ఫ్రాన్స్‌కు షాకిచ్చిన స్పెయిన్‌.. 12 ఏండ్ల తర్వాత యూరో కప్‌ ఫైనల్‌కు

యూరో కప్‌లో టైటిల్‌ ఫేవరేట్లుగా ఉన్న ఫ్రాన్స్‌కు తొలి సెమీస్‌లో స్పెయిన్‌ ఊహించని షాకిచ్చింది. టోర్నీ ఆరంభం నుంచి అద్భుత ప్రదర్శనతో అసలు ఓటమన్నదే లేకుండా సెమీస్‌ చేరిన స్పెయిన్‌.. 2-1తో ఫ్రాన్స్‌ను చిత్తుచేసి 12 ఏండ్ల (2012లో చివరిసారి) తర్వాత యూరో కప్‌ ఫైనల్‌కు చేరింది.

మునిచ్‌: యూరో కప్‌లో టైటిల్‌ ఫేవరేట్లుగా ఉన్న ఫ్రాన్స్‌కు తొలి సెమీస్‌లో స్పెయిన్‌ ఊహించని షాకిచ్చింది. టోర్నీ ఆరంభం నుంచి అద్భుత ప్రదర్శనతో అసలు ఓటమన్నదే లేకుండా సెమీస్‌ చేరిన స్పెయిన్‌.. 2-1తో ఫ్రాన్స్‌ను చిత్తుచేసి 12 ఏండ్ల (2012లో చివరిసారి) తర్వాత యూరో కప్‌ ఫైనల్‌కు చేరింది. ఆట మొదలయ్యాక 9వ నిమిషంలోనే ఫ్రాన్స్‌ కోలో మువానీ తొలి గోల్‌ కొట్టి ఆ జట్టును ఆధిక్యంలోకి తెచ్చాడు. కానీ స్పెయిన్‌ తరఫున 16 ఏండ్ల కుర్రాడు లమీన్‌ యమాల్‌ 21వ నిమిషంలో గోల్‌ కొట్టి స్కోరు సమం చేశాడు. యమాల్‌ కొట్టిన ఈ గోల్‌తో అతడు ఈ టోర్నీలో అత్యంత పిన్నవయసులో గోల్‌ చేసిన ఫుట్‌బాలర్‌గా రికార్డులకెక్కాడు. అదే ఊపులో స్పెయిన్‌కు 25వ నిమిషంలో డానీ ఒల్మొ గోల్‌ చేశాడు. ఆ తర్వాత ఫ్రాన్స్‌ ఎంత ప్రయత్నించినా స్పెయిన్‌ గోల్‌ చేసే అవకాశమివ్వలేదు. నెదర్లాండ్స్‌-ఇంగ్లండ్‌ మధ్య జరిగే రెండో సెమీస్‌లో విజేతతో స్పెయిన్‌ టైటిల్‌ పోరులో తలపడనుంది.

కోపా అమెరికా ఫైనల్‌లో అర్జెంటీనా

యూరో కప్‌తో సమాంతరంగా జరుగుతున్న కోపా అమెరికా టోర్నీలో అర్జెంటీనా ఫైనల్‌కు దూసుకెళ్లింది. బుధవారం జరిగిన తొలి సెమీస్‌లో అర్జెంటీనా 2-0తో కెనడాను ఓడించి ఫైనల్‌కు అర్హత సాధించింది. ఆ జట్టు తరఫున జులియన్‌ (22వ నిమిషంలో), లియోనల్‌ మెస్సీ (51వ నిమిషంలో) తలా ఓ గోల్‌ చేశారు.