ODI World Cup | భారత్ వేదికగా జరుగుతున్న ప్రతిష్టాత్మక ఐసీసీ వన్డే ప్రపంచకప్ 2023 (ODI World Cup ) టోర్నీలో పాకిస్థాన్ (Pakistan ) జట్టు వరుసగా మూడో పరాజయాన్ని మూటగట్టుకుంది. ఇండియాతో మ్యాచ్ తర్వాత ఆస్ట్రేలియా చేతుల్లో ఓడిన పాక్, తాజాగా చెన్నైలో పసికూన ఆఫ్ఘనిస్థాన్ (Afghanistan) చేతుల్లో చిత్తుగా ఓడి పరువు పోగొట్టుకుంది. ఈ ఘోర పరాజయంతో సెమీస్ అవకాశాలనూ సంక్లిష్టం చేసుకుంది. ఇక పసికూన చేతిలో ఇది పాక్కు ఘోర పరాభవమనే చెప్పాలి. బౌలింగ్, ఫీల్డింగ్, బ్యాటింగ్ అన్ని విభాగాల్లోనూ పాక్ ఆటగాళ్లు నిరాశపరిచారు. ఆటగాళ్లలో కనీస ఫిట్నెస్ స్థాయిలు కూడా లేకపోవడం అభిమానుల్ని, పాక్ మాజీ ఆటగాళ్లనూ తీవ్ర నిరాశపరుస్తోంది. కీలక సమయంలో పరాజయం కావడంతో వారంతో ఆగ్రహంతో ఉన్నారు. ఈ క్రమంలో బాబర్ అజామ్ జట్టుపై పాకిస్థాన్ మాజీ కెప్టెన్ వసీం అక్రమ్ (Wasim Akram) తీవ్ర స్థాయిలో విరుచుకుపడ్డారు.
‘ఇది చాలా అవమానకరం. కేవలం రెండు వికెట్లు.. 280-290 పెద్ద స్కోరేమీ కాదు. పిచ్ సంగతి పక్కన పెడితే పాక్ ఆటగాళ్ల ఫీల్డింగ్ చూస్తేనే తెలిసిపోతుంది.. వాళ్ల ఫిట్నెస్ లెవెల్స్ ఎలా ఉన్నాయో. గత రెండు సంవత్సరాలుగా క్రీడాకారుల్లో ఫిట్నెస్ లెవల్స్ తగ్గినట్లు మ్యాచ్ సందర్భంగా మేము చాలాసార్లు చర్చించుకున్నాము. నేను ఆటగాళ్ల పేర్లు ప్రస్తావిస్తే వ్యక్తిగతంగా వారికి నచ్చదు. వాళ్లు రోజుకు 8 కిలోల చొప్పున మటన్ తింటున్నట్టు (Eating 8 kg mutton every day) ఉంది’ అంటూ తీవ్ర వ్యాఖ్యలు చేశారు. వృత్తిపరంగా వాళ్లు దేశం కోసం ఆడుతున్నారని.. ఇందుకోసం పారితోషికం కూడా తీసుకుంటున్నారు అంటూ విరుచుకుపడ్డారు. వసీం వ్యాఖ్యలు ప్రస్తుతం తెగ వైరల్ అవుతున్నాయి.
కాగా, సోమవారం చెన్నై వేదికగా జరిగిన మ్యాచ్లో తొలుత బ్యాటింగ్ చేసిన పాకిస్థాన్ నిర్ణీత 50 ఓవర్లలో 7 వికెట్ల నష్టానికి 282 పరుగులు చేసింది. అనంతరం 283 పరుగుల విజయ లక్ష్యంతో బరిలోకి దిగిన ఆఫ్ఘనిస్థాన్.. పాక్ స్పిన్, పేస్ బౌలింగ్ను ఎదుర్కొని ఎనిమిది వికెట్ల తేడాతో విజయం సాధించింది. ఒక ఓవర్ మిగిలి ఉండగానే రెండు వికెట్లు కోల్పోయి 286 పరుగులు చేసింది. 49వ ఓవర్లో షాహిన్ షా అఫ్రిది వేసిన చివరి బంతిని హస్మతుల్లా బ్యాక్ వర్డ్ స్క్వేర్ లెగ్ మీదుగా బౌండరీకి పంపి విన్నింగ్ షాట్ కొట్టారు. తొలుత పాకిస్థాన్ భారీగానే పరుగులు చేసినా.. తదుపరి బ్యాటింగ్ కు వచ్చిన ఆఫ్ఘనిస్థాన్ ను కట్టడి చేయడంలో పాక్ బౌలర్లు విఫలం అయ్యారు.
Also Read..
ODI World Cup | పాక్పై 8 వికెట్ల తేడాతో ఆఫ్ఘన్ విజయం