93.1% మందిలో యాంటిబాడీలు

• 18 నుంచి 60 ఏండ్ల వారిలోనే ఎక్కవ
• నెంబర్‌1 స్థానంలో హైదరాబాద్‌ జిల్లా
• ఐసీఎంఆర్‌-ఎన్‌ఐఎన్‌ సర్వేలో వెల్లడి

హైదరాబాద్‌, ఏప్రిల్‌ 21 (నమస్తే తెలంగాణ): రాష్ట్రంలో 93.1 శాతం మందిలో కరోనా వైరస్‌కు యాంటిబాడీలు వృద్ధి చెందినట్టు సెరో సర్వేలో తేలింది. తెలంగాణలో వైరస్‌ వ్యాప్తి తీరును తెలుసుకొనేందుకు రాష్ట్ర ప్రభుత్వం, భారత వైద్య పరిశోధనా మండలి(ఐసీఎంఆర్‌), జాతీయ పోషకాహార సంస్థ(ఎన్‌ఐఎన్‌) సంయుక్తంగా జనవరి-ఫిబ్రవరి నెలల్లో సర్వే నిర్వహించాయి. రాష్ట్రంలోని 330 గ్రామాల్లో 18 వేల మంది నుంచి రక్తనమూనాలు సేకరించి, కొవిడ్‌ నిరోధక ప్రతిరక్షకాలను పరీక్షించింది. ఆ వివరాలను రాష్ట్ర వైద్యారోగ్యశాఖ గురువారం విడుదల చేసింది.

సర్వేలోని ముఖ్యాంశాలు

• రాష్ట్రవ్యాప్తంగా రక్త నమూనాలు ఇచ్చిన 93.1% మందిలో ప్రతిరక్షకాలు ఉన్నాయి.
• సాధారణ ప్రజల్లో 92.9%, హెల్త్‌కేర్‌ వర్కర్స్‌లో 93.1% మందిలో యాంటిబాడీలు ఉన్నాయి.
• ఇప్పటికే కొవిడ్‌ బారిన పడిన వారిలో 99%, ఒక్కసారి కూడా పాజిటివ్‌ రాని వారిలో 93% యాంటిబాడీలు వృద్ధి చెందాయి.
• తొలిడోసు వ్యాక్సిన్‌ వేసుకున్న వారిలో 91.4%, రెండో డోసు పూర్తి చేసుకున్న వారిలో 96% మందిలో ప్రతిరక్షకాలు ఉన్నాయి.
• శాకాహారం మాత్రమే తినేవారిలో 77% మందిలో యాంటిబాడీలు ఉన్నాయి.