Number Plate | ఆన్‌లైన్‌లో ఈజీగా.. హై సెక్యూరిటీ ప్లేట్‌ ఇలా తీసుకోండి

రాష్ట్రంలో ఉన్న కొత్త, పాత వాహనాలకు హై సెక్యూరిటీ రిజిస్ట్రేషన్‌ ప్లేట్‌(హెచ్‌ఎస్‌ఆర్పీ) ఉండాలనే నిబంధనతో కొందరు వాహనాదారుల్లో గుబులు మొదలైంది. ఇప్పటివరకు 2019 ఏప్రిల్‌ 1 తర్వాత తయారైన వాహనాలకు మాత్రమే ఈ నిబంధన అమలులో ఉండగా, ఇక నుంచి అంతకు ముందు తయారైన వాహనాలకూ ఏర్పాటుచేసుకోవాలని ఆదేశిస్తూ రవాణాశాఖ ఉత్తర్వులు జారీ చేసిన సంగతి తెలిసిందే. ఇందుకు ఈ ఏడాది సెప్టెంబర్‌ 30 వరకు గడువు సైతం ఇచ్చింది.

• ఆన్‌లైన్‌లో ఈజీగా బుక్‌ చేసుకోవచ్చు
• ఇక నుంచి 2019 ఏప్రిల్‌ 1కి ముందు తయారైన వాహనాలకూ తప్పనిసరి
• ఈ ఏడాది సెప్టెంబర్‌ 30 వరకు గడువు
• హెచ్‌ఎస్‌ఆర్పీ లేకుండా రోడ్లపైకి వస్తే చర్యలే: రవాణాశాఖ

Number Plate | హైదరాబాద్‌, ఏప్రిల్‌ 10 (నమస్తే తెలంగాణ) : రాష్ట్రంలో ఉన్న కొత్త, పాత వాహనాలకు హై సెక్యూరిటీ రిజిస్ట్రేషన్‌ ప్లేట్‌(హెచ్‌ఎస్‌ఆర్పీ) ఉండాలనే నిబంధనతో కొందరు వాహనాదారుల్లో గుబులు మొదలైంది. ఇప్పటివరకు 2019 ఏప్రిల్‌ 1 తర్వాత తయారైన వాహనాలకు మాత్రమే ఈ నిబంధన అమలులో ఉండగా, ఇక నుంచి అంతకు ముందు తయారైన వాహనాలకూ ఏర్పాటుచేసుకోవాలని ఆదేశిస్తూ రవాణాశాఖ ఉత్తర్వులు జారీ చేసిన సంగతి తెలిసిందే. ఇందుకు ఈ ఏడాది సెప్టెంబర్‌ 30 వరకు గడువు సైతం ఇచ్చింది.

ఫిట్‌నెస్‌ టెస్టు సహా.. వాహనాలకు సంబంధించి రవాణాశాఖ ద్వారా ఏ సేవ పొందాలన్నా ఈ నంబర్‌ ప్లేట్‌ ఉంటేనే సాధ్యమని, ఆ నంబర్‌ ప్లేటు లేని వాహనాలకు రవాణాశాఖలో ఎలాంటి సేవలు అందబోవని, ఇన్సూరెన్స్‌ చేయడం కూడా కుదరదని తేల్చి చెప్పింది. ఇక ఆ ప్లేట్‌ లేకుండా వాహనాలు రోడ్డు ఎక్కితే జరిమానాతోపాటు బండ్లను సీజ్‌ చేస్తామని ప్రకటించిన నేపథ్యంలో హెచ్‌ఎస్‌ఆర్పీ ఎలా తీసుకోవాలో తెలియక కొందరు వాహనదారులు ఆందోళన చెందుతున్నారు. అయితే, వాహనదారులు www.siam.in వెబ్‌సైట్‌లో ఈ హెచ్‌ఆర్పీని సులువుగా పొందవచ్చు. మీరు ఎంచుకున్న తేదీలో మీకు నచ్చిన డీలర్‌ దగ్గర సెప్టెంబర్‌ 30లోపు ఫిట్టింగ్‌ చేయించుకోవచ్చు.

హెచ్‌ఎస్‌ఆర్పీ కోసం ఇలా చేయాలి..

• హై సెక్యూరిటీ రిజిస్ట్రేషన్‌ ప్లేట్‌ (హెచ్‌ఎస్‌ఆర్పీ) కావాలనుకున్న వాళ్లు ముందుగా https://www.siam.in వెబ్‌సైట్‌లోకి వెళ్లాలి.
• పైన కనిపించే ‘బుక్‌ హెచ్‌ఎస్‌ఆర్పీ’పైన క్లిక్‌ చేయాలి.
• ఆ తర్వాత ప్రత్యేకంగా విండో ఓపెన్‌ అవుతుంది.
• అందులో ఫుల్‌నేమ్‌, వాహన నంబర్‌, ఈ మెయిల్‌, మొబైల్‌ నంబర్‌, రాష్ట్రం, జిల్లా వంటివి ఎంటర్‌ చేసి నిబంధనలపై క్లిక్‌ చేసి సబ్మిట్‌ చేయాలి.
• ఆ తర్వాత మీ వాహనం టైప్‌(టూ వీలర్‌, త్రీ వీలర్‌, ఫోర్‌ వీలర్‌, బస్‌, ట్రక్‌, కమర్షియల్‌ వాహనం) సెలెక్ట్‌ చేసుకోవాలి.
• ఆ తర్వాత కింద కనిపించే మీ వాహన కంపెనీని సెలెక్ట్‌ చేసుకోవాలి.
• ఇక్కడ ప్రత్యేకంగా మరో విండో ఓపెన్‌ అవుతుంది. అందులో మీకు కావల్సిన ‘హై సెక్యూరిటీ రిజిస్ట్రేషన్‌ ప్లేట్‌ విత్‌ కలర్‌ స్టిక్కర్‌’ అనే ఆప్షన్‌పై క్లిక్‌ చేయాలి.
• ఇందులో స్టెప్‌-1 బుకింగ్‌ డిటెయిల్స్‌, స్టెప్‌-2 ఫిట్‌మెంట్‌ లొకేషన్‌, స్టెప్‌-3 అపాయింట్‌మెంట్‌ స్లాట్‌, స్టెప్‌-4 బుకింగ్‌ సమ్మరీ, స్టెప్‌-5 వెరిఫై డిటెయిల్స్‌ అండ్‌ పే, స్టెప్‌-6 డౌన్‌లోడ్‌ రిసిప్ట్‌ వరకు అన్నింటినీ క్షుణ్ణంగా పూర్తిచేయాలి.
• స్టెప్‌-1లో వాహన నంబర్‌, ఫ్రేమ్‌/చాసిస్‌ నంబర్‌లోని చివరి ఐదు నంబర్లు, ఇంజిన్‌ నంబర్‌లోని చివరి ఐదు నంబర్లు ఎంటర్‌ చేసి క్యాప్చా నంబర్‌ ఎంటర్‌ చేయాలి.
• ఆ తర్వాత మీకు అందుబాటులో ఉన్న డేట్‌, టైమ్‌ను ఎంపిక చేసుకోవాలి.
• ఆ తర్వాత మీకు అందుబాటులో ఉన్న ఫిట్‌మెంట్‌ లొకేషన్‌లో సర్వీస్‌ సెంటర్‌ను ఎంచుకోవాలి. అక్కడే మీకు వాహన ప్లేట్‌కు ఖర్చు ఎంత అవుతుందో కనిపిస్తుంది.
• దానిని ఎంచుకుంటే బుకింగ్‌ సమ్మరీ కనిపిస్తుంది. దానిని వెరిఫై చేసుకొని పేమెంట్‌కు వెళ్లొచ్చు. అక్కడ క్రెడిట్‌, డెబిట్‌, యూపీఐ, నెట్‌ బ్యాకింగ్‌ ఆప్షన్లలో ఏదైనా ఎంచుకోవచ్చు.
• డబ్బులు చెల్లించిన తర్వాత వివరాలు చెక్‌ చేసుకొని అప్లికేషన్‌ ప్రింట్‌ తీసుకోవచ్చు. సంబంధిత సర్వీస్‌ సెంటర్‌ వివరాలు, ఫోన్‌ నంబర్‌ ఉంటాయి.
• అపాయింట్‌మెంట్‌ రోజు ఆర్సీ కాపీని వెంట తీసుకెళ్లాలి.
• ఆ స్లిప్‌ వ్యాలిడిటీ 28 రోజుల వరకు మాత్రమే ఉంటుంది.
• ఫిట్‌మెంట్‌కు ఎక్స్‌ట్రా నగదు చెల్లించాల్సిన అవసరం లేదు.
• ఏవైనా అభ్యంతరాలుంటే 8929722201 నంబర్‌, మెయిల్‌ online@bookmyhsrp.comలో సంప్రదించవచ్చు.