కింగ్స్‌ కమాల్‌.. కోల్‌కతాపై సంచలన విజయం..

బ్యాటర్ల మెరుపులు, భారీ స్కోర్ల మ్యాచ్‌ల మధ్య సాగుతున్న ఐపీఎల్‌లో మంగళవారం లోస్కోరింగ్‌ థ్రిల్లర్‌ అభిమానులను ఊపేసింది. బంతి గింగిరాలు తిరిగిన ముల్లాన్‌పూర్‌ పిచ్‌పై పంజాబ్‌ కింగ్స్‌, కోల్‌కతా నైట్‌ రైడర్స్‌ (కేకేఆర్‌) మధ్య జరిగిన ఉత్కంఠ పోరులో పంజాబ్‌దే పైచేయి అయింది.

• చాహల్‌, యాన్సెన్‌ విజృంభణ
• 112 లక్ష్యఛేదనలో కేకేఆర్‌ 95 ఆలౌట్‌

120 బంతుల్లో 112 పరుగులు. ఛేదనలో కోల్‌కతా లక్ష్యమిది! 7.2 ఓవర్లలో 62/2తో లక్ష్యం దిశగా సాఫీగా సాగిన నైట్‌రైడర్స్‌ ఇన్నింగ్స్‌లో ఒక్కసారిగా పెను అలజడి. మణికట్టు మాంత్రికుడు చాహల్‌ మాయతో ఆ జట్టు.. 22 పరుగుల తేడాతో ఆరు కీలక వికెట్లు కోల్పోయి 13 ఓవర్లకు 79/8గా నిలిచింది. అంతే.. గేమ్‌ ఆన్‌! సుదీర్ఘకాలంగా ఐపీఎల్‌ ఆడుతున్న విండీస్‌ యోధుడు రస్సెల్‌ క్రీజులో ఉండటంతో కోల్‌కతా ఆశలు కోల్పోలేదు. కానీ పంజాబ్‌ మాత్రం పట్టు విడవకుండా యత్నించి డిఫెండింగ్‌ చాంపియన్స్‌పై సంచలన విజయాన్ని నమోదు చేసింది. ఐపీఎల్‌లో ఇదే కోల్‌కతాపై అత్యధిక పరుగుల లక్ష్యాన్ని ఛేధించిన పంజాబ్‌ స్వల్పస్కోరును కూడా కాపాడుకుని ఔరా అనిపించుకుంది.

ముల్లాన్‌పూర్‌ (చండీగఢ్‌): బ్యాటర్ల మెరుపులు, భారీ స్కోర్ల మ్యాచ్‌ల మధ్య సాగుతున్న ఐపీఎల్‌లో మంగళవారం లోస్కోరింగ్‌ థ్రిల్లర్‌ అభిమానులను ఊపేసింది. బంతి గింగిరాలు తిరిగిన ముల్లాన్‌పూర్‌ పిచ్‌పై పంజాబ్‌ కింగ్స్‌, కోల్‌కతా నైట్‌ రైడర్స్‌ (కేకేఆర్‌) మధ్య జరిగిన ఉత్కంఠ పోరులో పంజాబ్‌దే పైచేయి అయింది. ఇరు జట్ల స్పిన్నర్లు వికెట్ల పండుగ చేసుకున్న పోరులో.. కింగ్స్‌ నిర్దేశించిన 112 పరుగుల స్వల్ప ఛేదనలో కేకేఆర్‌ 15.1 ఓవర్లలో 95 పరుగులకే చేతులెత్తేయడంతో పంజాబ్‌ 16 పరుగుల తేడాతో గెలిచింది.

రఘువంశీ (28 బంతుల్లో 37, 5 ఫోర్లు, 1 సిక్స్‌), ఆండ్రీ రస్సెల్‌ (17) పోరాడారు. పంజాబ్‌ స్పిన్నర్లలో యుజ్వేంద్ర చాహల్‌ (4/28), యాన్సెన్‌ (3/17) కేకేఆర్‌ను దెబ్బతీశారు. మొదట బ్యాటింగ్‌ చేసిన పంజాబ్‌.. ప్రత్యర్థి బౌలర్ల ధాటికి 15.3 ఓవర్లలో 111 పరుగులకే కుప్పకూలింది. ప్రభ్‌సిమ్రన్‌ (15 బంతుల్లో 30, 2 ఫోర్లు, 3 సిక్సర్లు) టాప్‌ స్కోరర్‌. హర్షిత్‌ రాణా (3/25) ఆరంభంలోనే కింగ్స్‌ను దెబ్బతీయగా మిస్టరీ స్పిన్నర్లు సునీల్‌ నరైన్‌ (2/14), వరుణ్‌ చక్రవర్తి (2/21) కలిసి మిడిల్‌, లోయరార్డర్‌ పనిపట్టారు.

క్యూ కట్టారు..

మొదట టాస్‌ గెలిచి బ్యాటింగ్‌ ఎంచుకున్న పంజాబ్‌కు ఓపెనర్లు ప్రభ్‌సిమ్రన్‌, ప్రియాన్ష్‌ (12 బంతుల్లో 22, 3 ఫోర్లు, 1 సిక్సర్‌) దూకుడుగానే ఇన్నింగ్స్‌ను ప్రారంభించినా ఈ ద్వయం నిష్క్రమించిన తర్వాత ఒక్కరంటే ఒక్కరూ క్రీజులో నిలవలేకపోయారు. నోకియా రెండో ఓవర్లో ఆర్య.. రెండు బౌండరీలు కొట్టగా వైభవ్‌ మూడో ఓవర్లో ప్రభ్‌సిమ్రన్‌.. 4, 6, 4, 4తో 20 పరుగులు రాబట్టాడు. పంజాబ్‌ ఇన్నింగ్స్‌లో ఇవే తొలి, ఆఖరి మెరుపులు. 4వ ఓవర్లో బౌలింగ్‌ మార్పుగా వచ్చిన హర్షిత్‌.. ఒకే ఓవర్లో ప్రియాన్ష్‌తో పాటు శ్రేయాస్‌ (0)నూ ఔట్‌ చేసి ఆతిథ్య జట్టుకు భారీ షాకిచ్చాడు.

ఆ మరుసటి ఓవర్లోనే బంతినందుకున్న వరుణ్‌.. జోష్‌ ఇంగ్లిష్‌ (2)ను క్లీన్‌బౌల్డ్‌ చేయడంతో పంజాబ్‌ కష్టాలు రెట్టింపయ్యాయి. హర్షిత్‌ బౌలింగ్‌లో రెండు భారీ సిక్సర్లతో అలరించిన ప్రభ్‌సిమ్రన్‌ కూడా.. అదే ఓవర్లో ఆఖరి బంతికి బ్యాక్‌వర్డ్‌ పాయింట్‌లో రమణ్‌దీప్‌ సింగ్‌ క్యాచ్‌తో పెవిలియన్‌ చేరాడు. అక్కడ్నుంచి పంజాబ్‌ ఇన్నింగ్స్‌ కోలుకోలేదు. నోకియా 9వ ఓవర్లో నెహాల్‌ వధేర (10) రెండు బౌండరీలు బాదినా నాలుగో బంతికి ఔట్‌ అయ్యాడు. ఇక ఈ సీజన్‌లో అత్యంత చెత్తగా ఆడుతున్న గ్లెన్‌ మ్యాక్స్‌వెల్‌ (7) మరోసారి తన వైఫల్య ప్రదర్శనను కొనసాగిస్తూ.. వరుణ్‌ బౌలింగ్‌లో క్లీన్‌బౌల్డ్‌ అయ్యాడు. సుయాన్ష్‌ (4), యాన్సెన్‌ (1)ను నరైన్‌ ఒకే ఓవర్లో పెవిలియన్‌కు పంపాడు. పంజాబ్‌ భారీ ఆశలు పెట్టుకున్న శశాంక్‌ సింగ్‌ (18)ను 16వ ఓవర్లో అరోరా ఎల్బీగా వెనక్కిపంపగా అదే ఓవర్లో బార్ట్‌లెట్‌ (11) రనౌట్‌ అవడంతో కింగ్స్‌ ఇన్నింగ్స్‌కు తెరపడింది.

రఘువంశీ ఎదురుదాడి

స్వల్ప ఛేదనలో కేకేఆర్‌ కూడా 7 పరుగులకే ఓపెనర్లను కోల్పోవడంతో పంజాబ్‌లో ఆశలు రేగాయి. యాన్సెన్‌ తొలి ఓవర్లోనే నరైన్‌ (4)ను బౌల్డ్‌ చేయగా ఐపీఎల్‌లో తొలి మ్యాచ్‌ ఆడుతున్న బార్ట్‌లెట్‌.. రెండో బంతికే డికాక్‌ (2)ను ఔట్‌ చేసి కోల్‌కతాకు షాకిచ్చాడు. కానీ ఇంప్యాక్ట్‌ ప్లేయర్‌గా క్రీజులోకి వచ్చిన రఘువంశీ.. కెప్టెన్‌ రహానేతో కలిసి కోల్‌కతాను ఆదుకున్నాడు. ఎదుర్కున్న తొలి బంతినే బౌండరీగా మలిచిన అతడు.. కింగ్స్‌ బౌలర్లపై ఎదురుదాడికి దిగాడు. యాన్సెన్‌ బౌలింగ్‌లో రెండు బౌండరీలు కొట్టిన రఘువంశీ.. బార్ట్‌లెట్‌ ఆరో ఓవర్లో 6, 4తో రెచ్చిపోయాడు.

చాహల్‌ మాయ..

ఈ సీజన్‌లో స్థాయికి తగ్గ ప్రదర్శన చేయలేకపోతున్న చాహల్‌.. కీలక సమయంలో సత్తా చాటాడు. వరుస ఓవర్లలో అతడిచ్చిన షాకులకు కోల్‌కతాకు కుదేలైంది. తన తొలి ఓవర్లోనే అతడు.. రహానేను వికెట్ల ముందు బలిగొని 55 పరుగుల రెండో వికెట్‌ భాగస్వామ్యానికి తెరదించాడు. మరుసటి ఓవర్లో రఘువంశీనీ ఔట్‌ చేసిన చాహల్‌.. 12వ ఓవర్లో ప్రమాదకర రింకూ సింగ్‌ (2)తో పాటు రమణ్‌దీప్‌నూ పెవిలియన్‌కు పంపడంతో వన్‌సైడ్‌ వార్‌ అనుకున్న మ్యాచ్‌ కాస్తా ఉత్కంఠగా మారింది. యాన్సెన్‌ కూడా 13వ ఓవర్లో హర్షిత్‌ (3)ను బౌల్డ్‌ చేయగా అర్ష్‌దీప్‌.. వైభవ్‌ను పెవిలియన్‌కు పంపడంతో కేకేఆర్‌ 9వ వికెట్‌ కోల్పోయింది. యాన్సెన్‌.. 16వ ఓవర్లో తొలి బంతికి రస్సెల్‌ను క్లీన్‌బౌల్డ్‌ చేసి పంజాబ్‌కు చిరస్మరణీయ విజయాన్ని అందించాడు.

1 ఐపీఎల్‌లో ఒక జట్టు అత్యల్ప స్కోరును కాపాడుకోవడం ఇదే ప్రథమం. గతంలో చెన్నై (116) పంజాబ్‌తో మ్యాచ్‌లో ఈ లక్ష్యాన్ని కాపాడుకుంది.

ఐపీఎల్‌లో ఒక జట్టుపై అత్యధిక వికెట్లు తీసిన బౌలర్లలో నరైన్‌ (పంజాబ్‌పై 36 వికెట్లు) అందరి కంటే ముందున్నాడు. గతంలో ఈ రికార్డు ఉమేశ్‌ యాదవ్‌ (పంజాబ్‌ పైనే 35 వికెట్లు) ఉంది.

4 ఐపీఎల్‌లో పంజాబ్‌కు ఇది నాలుగో అత్యల్ప స్కోరు కాగా కేకేఆర్‌పై ఆలౌట్‌ అవడం ఇది రెండోసారి.

సంక్షిప్త స్కోర్లు

పంజాబ్‌: 15.3 ఓవర్లలో 111 ఆలౌట్‌ (ప్రభ్‌సిమ్రన్‌ 30, ప్రియాన్ష్‌ 22, హర్షిత్‌ 3/25, నరైన్‌ 2/14);
కోల్‌కతా: 15.1 ఓవర్లలో 95 ఆలౌట్‌ (రఘువంశీ 37, రస్సెల్‌ 17, చాహల్‌ 4/28, యాన్సెన్‌ 3/17)