Visit:
రంగారెడ్డి, ఆగస్టు 23, (నమస్తే తెలంగాణ) : జిల్లా నూతన ఇంటిగ్రేటెడ్‌ కలెక్టరేట్‌ ప్రారంభోత్సవానికి ముమ్మరంగా ఏర్పాట్లు చేస్తున్నారు. గురువారం సీఎం కేసీఆర్‌ రంగారెడ్డి జిల్లా నూతన సమీకృత కలెక్టరేట్‌ను ప్రారంభించనున్నారు. సీఎం పర్యటన నేపథ్యంలో ఎలాంటి లోటుపాట్లు లేకుండా మంత్రి సబితారెడ్డి, టీఆర్‌ఎస్‌ పార్టీ జిల్లా అధ్యక్షుడు కిషన్‌రెడ్డి, కలెక్టర్‌ అమయ్‌కుమార్‌ ఆధ్వర్యంలో అధికారులు ఏర్పాట్లు చేస్తున్నారు. కొంగరకలాన్‌లోని సర్వే నం. 300లోని 40 ఎకరాల్లో నిర్మించిన ఇంటిగ్రేటెడ్‌ కలెక్టరేట్‌ వద్దకు మధ్యాహ్నం 2 గంటలకు సీఎం కేసీఆర్‌ చేరుకోనున్నారు. తదనంతరం నూతన కలెక్టరేట్‌ను ప్రారంభించనున్నారు. అనంతరం అధికారులతో సమీక్షా సమావేశాన్ని నిర్వహిస్తారు. తర్వాత బహిరంగ సభలో సీఎం కేసీఆర్‌ ప్రసంగించనున్నారు. ఇప్పటికే సమీకృత కలెక్టరేట్‌ ప్రారంభానికి సిద్ధంగా ఉండగా.. తుది మెరుగులు దిద్దుతున్నారు. సీఎం పర్యటన సందర్భంగా రాచకొండ కమిషనర్‌ మహేశ్‌ భగవత్‌ ఆధ్వర్యంలో భారీ పోలీసు బందోబస్తును ఏర్పాటు చేయనున్నారు. నూతన కలెక్టరేట్‌కు సమీపంలో హెలీప్యాడ్‌ను కూడా ఏర్పాటు చేశారు.
50 వేల మందితో భారీ బహిరంగ సభ
జిల్లాలోని కొంగరకలాన్‌లో నూతన ఇంటిగ్రేటెడ్‌ కలెక్టరేట్‌ను ప్రారంభించిన అనంతరం భారీ బహిరంగ సభను నిర్వహించేందుకు ఏర్పాట్లు చేస్తున్నారు. 50 వేల మందితో భారీ జనసమీకరణతో బహిరంగ సభ నిర్వహించనున్నారు. 20 ఎకరాల్లో సభ నిర్వహించేందుకు ఏర్పాట్లు చేస్తున్నారు. జన సమీకరణకు సంబంధించి మంత్రి సబితారెడ్డి, టీఆర్‌ఎస్‌ పార్టీ జిల్లా అధ్యక్షుడు కిషన్‌రెడ్డి, చేవెళ్ల ఎంపీ రంజిత్‌రెడ్డి ఆధ్వర్యంలో పార్టీ ప్రజాప్రతినిధులు, శ్రేణులకు దిశానిర్దేశం చేశారు. సభకు ఇబ్రహీంపట్నం నియోజకవర్గంతోపాటు మహేశ్వరం, కల్వకుర్తి, షాద్‌నగర్‌, రాజేంద్రనగర్‌, చేవెళ్ల నియోజకవర్గాల నుంచి జన సమీకరణ చేసేందుకు జిల్లా టీఆర్‌ఎస్‌ నేతలు ప్లాన్‌ చేస్తున్నారు. పార్కింగ్‌కు సంబంధించి 20 ఎకరాల్లో ఏర్పాట్లు చేస్తున్నారు.
ఏర్పాట్లను పరిశీలించిన మంత్రి, ప్రజాప్రతినిధులు
రేపు జిల్లా కలెక్టరేట్‌ ప్రారంభోత్సవం సందర్భంగా రాష్ట్ర విద్యాశాఖ మంత్రి పి.సబితాఇంద్రారెడ్డి, కలెక్టర్‌ డి.అమయ్‌కుమార్‌, టీఆర్‌ఎస్‌ పార్టీ జిల్లా అధ్యక్షుడు మంచిరెడ్డి కిషన్‌రెడ్డి జిల్లా ప్రజాప్రతినిధులు, జిల్లా ఉన్నతాధికారులతో ఏర్పాట్లపై సమీక్షా సమావేశం నిర్వహించారు. కలెక్టరేట్‌ ప్రారంభానికి ఏర్పాట్లు, బహిరంగ సభకు జనసమీకరణకు సంబంధించి సమావేశంలో చర్చించారు. తదనంతరం బహిరంగ సభ స్థలిని పరిశీలించి, ఏర్పాట్లను అడిగి తెలుసుకున్నారు. కార్యక్రమంలో మూసీ రివర్‌ ఫ్రంట్‌ డెవలప్‌మెంట్‌ కార్పొరేషన్‌ చైర్మన్‌ దేవిరెడ్డి సుధీర్‌రెడ్డి, జిల్లా అదనపు కలెక్టర్‌ ప్రతీక్‌జైన్‌, ఎమ్మెల్సీలు పి.మహేందర్‌రెడ్డి, యెగ్గె మల్లేశం, ఎమ్మెల్యేలు కాలె యాదయ్య, జైపాల్‌యాదవ్‌, ప్రకాశ్‌గౌడ్‌, జిల్లా పరిషత్‌ చైర్‌పర్సన్‌ తీగల అనితారెడ్డి, డీసీసీబీ చైర్మన్‌ బి.మనోహర్‌రెడ్డి, టీఆర్‌ఎస్‌ నేతలు, అధికారులు పాల్గొన్నారు.
సీఎంకు ఘనంగా స్వాగతం పలికేందుకు..
కలెక్టరేట్‌ ప్రారంభోత్సవానికి సీఎం కేసీఆర్‌ రానున్న నేపథ్యంలో ఘనంగా స్వాగతం పలికేందుకు ఏర్పాట్లు చేస్తున్నట్లు విద్యాశాఖ మంత్రి సబితారెడ్డి తెలిపారు. ఎలాంటి లోటుపాట్లు లేకుండా చూడాలని అధికారులకు సూచించారు. కలెక్టరేట్‌ ప్రారంభోత్సవం అనంతరం సీఎం అధికారులతో ప్రత్యేకంగా సమావేశం అవుతారని.. అధికారులు తమ శాఖలకు సంబంధించిన సమాచారాన్ని అందుబాటులో ఉంచుకోవాలని సూచించారు. రహదారులు గుంతలు లేకుండా బాగు చేయాలని ఆర్‌అండ్‌బీ, పంచాయతీరాజ్‌ అధికారులను ఆదేశించారు. పలు విభాగాలకు ఇన్‌చార్జీలుగా ఉన్న అధికారులు ఎలాంటి లోటుపాట్లు లేకుండా చూసుకోవాలన్నారు.
ఎలాంటి లోపాలు లేకుండా విధులు నిర్వహించండి
నూతన కలెక్టరేట్‌ ప్రారంభోత్సవానికి సంబంధించి జిల్లా అధికారులకు కేటాయించిన పనుల్లో ఎలాంటి లోపాలు లేకుండా విధులు నిర్వహించాలని కలెక్టర్‌ అమయ్‌కుమార్‌ అధికారులను ఆదేశించారు. మంగళవారం కలెక్టరేట్‌లో ఏర్పాట్లపై జిల్లా అధికారులతో సమీక్షా సమావేశాన్ని నిర్వహించారు. ఈ సందర్భంగా కలెక్టర్‌ మాట్లాడుతూ.. కలెక్టరేట్‌ను శానిటేషన్‌ చేయించి పరిశుభ్రంగా ఉంచాలని.. భవనం మొత్తాన్ని పూలు, మామిడి తోరణాలతో అలంకరించాలని ఆదిబట్ల మున్సిపల్‌ కమిషనర్‌కు, మొక్కల కుండీలను ఏర్పాటు చేయాలని జిల్లా ఉద్యాన శాఖ అధికారికి సూచించారు. తాగునీటిని ఏర్పాటు చేయాలని, రోడ్లు గుంతలు లేకుండా చూడాలని మిషన్‌ భగీరథ, పంచాయతీరాజ్‌ అధికారులను, ప్రముఖుల వాహనాల పార్కింగ్‌కు అసౌకర్యం కలుగకుండా చూడాలని తహసీల్దార్లను ఆదేశించారు.
