Visit:
పాతికేండ్లు కూడా నిండని నూనూగు మీసాల కుర్రాడు.. ఐపీఎల్‌ రికార్డులు బద్దలు కొట్టాడు. స్టేడియంలో అటు బంతితో ఇటు బ్యాట్‌తో ప్రత్యర్థుల పాలిట సింహస్వప్నంలా నిలిచే ఇంగ్లండ్‌ ఆల్‌రౌండర్‌ సామ్‌ కరన్‌.. ఐపీఎల్‌ చరిత్రలోనే అత్యధిక ధర పలికిన ఆటగాడిగా నిలిచాడు. ఫ్రాంచైజీలన్నీ అతడిని దక్కించుకునేందుకు పోటీ పడగా.. చివరకు పంజాబ్‌ కింగ్స్‌ రూ.18.50 కోట్లు పెట్టి కరన్‌ను కైవసం చేసుకుంది. ఆస్ట్రేలియా నయా సంచలనం కామెరూన్‌ గ్రీన్‌ను రూ.17.50 కోట్లకు ముంబై ఇండియన్స్‌ చేజిక్కించుకుంటే.. ఇంగ్లండ్‌ టెస్టు కెప్టెన్‌ బెన్‌ స్టోక్స్‌ కోసం చెన్నై సూపర్‌ కింగ్స్‌ రూ.16.25 కోట్లు వెచ్చించింది. మరోసారి తన ఎంపికలతో ఆశ్చర్యపరిచిన సన్‌రైజర్స్‌ యాజమాన్యం రూ.13.25 కోట్లు పెట్టి ఇంగ్లండ్‌ బ్యాటర్‌ బ్రూక్‌తో పాటు 8.25 కోట్లతో మయాంక్‌ను కొనుగోలు చేసుకుంది.
కొచ్చి: ఐపీఎల్‌ రికార్డులు తిరగరాస్తూ.. ఇంగ్లండ్‌ ఆల్‌రౌండర్‌ సామ్‌ కరన్‌ నయా చరిత్ర సృష్టించాడు. మైదానంలో తన సంచలన ప్రదర్శనతో ప్రత్యర్థులకు గడగడలాడించే ఈ చిన్నోడు.. ఇండియన్‌ ప్రీమియర్‌ లీగ్‌ మినీ వేలంలో రికార్డు ధర సొంతం చేసుకున్నాడు. శుక్రవారం కొచ్చి వేదికగా జరిగిన వేలంలో పంజాబ్‌ కింగ్స్‌ రూ.18.50 కోట్లు పెట్టి కరన్‌ను సొంతం చేసుకుంది. గతంలో క్రిస్‌ మోరిస్‌ (16.25 కోట్లు) కోసం రాజస్థాన్‌ అత్యధిక ధర చెల్లించగా.. తాజా వేలంలో ముగ్గురు ఆటగాళ్లు ఆ మార్క్‌ను దాటడం విశేషం. ఆసీస్‌ వేదికగా జరిగిన టీ20 ప్రపంచకప్‌లో ‘మ్యాన్‌ ఆఫ్‌ ది సిరీస్‌’ అవార్డు దక్కించుకున్న 24 ఏండ్ల కరన్‌ కోసం ఆరు జట్లు పోటీపడ్డాయి.
ముంబై, బెంగళూరు, రాజస్థాన్‌, చెన్నై, లక్నో, పంజాబ్‌ ఒకరిని మించి ఒకరు ధర పెంచుతూ పోవడంతో కరన్‌కు అనూహ్య రేట్‌ దక్కింది. 2019 సీజన్‌లో పంజాబ్‌ తరఫునే ఆడిన కరన్‌.. గత సీజన్‌లో చెన్నైకి ప్రాతినిధ్యం వహించాడు. ఇక ఆస్ట్రేలియా నయా సంచలనం కామెరూన్‌ గ్రీన్‌ కోసం ముంబై ఇండియన్స్‌ రూ.17.50 కోట్లు వెచ్చించగా.. ఇంగ్లండ్‌ టెస్టు కెప్టెన్‌ బెన్‌ స్టోక్స్‌ను రూ.16.25 కోట్లకు చెన్నై సూపర్‌ కింగ్స్‌ కొనుగోలు చేసుకుంది. ఇప్పటి వరకు జట్టుకు కెప్టెన్‌గా వ్యవహరించిన కేన్‌ విలియమ్సన్‌ను వేలానికి వదిలేసిన సన్‌రైజర్స్‌ హైదరాబాద్‌ ఇంగ్లండ్‌ యువ ఆటగాడు హ్యరీ బ్రూక్‌ కోసం రూ.13.25 కోట్లు వెచ్చించింది. పాకిస్థాన్‌తో టెస్టు సిరీస్‌లో మూడు శతకాలతో అదరగొట్టిన బ్రూక్‌పై హైదరాబాద్‌ భారీ ఆశలు పెట్టుకుంది. ఐపీఎల్‌ వేలం చరిత్రలో సన్‌రైజర్స్‌ హైదరాబాద్‌ ఒక ఆటగాడి కోసం వెచ్చించిన అత్యధిక మొత్తం ఇదే కావడం విశేషం. మయాంక్‌ అగర్వాల్‌ (రూ.8.25 కోట్లు)ను కూడా సన్‌రైజర్స్‌ కొనుగోలు చేసుకుంది. అనామక ఆటగాడు వివ్రాంత్‌ శర్మ కోసం హైదరాబాద్‌ రూ. 2.60 కోట్లు వెచ్చించడం గమనార్హం.
‘వేలానికి ముందు రోజు అసలు నిద్రే పట్టలేదు. ఉత్సాహంతో పాటు కాస్త ఆందోళనగా అనిపించింది. అయితే వేలంలో దక్కిన దానికి చాలా ఆనందంగా ఉంది. నా కోసం ఇంత మొత్తం వెచ్చిస్తారని ఎప్పడూ అనుకోలేదు. నాలుగేండ్ల క్రితం ఐపీఎల్‌ అరంగేట్రం చేసిన పంజాబ్‌ జట్టు తరఫున తిరిగి ఆడనుండటం సంతోషంగాఉంది’
– సామ్‌ కరన్‌
