మోషన్‌ బ్లర్‌ ఫొటోగ్రఫీ.. అస్పష్టంలోనే అద్భుతం..

మోషన్‌ బ్లర్‌ అనేది.. ఒక లాంగ్‌ ఎక్స్‌పోజర్‌ ఫొటోగ్రఫీ టెక్నిక్‌. ఇందులో కదిలే వస్తువే ప్రధాన సబ్జెక్ట్‌గా ఉంటుంది. దానిని ఉద్దేశపూర్వకంగా బ్లర్‌ చేయడం ద్వారా.. ఫొటోలో కొత్తదనం కనిపిస్తుంది.

ఫొటోలను చాలా స్పష్టంగా తీయాలి. ఫోకస్‌ మొత్తం సబ్జెక్ట్‌పైనే ఉండాలి. ఏమాత్రం తేడా వచ్చినా.. ఫొటోలు బ్లర్‌ అయిపోతాయి. అస్పష్టంగా కనిపిస్తాయి. మరి, కావాలనే ఫొటోలను బ్లర్‌ చేస్తే..? కొన్ని సందర్భాల్లో ఈ అస్పష్టమైన ఫొటోలే అద్భుతం అనిపిస్తాయి. దానికే.. ‘మోషన్‌ బ్లర్‌ ఫొటోగ్రఫీ’ అనిపేరు. స్మార్ట్‌ఫోన్‌ సాయంతో.. మోషన్‌ బ్లర్‌ ఫొటోగ్రఫీని ఎలా తీయాలో తెలుసుకుందాం.

మోషన్‌ బ్లర్‌ అనేది.. ఒక లాంగ్‌ ఎక్స్‌పోజర్‌ ఫొటోగ్రఫీ టెక్నిక్‌. ఇందులో కదిలే వస్తువే ప్రధాన సబ్జెక్ట్‌గా ఉంటుంది. దానిని ఉద్దేశపూర్వకంగా బ్లర్‌ చేయడం ద్వారా.. ఫొటోలో కొత్తదనం కనిపిస్తుంది. షటర్‌ స్పీడ్‌ తగ్గించడం ద్వారా.. ఇలాంటి ఫొటోలను క్యాప్చర్‌ చేయొచ్చు. ఇలా తీసిన ఛాయాచిత్రాలు.. మరింత ఆకర్షణీయమైన కథలను చెప్పడంలో సహాయపడతాయి.

అవసరమైనవి

• స్లో షటర్‌ మోడ్‌ లేదా లాంగ్‌ ఎక్స్‌పోజర్‌ కెమెరా కలిగిన స్మార్ట్‌ఫోన్‌.
• ట్రైపాడ్‌.
• మోషన్‌ బ్లర్‌/ లైట్‌ ట్రయల్‌ యాప్‌ లేదా మాన్యువల్‌ కెమెరా యాప్‌. 
• సహజ కాంతి లేదా రాత్రిపూట కృత్రిమ కాంతితోనూ ప్రయత్నించవచ్చు.మొబైల్‌ సెట్టింగ్స్‌
• కెమెరాను మాన్యువల్‌ (ప్రొ) మోడ్‌లో ఉంచుకోవాలి.
• షటర్‌ స్పీడ్‌ తగ్గించుకోవాలి (అంటే నంబరింగ్‌ ఎక్కువగా ఉండాలి. ఉదాహరణకు 1/4 సెకండ్లు, 1 సెకండ్‌, 2 సెకండ్లు..).
• ఐఎస్‌ఓ : తక్కువగా ఉంచాలి (కాంతి బాగా ఉంటే).
• ఫోకస్‌ : సబ్జెక్ట్‌పై ఫిక్స్‌ చేయాలి.

ఉపయోగపడే యాప్స్‌

• స్లోషటర్‌ (ఐఓఎస్‌).
• మోషన్‌ బ్లర్‌ కెమెరా (ఆండ్రాయిడ్‌).
• ప్రొ క్యామ్‌ ఎక్స్‌, మాన్యువల్‌ కెమెరా డీఎస్‌ఎల్‌ఆర్‌ (ఆండ్రాయిడ్‌).

మోషన్‌ బ్లర్‌ టెక్నిక్స్‌

• ఆబ్జెక్ట్‌ మూవింగ్‌ బ్లర్‌ : ఇక్కడ సబ్జెక్ట్‌ మాత్రమే కదులుతూ ఉంటుంది. కెమెరాను స్థిరంగా ఉంచుతూ ఫొటో తీస్తే.. వస్తువు మాత్రమే బ్లర్‌ అవుతుంది.
• ప్యానింగ్‌ షాట్‌ : ఈ టెక్నిక్‌లో కదిలే సబ్జెక్ట్‌తోపాటు కెమెరాను కూడా కదిలించాలి. అప్పుడు బ్యాక్‌గ్రౌండ్‌ బ్లర్‌ అయిపోతుంది. సబ్జెక్ట్‌ స్పష్టంగా కనిపిస్తుంది.
• లైట్‌ ట్రెయిల్స్‌ : రాత్రి సమయంలో రోడ్లపై వెళ్తున్న వాహనాల వెనక లైట్లపై ఫోకస్‌ చేయండి. లాంగ్‌ ఎక్స్‌పోజర్‌ సాయంతో ఫొటోలు తీస్తే.. అద్భుతమైన లైట్‌ ట్రెయిల్స్‌ కనిపిస్తాయి.
• క్రౌడ్‌ బ్లర్‌ : రద్దీ ప్రాంతాలు, మార్కెట్లలో ఇలాంటి ఫొటోలు తీయొచ్చు. క్లాక్‌ టవర్‌, పురాతన భవనం.. ఇలా స్థిరంగా ఉండే సబ్జెక్ట్‌పై ఫోకస్‌ చేయాలి. అప్పుడు ఆ సబ్జెక్ట్‌ చుట్టూ కదిలే జనాలు బ్లర్‌ అవుతారు.
• వాటర్‌ఫ్లో బ్లర్‌ : జలపాతాలు, నదిలో నీటి ప్రవాహాన్ని కూడా ఇలా బ్లర్‌ చేయొచ్చు. అప్పుడు నీళ్లు కూడా మృదువుగా, పొగమంచు మాదిరిగా కనిపిస్తాయి.ఎడిటింగ్‌ కోసం..
• స్నాప్‌సీడ్‌/ లైట్‌రూమ్‌ మొబైల్‌/ మోషన్‌ లీప్‌ లాంటి యాప్స్‌ వాడితే..
• బ్రైట్‌నెస్‌, కాంట్రాస్ట్‌ను అడ్జస్ట్‌ చేసుకోండి.
• ఫొటోలు మరీ అస్పష్టంగా అనిపిస్తే.. కొద్దిగా షార్ప్‌నెస్‌ పెంచుకోవచ్చు.
• మోషన్‌ బ్లర్‌ ఎఫెక్ట్‌ ఇవ్వండి.
• మంచి ఫ్రేమింగ్‌ కోసం ఫొటోని క్రాప్‌ చేసుకోండి.

ఇందులో షటర్‌ స్పీడ్‌ తక్కువగా ఉంటుంది కాబట్టి, ట్రైపాడ్‌ కీలకం. లేకుంటే.. చేతులు వణికి ఫొటోలు అస్పష్టంగా వస్తాయి. ఇక ఫోకస్‌ మొత్తం సబ్జెక్ట్‌పైనే ఉంచి షటర్‌ వేయాలి. ఎక్కువ చీకటి లేదా ఎక్కువ వెలుతురులో ఈ రకమైన ఫొటోగ్రఫీని ప్రయత్నించొద్దు. ఇక మోషన్‌ బ్లర్‌ ఫొటోగ్రఫీలో ‘ఆటోమోడ్‌’ పనికిరాదు.

చివరగా.. మోషన్‌ బ్లర్‌ ఫొటోగ్రఫీ అనేది వేగాన్ని, భావాన్ని, జీవాన్ని చూపించగల ఒక కళ. మీ మొబైల్‌ఫోన్‌తోనే ఈ టెక్నిక్‌లో మాస్టర్‌ కావొచ్చు. కాస్త సృజనాత్మకత, ఇంకాస్త ఓపిక.. ఉంటే, ప్రొఫెషనల్‌ లెవెల్‌ ఫొటోలు తీయొచ్చు. రాత్రిపూట రోడ్లపై దూసుకెళ్తున్న వాహనాలు, ఆడిటోరియంలో ప్రదర్శనలిస్తున్న డ్యాన్సర్‌ను.. తక్కువ షటర్‌ స్పీడ్‌లో క్యాప్చర్‌ చేయడం మొదలుపెట్టండి.

-ఆడెపు హరికృష్ణ