T20 WC Prize money : దక్షిణాఫ్రికా ఆతిథ్యం ఇచ్చిన మహిళల టీ20 వరల్డ్ కప్ 2023 ఛాంపియన్గా ఆస్ట్రేలియా అవతరించింది. రెండోసారి వరుసగా మూడుసార్లు పొట్టి ప్రపంచకప్ గెలిచిన మొదటి జట్టుగా రికార్డు సృష్టించింది. విజేతగా నిలిచిన ఆసీస్కు దక్కిన ప్రైజ్ మనీ ఎంతో తెలుసా.. దాదాపు ఒక మిలియన్ డాలర్లు. అంటే.. రూ. 8.3 కోట్లు. రన్నరప్గా నిలిచిన దక్షిణాఫ్రికా రూ. 4.13 కోట్లు గెలుచుకుంది.
అయితే.. పురుషుల టీ20 ఛాంపియన్ ఇంగ్లండ్తో పోల్చితే ఆస్ట్రేలియాకు రూ.5 కోట్లు తక్కువ ప్రైజ్మనీ లభించింది. ఈ టోర్నమెంట్లో సెమీఫైనల్కు చేరిన నాలుగు జట్లకు రూ.1.73 కోట్లు ఇస్తారు. ఇంగ్లండ్, భారత మహిళల జట్టుకు తలా 1.73 కోట్ల రూపాయిలు అందుతాయి.
పోయిన ఏడాది ఆస్ట్రేలియాలో జరిగిన పురుషుల టీ20 వరల్డ్కప్లో ఇంగ్లండ్ విజేతగా నిలిచింది. దాంతో, ఆ జట్టు రూ. 13.25 కోట్ల ప్రైజ్మనీ దక్కించుకుంది. రెండో స్థానంలో ఉన్న పాకిస్థాన్కు 8 లక్షల డాలర్లు ( రూ. 6.6 కోట్లు) బహుమతిగా లభించాయి. సెమీఫైనల్ చేరిన భారత్, న్యూజిలాండ్ జట్లకు రూ.3.25 కోట్లను ఐసీసీ ముట్టజెప్పింది. మెల్బోర్న్లో జరిగిన ఫైనల్లో జోస్ బట్లర్ సారథ్యంలోని ఇంగ్లండ్ 5 వికెట్ల తేడాతో పాకిస్థాన్పై గెలుపొందింది.
కేప్టౌన్లోని న్యూలాండ్స్లో ఆదివారం జరిగిన మహిళల టీ20 వరల్డ్ కప్ ఫైనల్లో ఆస్ట్రేలియా 19 పరుగుల తేడాతో దక్షిణాఫ్రికాపై గెలిచింది. దాంతో, ఆ జట్టు ఆరోసారి సగర్వంగా పొట్టి ప్రపంచకప్ను ముద్దాడింది. అత్యధిక ఐసీసీ ట్రోఫీలు నెగ్గిన తొలి కెప్టెన్గా ఆ జట్టు కెప్టెన్ మేగ్ లానింగ్ చరిత్ర సృష్టించింది. లానింగ్ కెప్టెన్సీలో ఆసీస్ మహిళల జట్టు ఐదు సార్లు జగజ్జేతగా నిలిచింది. ఆస్ట్రేలియా మహిళల జట్టు 2014, 2018, 2020, 2023లో పొట్టి ప్రపంచకప్, 2023లో వన్డే వరల్డ్ కప్ గెలిచింది. అంతేకాదు 2022 కామన్వెల్త్ గేమ్స్లో కూడా ఛాంపియన్గా అవతరించింది.
మొదట బ్యాటింగ్ చేసిన ఆసీస్ 20 ఓవర్లలో 156 రన్స్ చేసింది. ఆ జట్టులో బేత్ మూనీ హాఫ్ సెంచరీ (74 నాటౌట్)తో రాణించింది. ఛేజింగ్లో సఫారీ జట్టు 6 వికెట్ల నష్టానికి 137 పరుగులకే పరిమితమైంది. లారా వాల్వార్ట్ ఫిఫ్టీ (61) బాదినా ఆసీస్ బౌలర్లు వెంట వెంటనే వికెట్లు తీసి ఒత్తిడిలోకి నెట్టారు. దాంతో, సఫారీ జట్టు ఏమాత్రం కోలుకోలేకపోయింది.