స్టార్టప్‌ ఎకోసిస్టం @ 11,500 కోట్లు

• కరోనా కాలంలోనూ ఆగని దూకుడు
• జాతీయ సగటు కన్నా రెండురెట్లు వృద్ధి
• గ్లోబల్‌ స్టార్టప్‌ ఎకోసిస్టం రిపోర్ట్‌లో వెల్లడి

హైదరాబాద్‌, సెప్టెంబర్‌ 23 (నమస్తే తెలంగాణ): తెలంగాణలో స్టార్టప్‌ల పురోగతి అత్యంత వేగంగా సాగుతున్నది. రాష్ట్ర ప్రభుత్వం కల్పిస్తున్న ప్రోత్సాహంతో స్టార్టప్‌ ఎకోసిస్టం (అనుకూల వాతావరణం) విలువ రూ.11,500 కోట్లకు చేరింది. స్టార్టప్‌ల వృద్ది జాతీయ సగటుతో పోలిస్తే రెండురెట్లు అధికంగా నమోదైంది. కరోనా విపత్కర కాలంలోనూ 18శాతం వృద్ధిని సాధించింది. ఈ విషయాలను గ్లోబల్‌ స్టార్టప్‌ ఎకోసిస్టమ్‌ రిపోర్ట్‌ (జీఎస్‌ఈఆర్‌)-2021 వెల్లడించింది. స్టార్టప్‌లను ప్రోత్సహించేందుకు రాష్ట్ర ప్రభుత్వం ఇస్తున్న సాయాన్ని రిపోర్ట్‌ ప్రత్యేకంగా ప్రస్తావించింది. టీహబ్‌ ఏర్పాటు, స్టార్టప్‌లు కల్పించే ప్రతి ఉద్యోగానికి రూ.10వేలు సాయం అందించడం, మూడేండ్లపాటు ఏటా 15 శాతం వృద్ధి సాధిస్తే టర్నోవర్‌లో 5 శాతం గ్రాంట్‌గా ఇవ్వడం, 5 వేల స్టార్టప్‌లను ప్రోత్సహించాలని తెలంగాణ సోషల్‌ స్టార్టప్‌ నెట్‌వర్క్‌ లక్ష్యంగా నిర్దేశించుకోవడం వంటి చర్యలను ప్రశంసించింది. కృత్రిమ మేధస్సు రంగంలో అవకాశాలు అందిపుచ్చుకునేలా 30వేల మంది యువతకు శిక్షణ ఇవ్వాలని నిర్ణయించడాన్ని ప్రత్యేకంగా ప్రస్తావించింది. రాష్ట్రంలో ఫార్మా రంగాన్ని సైతం రిపోర్ట్‌ ప్రశంసించింది. లైఫ్‌సైన్సెస్‌ ఎకోసిస్టమ్‌ను రాబోయే పదేండ్లలో రూ.7.4 లక్షల కోట్లకు చేర్చాలన్న లక్ష్యాన్ని, మెడికల్‌ డివైజెస్‌ పార్క్‌ ఏర్పాటును ప్రస్తావించింది. ఓ జాతీయ వార్తా పత్రికలో ప్రచురితమైన ఆ రిపోర్ట్‌లోని అంశాలను ఐటీశాఖ మంత్రి కేటీఆర్‌ గురువారం ట్వీట్‌ చేశారు. ఆ రిపోర్ట్‌లోని కొన్ని
ముఖ్యాంశాలు ఇలా ఉన్నాయి..

• రాష్ట్రంలో స్టార్టప్‌ ఎకో సిస్టమ్‌ విలువ రూ.11,500 కోట్లు (1.56 బిలియన్‌ డాలర్లు)
• 2019తో పోల్చితే 2020లో కరోనా విపత్తును సమర్థంగా ఎదుర్కొని 18 శాతం వృద్ధి సాధించింది.
• అదే సమయంలో జాతీయ సగటు వృద్ధి కేవలం 8.09 శాతం మాత్రమే. అంటే తెలంగాణ 2.25 రెట్లు అధిక వృద్ధిని నమోదు చేసింది.
• రాష్ట్రంలోని స్టార్టప్‌లు ప్రారంభదశలో సమకూర్చుకున్న నిధులు (ఎర్లీ స్టేజ్‌ ఫండింగ్‌) – రూ.888 కోట్లు (120 మిలియన్‌ డాలర్లు)
• రాష్ట్రంలోని స్టార్టప్‌లకు వచ్చిన సిరీస్‌ ఏ ఫండింగ్‌ – రూ.22.2 కోట్లు. ఇది ప్రపంచ సగటు కన్నా ఎక్కువ. ప్రపంచ సగటు రూ.19.9 కోట్లుగా ఉన్నది.