పుస్తక సమీక్ష

ఆర్థిక సంస్కరణల తర్వాత నగరీకరణ వేగం పెరిగింది. పెద్ద నగరాలకు చుట్టుపక్కల ఉండే గ్రామాలు కూడా పట్టణీకరణ ప్రభావానికి లోనవుతున్నాయి. ఈ క్రమంలో పంటపొలాలు మాయమైపోతున్నాయి. భూమినే నమ్ముకొని బతుకు వెళ్లదీసిన మనుషులకు ఇలాంటి పరిస్థితులు కొంచెం ఇబ్బందికరంగా పరిణమించడం సహజమే.

August 25, 2024 / 02:46 AM IST

జీవనస్పర్శతో రాసిన కథలు

ఆర్థిక సంస్కరణల తర్వాత నగరీకరణ వేగం పెరిగింది. పెద్ద నగరాలకు చుట్టుపక్కల ఉండే గ్రామాలు కూడా పట్టణీకరణ ప్రభావానికి లోనవుతున్నాయి. ఈ క్రమంలో పంటపొలాలు మాయమైపోతున్నాయి. భూమినే నమ్ముకొని బతుకు వెళ్లదీసిన మనుషులకు ఇలాంటి పరిస్థితులు కొంచెం ఇబ్బందికరంగా పరిణమించడం సహజమే. పాత్రికేయులు ఎ.యం.అయోధ్యా రెడ్డి ‘సీతంబాయి పొలం’ కథ ఈ ఇతివృత్తంతోనే నడుస్తుంది. తరతరాలుగా అనుభవిస్తున్న పొలం అమ్మకం కోసం రియల్‌ ఎస్టేట్‌ వేలానికి వెళ్లాలనే నవతరం పిల్లలకు సర్దిచెప్పుకోలేక ప్రాణాలు విడిచిన ఓ రైతు కన్నీటికథ ఇది.

ఈ సంకలనంలో మిగిలిన కథలు మన కళ్లెదుట జరుగుతున్న సంఘటనల నేపథ్యంగా సాగినవే కావడం గమనార్హం. ‘ఆరడుగుల శ్వాస’ కథ కరోనా సమయంలో విధి నిర్వహణకు బద్ధుడైన ఓ పూజారి జీవితం విషాదాంతమైన దృశ్యాన్ని ఆవిష్కరిస్తుంది. మరో కథ ‘పనిపిల్ల’ సమాజంలో నెలకొన్న ఆర్థిక అంతరాలను, బాల కార్మికుల దైన్యస్థితిని వివరిస్తుంది. ఇక ‘నూరో బిచ్చగాడు’ కథ ప్రతికూల పరిస్థితుల్లో చెక్కుచెదరని విశ్వాసాన్ని ప్రకటించిన ఓ మహిళ, తన జీవితం విషయంలో ఏ నిర్ణయం తీసుకుందో తెలుపుతుంది. ‘వేలాడిన న్యాయం’ కథ అన్యాయంగా ఉరికొయ్యకు వేలాడిన ఓ నిరపరాధి అంతరంగ సంఘర్షణను కండ్లకు కడుతుంది. రచయిత అయోధ్యా రెడ్డి పేర్కొన్నట్టు ‘సీతంబాయి పొలం’ కథలు జీవనస్పర్శతో రాసినవి.