IND vs SA 1st Test: భారత్ – దక్షిణాఫ్రికా మధ్య సెంచూరియన్ వేదికగా జరుగుతున్న తొలి టెస్టులో అరంగేట్రం చేసిన సఫారీ పేసర్ నండ్రె బర్గర్ మొదటి మ్యాచ్లోనే ఆకట్టుకున్నాడు. భారత్ తొలి ఇన్నింగ్స్లో భాగంగా మొదటి రోజు 15 ఓవర్లు బౌలింగ్ చేసిన బర్గర్.. నాలుగు మెయిడిన్లు చేసి 50 పరుగులు మాత్రమే ఇచ్చి రెండు కీలక వికెట్లు పడగొట్టాడు. తొలి రోజు అతడి బౌలింగ్ చూశాక ఇంగ్లండ్ దిగ్గజ క్రికెటర్ కెవిన్ పీటర్సన్.. బర్గర్పై ఆసక్తికర కామెంట్స్ చేశాడు. బర్గర్ ఎక్కువగా నవ్వకుండా ఉంటే అది అతడికే మంచిదని కీలక సూచన చేశాడు.
బర్గర్ తొలి రోజు రెండు వికెట్లు పడగొట్టిన తర్వాత ఎక్స్ (ట్విటర్) వేదికగా పీటర్సన్ స్పందిస్తూ.. ‘నాకు నండ్రె బర్గర్ బౌలింగ్ చాలా బాగా నచ్చింది. అతడి పేస్ చాలా బాగుంది. కానీ అతడు నవ్వకుండా ఉండి బ్యాటర్లపై మరింత అగ్రెసివ్గా ఉంటే నేను అతడిని ఎక్కువ ఇష్టపడతా. బౌలింగ్ వేసిన తర్వాత బ్యాటర్ల వైపు చూసి నవ్వడం వల్ల బ్యాటర్లు తాము విజయం సాధించినట్టు అవుతుంది. వేగంగా బౌల్ చేయి, కావాలంటే ఇంకా వేగం పెంచుకో కానీ బాల్ వేసిన ప్రతీసారి నవ్వకు…’ అని ట్వీట్ చేశాడు.
I like Nandre Burger. I like his pace a lot. The only thing I’d like even more, is if he didn’t smile as much and got more aggressive!
Smiling at batters gives them a small win every single time.
Bowl fast, seriously fast and DO NOT smile after most deliveries!— Kevin Pietersen🦏 (@KP24) December 26, 2023
మ్యాచ్ విషయానికొస్తే.. రోహిత్ శర్మ (5)ను రబాడా ఔట్ చేసిన తర్వాత బర్గర్ భారత్కు తన వరుస ఓవర్లలో డబుల్ షాకులిచ్చాడు. అతడు వేసిన పదో ఓవర్లో నాలుగో బంతికి ఓపెనర్ యశస్వి జైస్వాల్ (17) ఔటవగా.. 12వ ఓవర్లో ఫస్ట్ బాల్కే శుభ్మన్ గిల్ (2) కూడా నిష్క్రమించాడు. ఈ మ్యాచ్లో కగిసొ రబాడా ఐదు వికెట్లు పడగొట్టడంతో భారత్ తొలి రోజు ఆట ముగిసేసమయానికి 8 వికెట్ల నష్టానికి 208 పరుగులు చేసింది. కెఎల్ రాహుల్ (105 బంతుల్లో 70 నాటౌట్, 4 ఫోర్లు) అర్థ సెంచరీతో ఆదుకున్నాడు.