నీటి పొదుపుపై అధికారుల ప్రచారం.. ప్రభుత్వ కార్యాలయంలోనే వృథాగా పోతున్న నీళ్లు

ఓవైపు ఎల్‌నినో ప్రభావంతో నీటి ఎద్దడి ఏర్పడే అవకాశాలున్నాయంటూ ప్రచారం.. మరోవైపు నీటిని పొదుపుగా వాడుకోవాలని ప్రజలకు సూచనలు.. నీటిని వృథా చేస్తే జరిమానాలు విధిస్తామంటూ హెచ్చరికలు.. ఇవన్నీ చెబుతున్న అధికారులే నీటి పొదుపు విషయంలో నిర్లక్ష్యంగా వ్యవహరిస్తున్నారనే విమర్శలు వ్యక్తమవుతున్నాయి.

శేరిలింగంపల్లి, అక్టోబర్ 27 : ఓవైపు ఎల్‌నినో ప్రభావంతో నీటి ఎద్దడి ఏర్పడే అవకాశాలున్నాయంటూ ప్రచారం.. మరోవైపు నీటిని పొదుపుగా వాడుకోవాలని ప్రజలకు సూచనలు.. నీటిని వృథా చేస్తే జరిమానాలు విధిస్తామంటూ హెచ్చరికలు.. ఇవన్నీ చెబుతున్న అధికారులే నీటి పొదుపు విషయంలో నిర్లక్ష్యంగా వ్యవహరిస్తున్నారనే విమర్శలు వ్యక్తమవుతున్నాయి. శేరిలింగంపల్లి జోనల్ కార్యాలయం ఆవరణలోనే నీరు వృథాగా పోతుండటం ఇందుకు నిదర్శనంగా నిలుస్తోంది. ప్రజలకు నీటి పొదుపుపై అవగాహన కల్పించాల్సిన అధికారుల కార్యాలయంలోనే నీరు వృథా అవుతుండటంపై స్థానికులు అసహనం వ్యక్తం చేస్తున్నారు. నీటిని పొదుపుగా వాడుకోవాలని ప్రజలకు హితవు పలుకుతూ, నిబంధనలు ఉల్లంఘిస్తే జరిమానాలు విధిస్తామని హెచ్చరించే అధికారులు.. తమ కార్యాలయ పరిసరాల్లో జరుగుతున్న నీటి వృథాను ఎందుకు అరికట్టలేకపోతున్నారని ప్రశ్నిస్తున్నారు.

ఎల్‌నినో ప్రభావం, భవిష్యత్తులో తలెత్తే నీటి కొరతపై ప్రచారానికే పరిమితం కాకుండా.. నీటి వృథాను అరికట్టేందుకు అధికారులు క్షేత్రస్థాయిలో చర్యలు తీసుకోవాలని ప్రజలు కోరుతున్నారు. ముందుగా ప్రభుత్వ కార్యాలయాల్లో నీటి వినియోగంపై పర్యవేక్షణ పెంచి, వృథాను అరికట్టాలని సూచిస్తున్నారు. ప్రజలకు ఆదర్శంగా నిలవాల్సిన అధికారులే నిర్లక్ష్యం వహిస్తే నీటి పొదుపుపై చేసే ప్రచారాలకు విలువ ఏముంటుందని ప్రశ్నిస్తున్నారు.