SRH vs CSK | ధోనీ కెప్టెన్సీలో చెన్నై గ్రాండ్ విక్టరీ.. పోరాడి ఓడిన సన్‌రైజర్స్

చెన్నై సూపర్ కింగ్స్‌తో జరిగిన మ్యాచ్‌లో సన్‌రైజర్స్ హైదరాబాద్ జట్టు పోరాడి ఓడింది. టాస్ గెలిచి బౌలింగ్ ఎంచుకున్న సన్‌రైజర్స్‌కు చెన్నై ఓపెనర్లు చుక్కలు చూపించారు. రుతురాజ్ గైక్వాడ్ (99), డెవాన్ కాన్వే (85 నాటౌట్) అదరగొట్టడంతో ఆ జట్టు 2 వికెట్ల నష్టానికి 202 పరుగుల భారీ స్కోరు చేసింది.

లక్ష్య ఛేదనలో అభిషేక్ శర్మ (39), కేన్ విలియమ్సన్ (47) సన్‌రైజర్స్‌కు శుభారంభం అందించారు. ఒక దశలో సన్‌రైజర్స్ లక్ష్యాన్ని ఛేదించేలా కనిపించింది. కానీ చెన్నై పేసర్ ముకేష్ చౌదరి ఆ జట్టును దెబ్బతీశాడు. నాలుగు వికెట్లతో అతను చెలరేగడంతో.. రాహుల్ త్రిపాఠీ (0), వాషింగ్టన్ సుందర్ (2), శశాంక్ సింగ్ (15) భారీ షాట్లు ఆడలేకపోయారు. ఎయిడెన్ మార్క్రమ్ (17),, నికోలస్ పూరన్ (64 నాటౌట్) పోరాడినా ఫలితం లేకపోయింది.

ఈ క్రమంలో విజయానికి 14 పరుగుల దూరంలో సన్‌రైజర్స్ నిలిచిపోయింది. నిర్ణీత 20 ఓవర్లు ముగిసే సరికి 6 వికెట్ల నష్టానికి 189 పరుగులు మాత్రమే చేయగలిగింది. దీంతో చెన్నై పగ్గాలు మళ్లీ అందుకున్న ధోనీ.. అభిమానులకు మరోసారి తన మార్కు విజయాన్ని రుచిచూపించినట్లయింది.