Telangana | ఎవర్ని అడిగి వరద సాయం ప్రకటించారు.. విరాళం ప్రకటనపై ప్రభుత్వ ఉద్యోగుల ఫైర్‌

వరద బాధితులను ఆదుకునేందుకు ఒక రోజు మూలవేతనాన్ని విరాళంగా ఇస్తామంటూ ప్రభుత్వ ఉద్యోగ సంఘాల జేఏసీలు పోటీపడి ప్రకటించడంపై ఉద్యోగులు తీవ్ర ఆగ్రహం వ్యక్తంచేస్తున్నారు. ఉద్యోగ సంఘాల తీరును ఉద్యోగులు సోషల్‌ మీడియా వేదికగా ఎండగట్టారు. బహిరంగంగా తమ అసంతృప్తిని వెళ్లగక్కారు.

Telangana | హైదరాబాద్‌, సెప్టెంబర్‌ 3 (నమస్తే తెలంగాణ): వరద బాధితులను ఆదుకునేందుకు ఒక రోజు మూలవేతనాన్ని విరాళంగా ఇస్తామంటూ ప్రభుత్వ ఉద్యోగ సంఘాల జేఏసీలు పోటీపడి ప్రకటించడంపై ఉద్యోగులు తీవ్ర ఆగ్రహం వ్యక్తంచేస్తున్నారు.

ఉద్యోగ సంఘాల తీరును ఉద్యోగులు సోషల్‌ మీడియా వేదికగా ఎండగట్టారు. బహిరంగంగా తమ అసంతృప్తిని వెళ్లగక్కారు. వరద బాధితులను ఆదుకునేందుకు ఉద్యోగ సంఘాలు జేఏసీలు పోటీపడి విరాళాలు ప్రకటించాయి. ఒక జేఏసీ రూ.130 కోట్లు, మరో జేఏసీ రూ.100 కోట్లు విరాళమిస్తామంటూ ముఖ్యమంత్రికి, సీఎస్‌కు అంగీకార పత్రాలను అందజేశాయి. దీనిని కొంత మంది ఉద్యోగులు, ఉపాధ్యాయులు తప్పుపడుతున్నారు. తమను సంప్రదించకుండా, అభిప్రాయం సేకరించకుండా ఇలా ఏకపక్షంగా ఎలా ప్రకటన చేస్తారని సోషల్‌మీడియాలో ఫైర్‌ అయ్యారు. డీఏ బకాయిలు విడుదల చేయించలేదు. సరెండర్‌లీవుల బిల్లులు ఇప్పించలేదు. పీఆర్సీ గురించి అడగరు.. కానీ ఎవరు అడిగారని ఒకరోజు వేతనం ఇస్తామని ఒప్పుకున్నారని మండిపడ్డారు. రెండు నెలల క్రితం బదిలీ అయిన ఉద్యోగులకు సగం నెల వేతనం ఇంకా ఇవ్వనేలేదని పేర్కొన్నారు. ఎవరి మెప్పు కోసం మమ్మల్ని బలిపశువులను చేస్తున్నారంటూ తిరుగుబాటు చేశారు. కొందరు ఉద్యోగ సంఘాల నేతలకు ఫోన్లు చేసి నీలదీసినంత పనిచేశారు. సహాయమనేది వ్యక్తిగతమని. ఎంత ఇవ్వాలని చెప్పడానికి ఎవరికీ హక్కులేదని స్పష్టం చేశారు. ‘విరాళం ప్రకటించడానికి ముందు ప్రాథమికంగా సభ్యుల అభిప్రాయం తీసుకోవాలి. అంతా నాయకులు ఇష్టమేనా.. ఎదుటి వాళ్ల జీతం మీద మీకు ఏం హక్కు ఉంది?’ అంటూ ఓ ఉద్యోగి సోషల్‌మీడియాలో తన అసంతృప్తిని వెల్లగక్కారు.

సోషల్‌ మీడియాలో ఉద్యోగుల అసంతృప్తి..

• ప్రస్తుతం ఉద్యోగ సంఘాలు పోటీపడుతున్నాయి. జేఏసీలుగా ఏర్పడ్డాయి. ఎందుకో తెలుసా. ప్రభుత్వం దృష్టిలో పడటానికి. ఉద్యోగుల ప్రయోజనాల కోసం పోరాటాలు చేయాల్సిన సంఘాలు.. ఒకరిని మించి మరొకరు తామంటే తామే విధేయులమని చాటుకోవడానికి తాపత్రయపడుతున్నాయి.
• మేం విరాళం ఇవ్వం గాక ఇవ్వం. మేం లెటర్‌ స్వచ్ఛందంగా ఇస్తే ఒక రోజు వేతనం కట్‌చేయండి. లేకపోతే మా అభిప్రాయం లేకుండా వేతనం కట్‌చేస్తే ప్రజాస్వామ్యమనిపించుకోదు.
• ఏ సంఘ నాయకులు సంతకాలు చేశారో.. ప్రభుత్వాన్ని కలిశారో వాళ్ల ఒక్కరోజు జీతాన్ని కట్‌చేయాలి. సంఘాల్లో లేని వాళ్లవి ఎలా కట్‌ చేస్తారు. అలా చేస్తే ధర్నాలు, రాస్తారోకోలు, నల్లబ్యాడ్జీలతో నిరసనలు తెలుపుతాం.
• కత్తికి లేని దురద పీటకు ఎందుకో.. ముందు రాజకీయ నాయకులు, మంత్రులు, ఎమ్మెల్యేలు, నామినేటెడ్‌ పోస్టుల్లోని వారు, సెలబ్రిటీలు విరాళాలు ఇస్తున్నట్టు ప్రకటన చేయాలి. ప్రజా ప్రతినిధులకు లేని ఔదార్యం ఉద్యోగులకెందుకు?
• వరద బాధితులకు ఒక రోజు మూలవేతనం సరే.. అలాగే పెండింగ్‌లోని నాలుగు డీఏలు ఇప్పిస్తున్నామని ఒక స్టేట్‌మెంట్‌ కూడా ఇప్పించండి. కనీసం రెండు డీఏలైనా ఇప్పించండి. పెండింగ్‌ బిల్లులు మంజూరు చేయించండి.