Umran Malik | ఉమ్రాన్‌కు ఇది ఒక మంచి పాఠం.. సన్‌రైజర్స్‌ పేసర్‌కు మాజీ దిగ్గజం సలహా

ప్రస్తుతం జరుగుతున్న ఐపీఎల్ సీజన్‌లో ప్రపంచ క్రికెట్ దృష్టిని తన వైపు తిప్పుకున్న ఆటగాళ్లలో సన్‌రైజర్స్ హైదరాబాద్ యువ పేసర్ ఉమ్రాన్ మాలిక్ ఒకడు. క్రమం తప్పకుండా 150 కిలోమీటర్ల వేగంతో బంతులు విసురుతూ అందరి ఫోకస్ తన వైపు తిప్పుకున్నాడీ శ్రీనగర్ పేసర్. అయితే తాజాగా ఢిల్లీ క్యాపిటల్స్‌తో జరిగిన మ్యాచ్‌లో అతను పూర్తిగా విఫలమయ్యాడు.

నాలుగు ఓవర్లలో ఒక్క వికెట్ కూడా తీయకుండా 52 పరుగులు సమర్పించుకున్నాడు. ఈ క్రమంలో ఇది ఉమ్రాన్‌కు మంచి పాఠమని మాజీ పేసర్ ఆర్పీ సింగ్ అన్నాడు. పేస్ ఉన్న బౌలర్‌కు అది ఒక్కటే చాలదని, కొంచెం తెలివి కూడా ఉపయోగించాలని సూచించాడు. ప్రస్తుతం ఉమ్రాన్ ప్రిపరేషన్ స్టేజిలో ఉన్నాడని అభిప్రాయపడ్డాడు.

‘‘పవర్‌ప్లేలో అతను భారీగా పరుగులు ఇచ్చాడు. మధ్య ఓవర్లలోనూ అదే జరిగింది. అంటే అతను ఇంకా చాలా ఇంప్రూవ్ అవ్వాల్సి ఉంది. పేస్ ఒక్కటే ముఖ్యం కాదు. బౌలింగ్ చేయడానికి కొన్ని నైపుణ్యాలు కూడా అవసరమే. అలాగే బుర్ర కూడా వాడాలి. ఒక్కో బ్యాటర్‌కు ఎక్కడ బంతులు విసరాలో తెలుసుకోవాలి’’ అని ఆర్పీ సింగ్ సలహా ఇచ్చాడు.