షూకన్‌తో సుకూన్‌

జపాన్‌ సంస్కృతిలో షూకన్‌ అనే పదం బాగా వాడుకలో ఉంటుంది. రోజువారీ జీవితం, వ్యక్తిత్వ వికాసం, సామాజిక నడవడికకు సంబంధించిన ఏదైనా అలవాటు అని దీనికి అర్థం.

జపాన్‌ సంస్కృతిలో షూకన్‌ అనే పదం బాగా వాడుకలో ఉంటుంది. రోజువారీ జీవితం, వ్యక్తిత్వ వికాసం, సామాజిక నడవడికకు సంబంధించిన ఏదైనా అలవాటు అని దీనికి అర్థం. తీసుకున్న మరుక్షణమే తేలిపోయే తీర్మానాలు, తూతూమంత్రం కార్యాచరణలా కాకుండా షూకన్‌ అనేది వ్యక్తిశీలం,
సామర్థ్యం, సంక్షేమం దిశగా క్రమశిక్షణతో కూడిన, దీర్ఘకాలం నిలిచి ఉండే సానుకూలమైన అలవాట్లకు సంబంధించిన విధానం.

ఏమిటీ షూకన్‌?

• షూ, కన్‌ అనే జపాన్‌కు చెందిన రెండు పదాల కలయికతో ఇది ఏర్పడింది. షూ అంటే నేర్చుకోవడం, సాధన చేయడం అని అర్థాలు. కన్‌ అంటే వాటికి అంటిపెట్టుకుని ఉండటం.
• రెండిటినీ కలిపితే… ఓ మంచి అలవాటు జీవితంలో భాగమయ్యే వరకు పదేపదే ప్రయత్నిస్తుండటం, నేర్చుకుంటూ ఉండటం.
• వ్యక్తిగత అభిరుచులు మొదలుకుని పని సంస్కృతి, విద్య, ఎదుటివారికి మర్యాద ఇవ్వడం వరకు మంచి అలవాట్లన్నీ షూకన్‌ జాబితాలో ఉంటాయి.

నిత్యజీవితంలో..

• జపాన్‌ సమాజంలో షూకన్‌ చాలా ప్రముఖ పాత్ర పోషిస్తుంది. జపాన్‌ ప్రజలు క్రమశిక్షణ, ఆరోగ్యం, పనిలో సామర్థ్యం సాధించే దిశగా ఇది మార్గనిర్దేశం చేస్తుంది.
• పనిచేసే చోట పని సంస్కృతి నియమబద్ధంగా సాగిపోవాలి. ఉద్యోగులు తమ పని నైపుణ్యాలను నిరంతరం మెరుగుపర్చుకుంటూ ఉండాలి.

ఎలా అనుసరించాలి?

• షూకన్‌ జపాన్‌కు చెందినదే అయినప్పటికీ ఏ దేశం వాళ్లయినా అనుసరించవచ్చు. దీనికోసం కొన్ని విషయాలు గుర్తుంచుకోవాలి.
• చిన్న ఆరంభం ఒకసారికి ఒక సరళమైన అలవాటుపై దృష్టిపెట్టాలి. అంటే పొద్దునే ఓ గ్లాసు నీళ్లతో రోజు మొదలుపెట్టడం లాంటిది అన్నమాట.
• స్థిరమైన కొనసాగింపు ఆ అలవాటు మన రోజువారీ జీవితంలో సహజంగా మారిపోయే వరకు పదేపదే చేస్తూ ఉండాలి.
• ఉన్న వాటికి అనుబంధంగా అంటే ఇప్పటికే ఉన్న అలవాట్లకు కొత్తగా ఒక దాన్ని చేర్చుకోవాలి. ఉదాహరణకు పొద్దునే లేచి బ్రష్‌ చేశాక, ధ్యానం, వ్యాయామం లాంటివి మొదలుపెట్టాలి.
• పురోగతి పరిశీలన కొత్త అలవాటు కొనసాగడానికి ఓ జర్నల్‌ రాయడమో, చెక్‌లిస్ట్‌ ఉపయోగించడమో చేయాలి. అలా ఎప్పటికప్పుడు స్ఫూర్తిమంతంగా ఉండటానికి ప్రయత్నించాలి.
• కైజెన్‌ను స్వీకరించాలి అంటే ఏ అలవాటు అయినా సరే నెమ్మదిగా మొదలుపెట్టి క్రమంగా పెంచుతూ పోవాలి. క్రమశిక్షణ, పరిశుభ్రత, సహనం, నిరంతరం నేర్చుకోవడం, అవసరానికి తగ్గట్టు మారడం జపాన్‌ సంస్కృతిలో విడదీయరాని భాగం. కాబట్టి, షూకన్‌ను భాగం చేసుకుంటే మన జీవితాలు మరింత పొందికగా సాగిపోతాయి.