Pakistan Cricket Crisis: వన్డే వరల్డ్ కప్లో పాకిస్తాన్ ఘోర వైఫల్యం ఆ జట్టును సంక్షోభంలోకి నెట్టింది. రెండు నెలల క్రితం వన్డేలలో నెంబర్ వన్ టీమ్గా ఉన్న జట్టు లీగ్ దశ కూడా దాటకుండా ఇంటిముఖం పట్టడాన్ని పాకిస్తాన్ క్రికెట్ బోర్డు (పీసీబీ) సీరియస్గా తీసుకుంది. కొద్దిరోజుల క్రితమే సెలక్షన్ కమిటీ ఛైర్మన్ ఇంజమామ్ ఉల్ హక్కు అవినీతి ఆరోపణలు అంటగట్టి సాగనంపిన పీసీబీ.. తాజాగా మొత్తం సెలక్షన్ కమిటీపైనే వేటు వేసింది.
మంగళవారం లాహోర్లోని పాకిస్తాన్ క్రికెట్ బోర్డు కార్యాలయంలో సమావేశమైన పీసీబీ సభ్యులు.. సెలక్షన్ కమిటీని రద్దు చేశారు. కొత్త సెలక్షన్ కమిటీపై పీసీబీ ఎటువంటి ప్రకటనా చేయలేదు. దీంతోపాటు పాకిస్తాన్ జట్టుకు కోచ్లుగా పనిచేస్తున్న ఫారెన్ కోచింగ్ స్టాఫ్ మొత్తానికి ఉద్వాసన చెప్పనున్నట్టు పాకిస్తాన్కు చెందిన సామా టీవీ పేర్కొంది.
ఫారెన్ కోచ్లకూ..
ప్రస్తుతం పాకిస్తాన్ టీమ్ హెడ్కోచ్గా గ్రాంట్ బ్రాడ్బర్న్ విధులు నిర్వర్తిస్తుండగా మికీ ఆర్థర్ టీమ్ డైరెక్టర్గా ఉన్నాడు. ఆండ్రూ పుటిక్ బ్యాటింగ్ కోచ్గా సేవలందిస్తున్నాడు. బౌలింగ్ కోచ్గా ఉన్న మోర్నీ మోర్కెల్.. సోమవారమే తన పదవికి రాజీనామా చేశాడు. మిగిలినవారిని కూడా పూర్తిగా తొలిగించి పూర్తిగా పాకిస్తాన్కు చెందిన కోచ్లనే నియమించాలని పీసీబీ నిర్ణయం తీసుకున్నట్టు తెలుస్తున్నది. బౌలింగ్ కోచ్గా మోర్నీ మోర్కెల్ స్థానంలో మాజీ పేసర్ ఉమర్ గుల్ను తీసుకోనున్నట్టు సమాచారం. అయితే దీనిపై ఉమర్ గుల్ మాత్రం ఇప్పటివరకూ తనను ఎవరూ సంప్రదించలేదని అలాంటి అవకాశమే వస్తే అది తనకు దక్కిన గౌరవంగా భావిస్తానని చెప్పుకొచ్చాడు.
Pakistan cricket in the last 2 weeks:
– Inzamam Ul Haq resigns as Pakistan chief selector.
– Pakistan knocked out in the group stage of World Cup 2023.
– Morne Morkel resigns as Pakistan bowling coach.
– PCB fired the entire selection committee. pic.twitter.com/aTJ1tEJOZ2
— Johns. (@CricCrazyJohns) November 14, 2023
కెప్టెన్ మార్పు..?
సెలక్షన్ కమిటీతో పాటు ఫారెన్ కోచింగ్ సిబ్బందిని కూడా వదులుకుంటున్న పీసీబీ.. కెప్టెన్ బాబర్ ఆజమ్పై కూడా వేటు వేయనుందని తెలుస్తున్నది. వరల్డ్ కప్లో వరుసగా నాలుగు మ్యాచ్లలో ఓడినప్పుడే సారథి మార్పు తప్పదని పీసీబీ హింట్ ఇచ్చింది. ఇప్పుడు దానిని నిజం చేయబోతున్నట్టు సమాచారం. బాబర్ స్థానంలో యువ పేసర్ షహీన్ షా అఫ్రిదిని సారథిగా నియమించనున్నట్టు తెలుస్తున్నది. అన్ని ఫార్మాట్లలో కాకున్నా పరిమిత ఓవర్ల క్రికెట్ లో అయినా సారథ్య బాధ్యతలు అయినా షహీన్కు అప్పజెప్పుతారని వార్తలు వస్తున్నాయి. దీనిపై త్వరలోనే స్పష్టత రానున్నది.