న్యూఢిల్లీ: మీ దగ్గర ఆపిల్ ఐఫోన్ లేదా ఐప్యాడ్ లేదా మ్యాక్ ఉందా? అయితే వెంటనే అందులోని సాఫ్ట్వేర్ను అప్డేట్ చేసుకోండి. ఆపిల్ ఊహించనివిధంగా 14.7.1 వెర్షన్ను రిలీజ్ చేసి తమ యూజర్లందరూ వెంటనే దీనికి అప్డేట్ చేసుకోవాల్సిందిగా సూచించింది. గత వెర్షన్లలో ఉన్న ఓ సెక్యూరిటీ లోపాన్ని సరి చేసి ఈ వెర్షన్ను ఆపిల్ రిలీజ్ చేసింది. ఐఫోన్ అయితే ఐఓఎస్ 14.7.1, ఐప్యాడ్ అయితే ఐప్యాడ్ఓఎస్ 14.7.1, మ్యాక్బుక్, ఐమ్యాక్ అయితే మ్యాక్ఓఎస్ బిగ్ సర్ 11.5.1కు అప్డేట్ చేసుకోవాలి.
గత వెర్షన్లలో టచ్ ఐడీ ఉన్న ఐఫోన్తో పెయిర్ అయి ఉన్న ఆపిల్ వాచ్ను అన్లాక్ విత్ ఐఫోన్ ఫీచర్తో అన్లాక్ చేయడానికి రాలేదని, ఈ కొత్త వెర్షన్ ఆ లోపాన్ని సరి చేసిందని ఆపిల్ చెప్పింది. అంతేకాదు ఈ కొత్త వెర్షన్తో ఓ కీలకమైన సెక్యూరిటీ లోపాన్ని కూడా ఆపిల్ సవరించింది. ఐఫోన్లను పెగాసస్ స్పైవేర్తో హ్యాక్ చేయడానికి కారణమైన ఐమెసేజ్లోని జీరో క్లిక్ లోపాన్ని ఈ వెర్షన్తో సరి చేసినట్లు తెలుస్తోంది. ఈ కొత్త అప్డేట్తో గతంలో లేనంత సెక్యూర్డ్గా మీ ఆపిల్ డివైస్లు ఉండనున్నాయని సంస్థ తెలిపింది. ఐఫోన్ 6ఎస్, ఆపై మోడల్స్కు ఈ కొత్త వెర్షన్ అందుబాటులో ఉంది.