Visit:
vivo X300 | స్మార్ట్ ఫోన్ తయారీదారు వివో ఫ్లాగ్ షిప్ రేంజ్లో మరో రెండు కొత్త స్మార్ట్ ఫోన్లను భారత మార్కెట్లో విడుదల చేసింది. వివో ఎక్స్300, ఎక్స్300 ప్రొ పేరిట ఈ ఫోన్లను లాంచ్ చేశారు. వివో ఎక్స్300 స్మార్ట్ ఫోన్లో 6.31 ఇంచుల ఎల్టీపీవో ఓలెడ్ డిస్ప్లేను ఏర్పాటు చేయగా, ఎక్స్300 ప్రొ ఫోన్లో 6.78 ఇంచుల 1.5కె ఎల్టీపీవో ఓలెడ్ డిస్ప్లేను అమర్చారు. దీనికి 120 హెడ్జ్ రిఫ్రెష్ రేట్ను అందిస్తున్నారు. ఈ ఫోన్లకు చెందిన డిస్ప్లేలు ఓలెడ్ తరహావి కనుక అద్భుతమైన క్వాలిటీని కలిగి ఉంటాయి. నాణ్యమైన దృశ్యాలను తెరపై వీక్షించవచ్చు. వీటికి 4500 నిట్స్ పీక్ బ్రైట్ నెస్ ఫీచర్ను అందిస్తున్నారు. కనుక సూర్యకాంతిలోనూ ఈ డిస్ప్లేలు చాలా స్పష్టంగా కనిపిస్తాయి. ఈ ఫోన్లలో మీడియాటెక్ డైమెన్సిటీ 9500 ఆక్టాకోర్ ప్రాసెసర్ను ఏర్పాటు చేశారు. 16జీబీ వరకు ర్యామ్ లభిస్తుంది. ఆండ్రాయిడ్ 16 ఆపరేటింగ్ సిస్టమ్ను అందిస్తున్నారు. ఈ ఫోన్లకు 5 ఏళ్ల వరకు ఓఎస్ అప్డేట్స్ను, 7 ఏళ్ల వరకు సెక్యూరిటీ అప్డేట్స్ను అందిస్తామని కంపెనీ చెబుతోంది.
ఈ ఫోన్లకు ఐపీ68, ఐపీ69 వాటర్, డస్ట్ ప్రొటెక్షన్ను సైతం అందిస్తున్నారు. ఎక్స్300 ఫోన్కు వెనుక వైపు 200 మెగాపిక్సల్ మెయిన్ కెమెరా ఉండగా, మరో 50 మెగాపిక్సల్ అల్ట్రా వైడ్ కెమెరాను ఇచ్చారు. ఇంకో 50 మెగాపిక్సల్ టెలిస్కోపిక్ కెమెరా కూడా ఉంది. దీని సహాయంతో అద్భుతమైన జూమ్ను పొందవచ్చు. ఇక ఎక్స్300 ప్రొ ఫోన్లో 50 మెగాపిక్సల్ మెయిన్ కెమెరాను, 50 మెగాపిక్సల్ అల్ట్రా వైడ్ కెమెరాను ఇచ్చారు. అయితే దీనికి జూమ్ కోసం 85ఎంఎం పెరిస్కోపిక్ టెలిఫొటో కెమెరాను అందిస్తుండడం విశేషం. దీని వల్ల ఈ ఫోన్ తో చాలా నాణ్యమైన జూమ్ను పొందేందుకు అవకాశం ఉంటుంది. ఫోటోలు, వీడియోలను జూమ్తో అత్యంత క్వాలిటీగా చిత్రీకరించుకోవచ్చు. ఈ ఫోన్లకు ముందు వైపు 50 మెగాపిక్సల్ కెమెరాను ఇచ్చారు. ఎక్స్300 ఫోన్లో 6040 ఎంఏహెచ్ బ్యాటరీ ఉండగా, ఎక్స్300 ప్రొ ఫోన్లో 6510 ఎంఏహెచ్ భారీ కెపాసిటీ ఉన్న బ్యాటరీని ఏర్పాటు చేశారు. వీటికి గాను 90 వాట్ల అల్ట్రా ఫాస్ట్ ఫ్లాష్ చార్జింగ్కు సపోర్ట్ను అందిస్తున్నారు. కనుక ఫోన్లను చాలా వేగంగా చార్జింగ్ చేసుకోవచ్చు. అలాగే 40 వాట్ల వైర్లెస్ చార్జింగ్కు వీటిలో సపోర్ట్ను అందిస్తున్నారు.
వివో ఎక్స్300 స్మార్ట్ ఫోన్ను 12జీబీ, 16జీబీ ర్యామ్, 256జీబీ, 512జీబీ స్టోరేజ్ ఆప్షన్లలో లాంచ్ చేశారు. అలాగే ఎక్స్300 ప్రొ ఫోన్ను కేవలం 16జీబీ ర్యామ్, 512జీబీ స్టోరేజ్ సింగిల్ వేరియెంట్ ఆప్షన్లోనే విడుదల చేశారు. ఈ రెండు ఫోన్లలోనూ డ్యుయల్ సిమ్లను వేసుకోవచ్చు. ఇన్ డిస్ప్లే ఫింగర్ ప్రింట్ సెన్సార్ లభిస్తుంది. ఇన్ ఫ్రా రెడ్ సెన్సార్ను కూడా ఇచ్చారు. 5జి సేవలను పొందవచ్చు. డ్యుయల్ 4జి వీవోఎల్టీఈ కూడా లభిస్తుంది. వైఫై 7, బ్లూటూత్ 6.0, యూఎస్బీ టైప్ సి, ఎన్ఎఫ్సీ వంటి అదనపు సదుపాయాలను సైతం ఈ ఫోన్లలో అందిస్తున్నారు.
వివో ఎక్స్300 స్మార్ట్ ఫోన్ను ఎలైట్ బ్లాక్, మిస్ట్ బ్లూ, సమ్మిట్ రెడ్ కలర్ ఆప్షన్లలో లాంచ్ చేయగా ఈ ఫోన్కు చెందిన 12జీబీ ర్యామ్, 256జీబీ స్టోరేజ్ మోడల్ ధర రూ.75,999గా ఉంది. 12జీబీ ర్యామ్, 512జీబీ స్టోరేజ్ మోడల్ ధరను రూ.81,999గా నిర్ణయించారు. అలాగే 16జీబీ ర్యామ్, 512జీబీ స్టోరేజ్ మోడల్ ధర రూ.85,999గా ఉంది. వివో ఎక్స్300 ప్రొ స్మార్ట్ ఫోన్ను ఎలైట్ బ్లాక్, డ్యూన్ గోల్డ్ కలర్ ఆప్షన్లలో లాంచ్ చేయగా ఈ ఫోన్కు చెందిన సింగిల్ వేరియెంట్ 16జీబీ ర్యామ్, 512జీబీ స్టోరేజ్ మోడల్ ధర రూ.1,09,999గా ఉంది. ఈ ఫోన్లకు గాను ప్రత్యేకంగా జూమ్ కోసం వివో జియస్ 2.35ఎక్స్ టెలిఫొటో ఎక్స్టెండర్ కిట్ను సైతం అందిస్తున్నారు. దీన్ని విడిగా కొనుగోలు చేయాల్సి ఉంటుంది. దీని ధర రూ.18,999గా ఉంది. ఈ ఫోన్లను డిసెంబర్ 10 నుంచి అమెజాన్తోపాటు వివో ఇండియా ఇస్టోర్, ఫ్లిప్ కార్ట్, అన్ని ఆఫ్ లైన్ స్టోర్స్లో విక్రయించనున్నారు. లాంచింగ్ సందర్భంగా ఈ ఫోన్లపై దాదాపు అన్ని బ్యాంకులకు చెందిన కార్డులతో 10 శాతం ఇన్ స్టంట్ క్యాష్ బ్యాక్ ను పొందవచ్చు. 24 నెలల వరకు నో కాస్ట్ ఈఎంఐ సదుపాయాన్ని అందిస్తున్నారు.
