మనుషులకూ ఇతర జీవులకూ మధ్య ఉన్న తేడా తెలిసిపోయింది..

మనుషులకూ ఇతర జీవులకూ మధ్య భౌతికంగా చాలా తేడాలే కనిపిస్తాయి. ఆయుధాలను పట్టుకునేందుకు తోడ్పడేలా బొటనవేలు అమరిక నుంచి, వెన్ను నిటారుగా ఉండటం వరకూ… ఎన్నో మార్పులు మనిషిని మనిషిగా చేశాయని భావిస్తూ వచ్చాం. కానీ జన్యుపరమైన మార్పులను ఇంతవరకూ పూర్తిగా గుర్తించలేకపోయాం. స్వీడన్‌కు చెందిన పరిశోధకులు ఇలాంటి ప్రయత్నమే చేశారు. మన జన్యువులలో కొంతభాగాన్ని ఇంకా పూర్తిగా శోధించలేదు. దాన్ని ‘నాన్‌ కోడెడ్‌ డీఎన్‌ఏ’ అంటారు. మనిషి వైవిధ్యానికి మూలమైన బ్రహ్మ రహస్యం వీటిలోనే ఉందని అంచనా. జర్మనీ, అమెరికా, జపాన్‌లకు చెందిన శాస్త్రవేత్తలతో కలిసి ఈ జన్యువులను విశ్లేషించే ప్రయత్నం చేశారు. వాటిని చింపాంజీల జన్యువులతో పోల్చి చూశారు. లక్షల సంవత్సరాల క్రితం చింపాంజీల నుంచి మనం విడిపడ్డామనే విషయం తెలిసిందే. కాబట్టి రెండు జీవుల మధ్య జన్యువుల్లో వచ్చిన తేడాలను గుర్తించే ప్రయత్నం మొదలుపెట్టారు. ఫలితంగా… మన మెదడులో కొన్ని స్పష్టమైన మార్పులను గమనించారు. మన జన్యువులను పూర్తిగా విశ్లేషించడం వల్ల, భవిష్యత్తులో జన్యుపరమైన చికిత్సలు సులభం కానున్నాయి. స్కిజోఫ్రీనియా లాంటి వ్యాధులను నయం చేసే అవకాశం పుష్కలంగా ఉంటుంది.