మెల్బోర్న్: ఆఫ్ఘనిస్తాన్తో చరిత్రాత్మక టెస్టు క్రికెట్ మ్యాచ్ నిర్వహించేందుకు ఆస్ట్రేలియా సిద్దమైంది. కానీ ఆ మ్యాచ్ ఇప్పుడు సందిగ్ధంలో పడింది. నవంబర్ 27వ తేదీన హోబార్ట్లో నిజానికి ఆస్ట్రేలియా, ఆఫ్ఘనిస్తాన్ మధ్య టెస్ట్ మ్యాచ్ జరగాల్సి ఉంది. అయితే ఆఫ్ఘనిస్తాన్లో కొత్తగా పాలన చేపట్టిన తాలిబన్లు .. మహిళలు క్రికెట్ ఆడరాదు అంటూ ఆదేశాలు ఇచ్చారు. ఈ అంశంపై తాలిబన్ కల్చరల్ నేత అహ్మదుల్లా వాసిక్ మాట్లాడుతూ.. మహిళలు క్రికెట్ ఆడరని, ఇదే కాదు ఏ ఆట కూడా వాళ్లు ఆడబోరన్నారు. మహిళలు క్రికెట్ ఆడాల్సినంత అవసరం లేదన్నారు. క్రికెట్ ఆడుతున్న సమయంలో ముఖం కానీ, శరీరం కానీ బహిర్గతం అవుతుందని, ఇస్లాం ప్రకారం మహిళల్ని ఇలా చూడలేమన్నారు. తాలిబన్ నేత మహిళల క్రికెట్పై కామెంట్ చేసిన నేపథ్యంలో క్రికెట్ ఆస్ట్రేలియా కూడా స్పందించింది. మహిళలకు ఆడే అవకాశం ఇవ్వనప్పుడు.. ఆఫ్ఘనిస్తాన్ పురుషుల జట్టుతోనూ టెస్ట్ మ్యాచ్ ఆడాల్సిన అవసరం లేదని క్రికెట్ ఆస్ట్రేలియా పేర్కొన్నది. మహిళా క్రికెట్కు ఆదరణ పెరగాలని ఆశిస్తున్నామని క్రికెట్ ఆస్ట్రేలియా చెప్పింది. అందరికీ ఆట అన్నదే తమ నినాదం అని, మహిళలను కూడా సమానంగా చూడాలని క్రికెట్ ఆస్ట్రేలియా పేర్కొన్నది. ఒవకేళ తాలిబన్లు మహిళా క్రికెటర్లకు అవకాశం ఇవ్వకుంటే, అప్పుడు మెన్స్ జట్టుతో హోబర్ట్లో జరిగే మ్యాచ్ను రద్దు చేయాల్సి ఉంటుందని ఆస్ట్రేలియా చెప్పింది.