రంగుల మాయాజాలం!

రంగులు ప్రకృతిలో అద్భుతమైన దృశ్యాలను ఆవిష్కరిస్తాయి. వేవేల వర్ణాల్లో విరబూసే పువ్వులు, సీతాకోకచిలుకలు, రంగురంగుల గోడలు.. అందరినీ ఆకర్షిస్తాయి. సూర్యోదయం-సూర్యాస్తమయంలో ఆకాశంలో కనిపించే వర్ణాలు.. చూపులను కట్టిపడేస్తాయి. విభిన్న వర్ణాలను ఒక్క ఫ్రేమ్‌లోకి తీసుకొస్తే.. అద్భుతమైన ఫొటోలు వస్తాయి.

రంగులు ప్రకృతిలో అద్భుతమైన దృశ్యాలను ఆవిష్కరిస్తాయి. వేవేల వర్ణాల్లో విరబూసే పువ్వులు, సీతాకోకచిలుకలు, రంగురంగుల గోడలు.. అందరినీ ఆకర్షిస్తాయి. సూర్యోదయం-సూర్యాస్తమయంలో ఆకాశంలో కనిపించే వర్ణాలు.. చూపులను కట్టిపడేస్తాయి. విభిన్న వర్ణాలను ఒక్క ఫ్రేమ్‌లోకి తీసుకొస్తే.. అద్భుతమైన ఫొటోలు వస్తాయి. అలాంటి ఫొటోగ్రఫీకే.. ‘కలర్‌ కాంట్రాస్ట్‌ ఫొటోగ్రఫీ’ అనిపేరు.

అందమైన రంగులు.. వీక్షకుల దృష్టిని ఇట్టే ఆకర్షిస్తాయి. వారి మనసుపైనా ప్రభావం చూపుతాయి. కొన్ని రంగులు సంతోషాన్ని, ప్రశాంతతను, ఉత్సాహాన్ని కలిగిస్తాయి. మరికొన్ని వర్ణాలు వారిలోని బాధను బయటపెడతాయి. అందుకే, భిన్నమైన రంగులను ఒక్క దగ్గరికి చేరిస్తే.. ఫొటోలు కూడా విభిన్నంగా వస్తాయి. ఫొటోగ్రఫీలో కలర్‌ కాంట్రాస్ట్‌ను ఉపయోగించడానికి.. కలర్‌ థియరీలో నిష్ణాతులే కానవసరం లేదు. కొన్ని ముఖ్యమైన కాంట్రాస్ట్‌ ఫొటోగ్రఫీ రకాలను గుర్తించి.. పరిపూర్ణమైన రంగులతో ఫొటోలు తీస్తే చాలు. చేతిలో ఉన్న స్మార్ట్‌ఫోన్‌ సాయంతోనే.. అద్భుతమైన ‘కలర్‌ కాంట్రాస్ట్‌’ ఫొటోలు తీయడం ఎలాగో తెలుసుకుందాం!

కలర్‌ కాంట్రాస్ట్‌ అంటే?

రెండుమూడు విభిన్నమైన రంగులను ఒక ఫ్రేమ్‌లో చేర్చడమే కలర్‌ కాంట్రాస్ట్‌. ఇవి ఒకదానితో ఒకటి స్పష్టంగా, భిన్నంగా కనిపించి.. వీక్షకుల దృష్టిని ఆకర్షిస్తాయి. ఉదాహరణకు.. ఆకుపచ్చ ఆకుల మీద ఎర్రని పువ్వు; పసుపు రంగు గోడ ముందు బ్లాక్‌ కలర్‌ బైక్‌.

అవసరమైనవి

• మంచి రిజల్యూషన్‌ కెమెరా కలిగిన మొబైల్‌ ఫోన్‌.
• సహజ కాంతి, డిఫ్యూస్‌ లైట్‌ .
• విభిన్నమైన రంగులను గుర్తించగలగడం.
• కాస్త కలర్‌ థియరీ.

కెమెరా సెట్టింగ్స్‌

• ఫోకస్‌ : ప్రధానమైన రంగు (సబ్జెక్ట్‌)పై ట్యాప్‌ చేసి.. ఫోకస్‌ను లాక్‌ చేయండి.
• ఎక్స్‌పోజర్‌ : కాంతి మరీ ఎక్కువగా ఉండకూడదు. రంగుల కచ్చితత్వం కోసం ఎక్స్‌పోజర్‌ను మోడరేట్‌గా ఉంచండి.
• హెచ్‌డీఆర్‌ మోడ్‌ : రంగులు ప్రకాశవంతంగా కనిపించేందుకు, ఎడిటింగ్‌ కోసం.. హెచ్‌డీఆర్‌ మోడ్‌ ఆన్‌ చేసుకోండి.
• గ్రిడ్‌ లైన్స్‌ : ఫ్రేమింగ్‌ పక్కాగా ఉండేందుకు గ్రిడ్‌ లైన్స్‌ ఉపయోగించండి.
• పోర్ట్రెయిట్‌ మోడ్‌ : బ్యాక్‌గ్రౌండ్‌ బ్లర్‌ చేసి.. ప్రధాన సబ్జెక్ట్‌ రంగులను హైలైట్‌ చేయడానికి పోర్ట్రెయిట్‌ మోడ్‌లో షూట్‌ చేయండి.

క్రియేటివ్‌ ఐడియాలు

• రెండు మూడు రంగులతో ఉన్న బ్యాక్‌గ్రౌండ్స్‌ను ఎంచుకోండి. అవి ఎక్కువ ఆకర్షణీయంగా ఉంటాయి. చుట్టూ ఉన్న ప్రపంచంలో సహజంగానే కలిసిపోతాయి.
• స్టిల్‌ ఫొటోల కోసం.. ప్రకాశవంతమైన రంగులైతే బాగుంటుంది. బోల్డ్‌ రంగులు మరింత డిఫరెంట్‌గా కనిపిస్తాయి.
• ముదురు వర్ణాలను లేత రంగులతో కలిపేయండి. ఎరుపు, నారింజ, పసుపు రంగులు.. ఫొటోలకు వార్మ్‌ లుక్‌ తీసుకొస్తాయి. నీలం, ఆకుపచ్చ, ఊదా రంగులు.. కూల్‌గా కనిపిస్తాయి.
• కాంట్రాస్టింగ్‌ రంగులు.. ఫొటోలకు మరింత డెప్త్‌ను, భావోద్వేగాలను తీసుకురావడంలో సహాయపడతాయి. ఒకదానికొకటి విరుద్ధంగా ఉండే రంగులు.. ఛాయాచిత్రాలను ఆకర్షణీయంగా మారుస్తాయి. వీక్షకులను ఎక్కువగా ఆకర్షిస్తాయి. ఉదాహరణకు.. నలుపు-తెలుపు గోడ ముందు విభిన్న రంగుల దుస్తుల్లో ఉండే వ్యక్తి, నీలాకాశంలో ఎగిరే తెల్లని కొంగలు.. విభిన్నంగా కనిపిస్తాయి.
• కలర్‌ కాంట్రాస్ట్‌ను మరింత మెరుగుపరచడానికి పోస్ట్‌ ప్రాసెసింగ్‌ను ఉపయోగించండి. ఎడిటింగ్‌ సమయంలో తక్కువ కాంట్రాస్ట్‌ చిత్రాలను అధిక కాంట్రాస్ట్‌ చిత్రాలుగా మార్చేయొచ్చు.

ఎడిటింగ్‌ టిప్స్‌

స్నాప్‌సీడ్‌, లైట్‌రూమ్‌ మొబైల్‌ లాంటి సాఫ్ట్‌వేర్‌లు ఉపయోగించండి.

సాచురేషన్‌ : రంగులు మరింత ఆకర్షణీయంగా కనిపించేందుకు సాచురేషన్‌ను అడ్జస్ట్‌ చేయండి.

కాంట్రాస్ట్‌ : రెండు విభిన్న రంగుల మధ్య వ్యత్యాసం చూపించడానికి కాంట్రాస్ట్‌ను పెంచండి.

సెలెక్టివ్‌ ఎడిటింగ్‌ : కేవలం సబ్జెక్ట్‌ లేదా బ్యాక్‌గ్రౌండ్‌ను మార్చుకోవడానికి ఈ టూల్‌ను ఉపయోగించండి.

క్రాప్‌ : ఫొటోల్లో రూల్‌ ఆఫ్‌ థర్డ్స్‌, ఇతర కాంపొజిషన్‌ టెక్నిక్స్‌ కనిపించడానికి ఫొటోలను క్రాప్‌ చేసుకోండి.

సూచనలు – సలహాలు

• కాంప్లిమెంటరీ కలర్స్‌ను ప్రయత్నించండి. ఫ్రేమ్‌లో రెండుమూడు రంగులు మాత్రమే ఉండేలా చూసుకోండి. చాలా రంగులను కలిపేస్తే.. ఫొటోల్లో గందరగోళం ఏర్పడుతుంది.
• ఓవర్‌ సాచురేషన్‌ చేస్తే.. రంగుల సహజత్వం దెబ్బతింటుంది. కాబట్టి, ఎడిటింగ్‌ సమయంలో జాగ్రత్తగా ఉండండి.
• బ్యాక్‌గ్రౌండ్‌లో ఏ రకమైన డిస్టర్బెన్స్‌ ఉండకుండా చూసుకోండి. మినిమలిజం ఫొటోగ్రఫీని ఫాలో అవ్వండి.

ఫైనల్‌గా.. కలర్‌ కాంట్రాస్ట్‌ ఫొటోగ్రఫీ అనేది వీక్షకుల దృష్టిని సబ్జెక్ట్‌పై కేంద్రీకరించడానికి ఓ గొప్ప మార్గం. మీ మొబైల్‌ ఫోన్‌తోనే.. సాధారణ దృశ్యాలను కూడా రంగుల మాయాజాలంగా మార్చవచ్చు. ఈ టెక్నిక్‌ను రోజువారీ జీవితంలో ప్రయోగించి.. మీ ఫొటోగ్రఫీని ఒక కొత్త స్థాయికి తీసుకెళ్లండి. ఈరోజే మీరు నిత్యం చూసే రంగుల కాంబినేషన్లలో ఒక ఫొటో తీయండి.

ఆడెపు హరికృష్ణ