mini bengal | తెలంగాణ‌లో మినీ బెంగాల్‌.. క‌ట్టుబొట్టూ అంతా ఉత్త‌రాది స్టైలే !!

December 12, 2021 / 09:16 AM IST

mini bengal |తెలంగాణలోని ఆ ప్రాంతానికి వెళ్తే.. పశ్చిమ బెంగాల్‌లో అడుగు పెట్టినట్లే ఉంటుంది. బెంగాలీల ఆరాధ్య దైవం దుర్గామాత.. అక్కడి పల్లెపల్లెనా కొలువై దర్శనమిస్తుంది. సంస్కృతి, సంప్రదాయాలు.. మహిళల కట్టూ బొట్టూ ఉత్తరాదిని తలపిస్తాయి. ఎవరిని పలకరించినా.. ‘బెంగాలీ’లోనే సమాధానం వస్తుంది. ఆ ప్రాంతమే.. కాగజ్‌నగర్‌ సమీపంలోని నజ్రుల్‌నగర్‌.

మినీ బెంగాల్‌!

కుమ్రం భీం జిల్లా నజ్రుల్‌నగర్‌ను ‘మినీ బెంగాల్‌’గా అభివర్ణిస్తుంటారు. బంగ్లాదేశ్‌ విమోచన సందర్భంగా వలస వచ్చిన బెంగాలీలు, ఇక్కడ స్థిరనివాసం ఏర్పాటు చేసుకొన్నారు. ఆరు దశాబ్దాలుగా తమ సంస్కృతి, సంప్రదాయాలను కాపాడుకుంటూ వస్తున్నారు. నిత్య పూజలు, వినూత్న వ్యవసాయ పద్ధతులతో ప్రత్యేకత చాటుతున్నారు. బంగ్లాదేశ్‌ విమోచన నేపథ్యంలో దాదాపు రెండు వేల కుటుంబాలు కాగజ్‌నగర్‌ ప్రాంతానికి వలస వచ్చాయి. వీరికి కేంద్ర ప్రభుత్వం ఈస్గాం సమీపంలో ఆశ్రయం కల్పించింది. ప్రతి కుటుంబానికి నాలుగెకరాల వ్యవసాయ భూమి, ఇంటి స్థలాలను అందించింది. బెంగాలీ రచయిత, కవి ‘ కాజీ నజ్రుల్‌ ఇస్లాం’ పేరిట వీరుండే ప్రాంతానికి ‘నజ్రుల్‌నగర్‌’ అనే పేరు పెట్టారు. నాడు ఒకే గ్రామానికి పరిమితమైనా, ఇప్పుడు 13 గ్రామాలకు విస్తరించారు. ఈ గ్రామాల పేర్లు కూడా ‘నజ్రుల్‌నగర్‌-1’, ‘నజ్రుల్‌నగర్‌-2’.. అనే ఉంటాయి. ప్రస్తుతం వీరి జనాభా 15 వేలు.

గడప గడపకూ..

ఆధ్యాత్మిక చింతన వీరి జీవనంలో ఓ భాగం. అందుకే, నజ్రుల్‌నగర్‌లో ఇంటికో ఆలయం ఉంటుంది. ఇంటింటా కాళీమాత, దుర్గాదేవి, లక్ష్మీదేవి, శివాలయం, శ్రీకృష్ణుడి ఆలయం కనిపిస్తుంది. ఉదయం, సాయంత్రం పూజలు చేస్తారు. స్వచ్ఛతకు అధిక ప్రాధాన్యమిస్తారు. ఆలయాలతోపాటు ఇంటి ఆవరణను పరిశుభ్రంగా ఉంచుకొంటారు. ప్రతి ఇంటి ముందూ రంగురంగుల పూలు, పండ్ల చెట్లను పెంచుకొంటారు. ఆలయాల్లో ప్రతిరోజూ రాత్రి 10 గంటల వరకు భజనలు, పూజలు ఉంటాయి. ఏటా దసరా, దీపావళి పండుగలను సామూహికంగా జరుపుకొంటారు.

వినూత్న పంటలు..

ప్రభుత్వం కేటాయించిన బీడు భూములను సాగుకు అనుకూలంగా మార్చుకొన్నారు బెంగాలీలు. అందరిలా కాకుండా వినూత్న పంటలు పండిస్తున్నారు. ‘పర్వల్‌’ అనే తీగజాతి కూరగాయతోపాటు బ్రకోలీ, స్టార్‌ ఫ్రూట్‌, క్యాబేజీలాంటివి సాగు చేస్తున్నారు. కాలీఫ్లవర్‌, వంకాయ, చిక్కుడు, క్యారెట్‌, ముల్లంగి, బీర, మిరప, టమాట, ఇతర ఆకుకూరలతోపాటు వరిని పండిస్తున్నారు. అడుగు భూమి కూడా వృథా పోనీయకుండా ఏదో ఒక పంట వేస్తూనే ఉంటారు. బెంగాలీల ఆహారంలో వైవిధ్యం కనిపిస్తుంది. చేపలను ఇష్టంగా తింటారు. ఇక్కడి 13 గ్రామాల్లో 30కిపైగా చేపల చెరువులుండటం విశేషం. నూనె, ఉప్పు తప్ప మార్కెట్‌లో ఏవీ కొనుగోలు చేయరు. అన్నిటినీ సొంతంగా ఉత్పత్తి చేసుకొంటారు.

ఆర్మీ పట్ల ఆసక్తి

నజ్రుల్‌నగర్‌ యువత ఆర్మీలో చేరేందుకు ఎక్కువ ఆసక్తి చూపిస్తున్నారు. ఇక్కడి 13 గ్రామాల నుంచి 600 మంది యువకులు దేశ రక్షణలో పాలుపంచుకొంటున్నారు. మరో 60 మంది వరకూ ఇతర ప్రభుత్వ ఉద్యోగాలు చేస్తున్నారు. గ్రూప్‌-2 కేడర్‌లో 15 మంది విధులు నిర్వహిస్తుండగా, 50 మంది వరకు ఇతర దేశాల్లో స్థిరపడ్డారు. భారత స్వాతంత్య్ర ఉద్యమాన్ని బెంగాలీ నేతలే నడిపించారు, భారతీయ సాహిత్యాన్ని కూడా నోబెల్‌ స్థాయికి తీసుకెళ్లారు. ఆ మూలాల్ని ఆ కథల్నీ ఇక్కడి ప్రజలు మరచిపోలేదు. పిల్లలకు జోలపాటగానో, లాలిపాటలానో గుర్తుచేస్తూనే ఉంటారు.

కట్టూ.. బొట్టూ!

బెంగాలీ మహిళల కట్టుబొట్టు మరింత ప్రత్యేకం. వివాహితులు సంప్రదాయ చీరకట్టులో కనిపిస్తారు. ఎరుపు అంచు ఉండే తెల్లచీరలను ధరిస్తారు. ఎరుపు, తెలుపు గాజులు వేసుకొంటారు. నుదుటితోపాటు పాపిటలోనూ సిందూరం ధరిస్తారు. పెద్ద బొట్టు పెట్టుకుంటారు. పండుగల సమయంలోనూ మహిళలు, యువతులు తమకే ప్రత్యేకమైన వేషధారణతో సందడి చేస్తారు. అంతేకాకుండా బెంగాలీలకు భాషాభిమానం ఎక్కువ. ఇక్కడ స్థిరపడి 60 ఏండ్లు గడుస్తున్నా, ఇప్పటికీ తమ మాతృభాషను వదులుకోలేదు.

✍ జాడి హన్మయ్య
ఫొటోలు : వర్షిణి శ్రీనివాస్‌

లోక‌ల్ టు గ్లోబ‌ల్ వార్త‌ల కోసం.. న‌మ‌స్తే తెలంగాణ ఫేస్‌బుక్‌, ట్విట‌ర్ పేజీల‌ను ఫాలో అవ్వండి