Yusuf Pathan: మ‌హ్మ‌ద్ ఆమిర్‌ను చిత‌క్కొట్టిన యూసుఫ్ ప‌ఠాన్‌.. వీడియో

Yusuf Pathan: యూసుఫ్ ప‌ఠాన్ సిక్స‌ర్ల‌తో చెల‌రేగాడు. పాక్ మాజీ బౌల‌ర్ ఆమిర్‌ను ఉతికారేశాడు. ఆఫ్రో టీ10 టోర్నీలో యూసుఫ్ త‌న గ‌త రోజుల్ని త‌ల‌పించాడు. చిచ్చ‌ర‌పిడుగు ఇన్నింగ్స్‌తో జోబ‌ర్గ్ జ‌ట్టును ఫైన‌ల్‌కు చేర్చాడు. 26 బంతుల్లో యూసుఫ్ 80 ర‌న్స్ చేసి నాటౌట్‌గా నిలాచాడు.

హ‌రారే: జింబాబ్వేలో జ‌రుగుతున్న జిమ్ సైబ‌ర్ సిటీ జిమ్ ఆఫ్రో టీ10 టోర్న‌మెంట్‌లో టీమిండియా మాజీ క్రికెట‌ర్ యూసుఫ్ ప‌ఠాన్(Yusuf Pathan) దుమ్మురేపాడు. జోబ‌ర్గ్ బ‌ఫెలోస్ జ‌ట్టు త‌ర‌పున ఆడిన అత‌ను.. క్వాలిఫ‌య‌ర్ 1 మ్యాచ్‌లో.. డ‌ర్బ‌న్ క్వాలాండ‌ర్స్ జ‌ట్టుకు చెందిన పాకిస్తాన్ మాజీ బౌల‌ర్ మ‌హ‌మ్మ‌ద్ ఆమిర్‌ను చిత‌క్కొట్టాడు. ఆమిర్ బౌలింగ్‌లో ప‌ఠాన్ మూడు సిక్స‌ర్లు దంచేశాడు. 26 బంతుల్లో 80 ర‌న్స్ చేసి నాటౌట్‌గా నిలిచాడు. దీంతో జోబ‌ర్గ్ బ‌ఫెలోస్‌ ఆరు వికెట్ల తేడాతో డ‌ర్బ‌న్‌పై నెగ్గి ఫైన‌ల్లోకి ప్ర‌వేశించింది. ఆమిర్ బౌలింగ్‌లో యూసుఫ్ ప‌ఠాన్ కొట్టిన సిక్స‌ర్ల‌కు చెందిన వీడియో ఇదే.

Far from over when @iamyusufpathan is in this form! 🚀#JBvDQ #T10League #ZimAfroT10 #CricketsFastestFormat pic.twitter.com/Cdgi7HCsAd

— Abu Dhabi T10 (@T10League) July 28, 2023

తొలుత బ్యాటింగ్ చేసిన డ‌ర్బ‌న్ జ‌ట్టు నిర్ణీత 10 ఓవ‌ర్ల‌లో 4 వికెట్ల న‌ష్టానికి 140 ర‌న్స్ చేసింది. డ‌ర్బ‌న్ జ‌ట్టులో ఫ్లెచ‌ర్ 39, అసిఫ్ అలీ 32 ర‌న్స్ చేశారు. ఆ త‌ర్వాత చేజింగ్‌లో జోబ‌ర్గ్ జ‌ట్టుకు తొలుత జ‌ల‌క్ త‌గిలింది. ఓపెన‌ర్లు స్వ‌ల్ప స్కోర్ల‌కే నిష్క్ర‌మించారు. కానీ యూసుఫ్ ప‌ఠాన్ చిచ్చ‌ర‌పిడుగులా రెచ్చిపోయాడు. కేవ‌లం 26 బంతుల్లో 80 ర‌న్స్ చేసి నాటౌట్‌గా నిలిచాడు. యూసుఫ్ ఇన్నింగ్స్‌లో 9 సిక్స‌ర్లు, నాలుగు ఫోర్లు ఉన్నాయి.