న్యూయార్క్: అమెరికా యువ సంచనలం కోకో గాఫ్ తొలి గ్రాండ్స్లామ్ ట్రోఫీని ముద్దాడింది. కెరీర్ ఆరంభంలోనే టెన్నిస్ ప్రపంచాన్ని విస్మయపరిచే విజయాలు ఖాతాలో వేసుకున్న గాఫ్.. సొంతగడ్డపై జరుగుతున్న యూఎస్ ఓపెన్లో దుమ్మురేపింది. ఆదివారం జరిగిన మహిళల సింగిల్స్ ఫైనల్లో 19 ఏండ్ల గాఫ్ 2-6, 6-3, 6-2తో అరియానా సబలెంకను మట్టికరిపించింది. యూఎస్ ఓపెన్లో బరిలోకి దిగడానికి పది నిమిషాల ముందు వరకు సామాజిక మాధ్యమాల్లో బిజీగా ఉన్న ఈ టీనేజర్.. ట్రోఫీ నెగ్గిన అనంతరం వివర్శకులు, ట్రోలర్స్కు ఇదే తన జవాబని గద్గద స్వరంతో ప్రకటించింది. అమెరికా దిగ్గజ ప్లేయర్లు సెరెనా, వీనస్ ఆట చూసేందుకు గతంలో పలుమార్లు యూఎస్ ఓపెన్ మైదానాలకు వచ్చిన గాఫ్..
ఇప్పుడు అదే స్టేడియంలో విజయనాదం చేసింది. తొలి సెట్లో పరాజయం పాలైన గాఫ్ ఆ తర్వాత అద్భుతంగా పుంజుకుంది. రెండు గంటలకు పైగా సాగిన సమరంలో 5 బ్రేక్ పాయింట్లు సాధించిన గాఫ్ 13 విన్నర్స్ కొట్టింది. మరోవైపు 4 ఏస్లు బాదిన సబలెంక.. 46 అనవసర తప్పిదాలతో మూల్యం చెల్లించుకుంది. మ్యాచ్ అనంతరం గాఫ్ మాట్లాడుతూ.. ‘ఈ అనుభూతిని మాటల్లో వర్ణించలేను. ఇది నాకోసం సాధించింది. గతంలో దగ్గరి వరకు వచ్చి ఓడిపోవడంతో చాలా నిరాశ చెందా. ఇప్పుడు స్వప్నం సాకారమైనట్లు అయింది’ అని పేర్కొంది. సెరెనా విలియమ్స్ (1999) తర్వాత ఓ గ్రాండ్స్లామ్ టైటిల్ నెగ్గిన అమెరికా టీనేజర్గా గాఫ్ రికార్డుల్లోకెక్కింది.