Glenn Maxwel :దక్షిణాఫ్రికా టీ20 సిరీస్కు ముందు ఆస్ట్రేలియా(Australia)కు పెద్ద షాక్ తగిలింది. ఇప్పటికే స్టీవ్ స్మిత్, మిచెల్ స్టార్క్ గాయాల బారిన పడగా తాజాగా స్టార్ ఆల్రౌండర్ గ్లెన్ మ్యాక్స్వెల్(Glenn Maxwel) కూడా గాయపడ్డాడు. శిక్షణా శిబిరంలో మ్యాక్సీ ఎడమ కాలి చీలమండ(Ankle Injury)కు మళ్లీ గాయం అయింది. 2021 నవంబర్లో ఎడమ కాలికి దెబ్బ తగలడంతో మెటల్ ప్లేట్స్ అమర్చుకున్నాడు. ఇప్పుడు అదే చోట గాయం కావడంతో అతను సిరీస్కు దూరమయ్యాడు. వరల్డ్ కప్ ముందు భారత్తో జరిగే వన్డే సిరీస్ కల్లా మ్యాక్స్వెల్ కోలుకుంటాడని క్రికెట్ ఆస్ట్రేలియా తెలిపింది.
‘మ్యాక్స్వెల్ గాయం తీవ్రత, అతను కోలుకునే తీరును దగ్గరుండి పరిశీలిస్తాం. అతను టీమిండియాతో వన్డే సిరీస్లో బరిలోకి దిగుతాడనే నమ్మకం ఉంది’ అని సెలెక్టర్ టోనీ డొడెమెడ్(Tony Dodemaide) ఓ ప్రకటనలో వెల్లడించాడు. సఫారీ జట్టుతో వన్డే సిరీస్కు ఎంపికవ్వని మ్యాక్సీ స్వదేశం బయలుదేరనున్నాడు. అతడి భార్య వినీ మ్యాక్స్వెల్(Vini Maxwell) త్వరలోనే మొదటి బిడ్డకు జన్మనివ్వనున్న విషయం తెలిసిందే.
గ్లెన్ మ్యాక్స్వెల్
మ్యాక్స్వెల్ స్టానంలో వికెట్ కీపర్ మాథ్యూ వేడ్(Matthew Wade) జట్టులోకి వచ్చాడు. నిరుడు టీ20 వరల్డ్ కప్ తర్వాత ఒక్క మ్యాచ్ కూడా ఆడలేదు. దాంతో, అతడి కెరీర్ ముగిసింది అనుకున్నారంతా. కానీ, చీఫ్ సెలెక్టర్ జార్జ్ బెయిలీ వేడ్కు మద్దతు పలికాడు. దాంతో, అతడు ప్రపంచ కప్ తర్వాత భారత్తో జరిగే టీ20 సిరీస్ జట్టుకు కూడా ఎంపికయ్యే అవకాశం ఉంది. దక్షిణాఫ్రికా టీ20 సిరీస్కు ఆల్రౌండర్ మిచెల్ మార్ష్(Mitchell Marsh) సారథ్యం వహించనున్నాడు. ఆగస్టు 30వ తేదీన మొదటి టీ20 షురూ కానుంది.