుల వైవిధ్యానికి నెలవుగా మారుతున్నది. ఇందుకు నిదర్శనంగా రాష్ట్రంలో మరో కొత్తజాతి పక్షి వెలుగుచూసింది. ప్రముఖ పక్షి పరిశీలకుడు హరిగోపాల్‌ శ్రీరంగం.. మహబూబాబాద్‌ జిల్లాలోని భీమునిపాదం జలపాతం వద్ద ఏప్రిల్‌ 23న పసుపువర్ణంతో కూడిన ఓ పక్షిని చూశాడు. అది అరుదైన పక్షి కావడంతో దాని ఫొటోను ఈ-బర్డ్‌ డాటాబేస్‌లో అప్‌లోడ్‌ చేశాడు. గమనించిన నిపుణులు దానిని కొరియన్‌ ఫ్లైక్యాచర్‌గా గుర్తించారు.

దీంతో దానిని రాష్ట్రంలో 445వ పక్షిజాతిగా నమోదుచేశారు. ఈ సందర్భంగా హరిగోపాల్‌ మాట్లాడుతూ.. ఈ ఫ్లైక్యాచర్‌ తూర్పు ఆసియాకు చెందినదని, చలికాలంలో కఠినమైన వాతావరణాన్ని తట్టుకునేందుకు నవంబర్‌, డిసెంబర్‌ నెలల్లో దక్షిణాసియాకు వలసవస్తుందని తెలిపారు. ఇప్పటికే ఈ పక్షి కేరళ, కర్ణాటక, గోవా, తమిళనాడు, ఒడిశాలో కనిపించినా తెలంగాణలో మాత్రం ఎప్పుడూ కనిపించలేదన్నారు. ఈ పక్షి వేసవిలో కొరియా, మంగోలియా, జపాన్‌లో సంతానోత్పత్తి చేస్తుందని చెప్పారు. తెలంగాణ గడ్డపై కొరియన్‌ ఫె్లైక్యాచర్‌ను రికార్డ్‌ చేసిన మొదటి వ్యక్తిగా తాను క్లౌడ్‌నైన్‌లో గుర్తింపు పొందినట్టు తెలిపారు. ఈ ఏడాది నవంబర్‌లో అదే భీమునిపాదం జలపాతం వద్ద మరో వైల్డ్‌లైఫ్‌ ఫొటోగ్రాఫర్‌ శ్రీరామ్‌రెడ్డి 444వ పక్షిగా కనిపించిన సేలీథ్రస్ట్‌ను రికార్డ్‌ చేసిన సంగతి తెలిసిందే.