Visit:
క్యాష్ రిచ్ లీగ్‌ ఐపీఎల్‌లో గతేడాది అత్యంత పేలవ ప్రదర్శనతో వెనుకబడిన సన్‌రైజర్స్ హైదరాబాద్‌ (ఎస్‌ఆర్‌హెచ్‌) జట్టు.. ఈసారి అలాంటి ప్రదర్శన రిపీట్ కాకుండా ఉండేందుకు గట్టిగా ప్రయత్నిస్తోంది. దిగ్గజ ఆటగాళ్లను జట్టు కోచింగ్‌ సిబ్బందిగా నియమించింది. ఈ క్రమంలోనే గత సీజన్‌లో జట్టు డైరెక్టర్‌ ఆఫ్ క్రికెట్‌గా ఉన్న టామ్ మూడీని హెడ్‌ కోచ్‌గా నియమించింది.
గతంలో ఏడు సీజన్లపాటు ఎస్ఆర్‌హెచ్‌కు కోచ్‌గా మూడీ ఉన్నాడు. ఈయన హయాంలోనే 2016లో సన్‌రైజర్స్ తొలిసారి ఐపీఎల్‌ ట్రోఫీ గెలిచింది. వీరితోపాటు మాజీ ఆస్ట్రేలియా బ్యాట్స్‌మెన్‌, గత ఐపీఎల్‌ తొలి ఫేజ్‌లో బెంగళూరు జట్టు కోచ్‌గా సేవలందించిన సైమన్ కాటిచ్‌ను అసిస్టెంట్‌ కోచ్‌గా నియమించింది.
అంతేకాదు, వెస్టిండీస్ దిగ్గజం బ్రయాన్‌ లారాను బ్యాటింగ్‌ కోచ్‌గా, శ్రీలంక స్పిన్ మాంత్రికుడు ముత్తయ్య మురళీధరన్‌ను స్పిన్ బౌలింగ్‌ కోచ్‌గా, దక్షిణాఫ్రికా మాజీ పేసర్ డేల్ స్టెయిన్‌ను పేస్‌ బౌలింగ్‌ కోచ్‌గా నియమించినట్లు వెల్లడించింది. జట్టు ఫీల్డింగ్‌ కోచ్‌ మరియు స్కౌట్‌గా భారత మాజీ ఆటగాడు హేమంగ్‌ బదాని నియమితులైనట్లు తెలపిపింది. ఈ వివరాలను వెల్లడిస్తూ ట్విట్టర్‌లో ఒక వీడియోను కూడా షేర్ చేసింది.
