హరితహారానికి మొక్కలు సిద్ధం

• మేడ్చల్‌ కలెక్టరేట్‌, మే 11: హరితహారంలో భాగంగా నాటనున్న మొక్కలు నాగారం మున్సిపాలిటీ నర్సరీలలో సిద్ధంగా ఉన్నాయి.
• ఏడాది క్రితం కంటే ఈసారి నర్సరీలో ఎలాంటి ఇబ్బందులు లేకుండా మూడు లక్షల 61 వేల 500 వందల మొక్కలను మున్సిపాలిటీ సిబ్బంది పెంచారు.
• వర్షాలు పడగానే పెద్దఎత్తున మొక్కలు నాటి పచ్చదనాన్ని పెంపొందించేందుకు అధికారులు పక్కా ప్రణాళికలు సిద్ధం చేస్తున్నారు. మున్సిపల్‌ పరిధిలోని ఐదు నర్సరీల్లో మొక్కలను పెంచుతున్నారు.
• ప్రభుత్వం నిర్ధేశించిన లక్ష్యానికి అనుగుణంగా పచ్చదనాన్ని పెంపొందించేందుకు అధికారులు వడివడిగా అడుగులు వేస్తున్నారు.
• హరితహారం వేదికగా పార్కులు, కాలనీలు, రహదారుల వెంట, ప్రధానచౌరస్తాలు తదితర ప్రాంతాల్లో మొక్కలు నాటి పచ్చటి లోగిళ్లుగా మార్చేందుకు కసరత్తు చేస్తున్నారు.

చాలా రకాల మొక్కలు..

మున్సిపల్‌ పరిధిలోని ఐదు నర్సరీల్లో చాలా రకాల మొక్కలను పెంచారు. అటవీశాఖ, ఉద్యానవన అధికారుల సూచనలు, సలహాలతో మొక్కల పెంపకం చేపట్టారు. నర్సరీల్లో మామిడి, అల్లనేరెడు, తులసీ, మనీప్లాంటు, ఉసిరి, పొప్పడి, కానుగ, వేప, రాగి, మందారంతో పాటు అనేక రకాల మొక్కలు నాటేందుకు, పంపిణీకి సిద్ధం చేశారు. ఉద్యానవన, అటవీశాఖ అధికారుల పర్యవేక్షణలో ప్రత్యేక శిక్షణ పొందిన సిబ్బందిని నర్సరీల్లో నియమించి మొక్కల పెంపకాన్ని నిర్వహిస్తున్నారు. హరితహారంలో మొక్కలు నాటి వాటి సంరక్షణకు అధికారులు పకడ్బందీగా చర్యలు తీసుకుంటూ ఆదర్శ మున్సిపాలిటీగా తీర్చిదిద్దేందుకు కృషి చేస్తున్నారు.

ఈ సారి భారీగా మొక్కలు నాటుతాం..

ఈసారి భారీగా మొక్కలు నాటేందుకు నర్సరీల్లో పెద్ద ఎత్తున పెంచాం. ప్రస్తుతం ఎండాకాలం కావడంతో క్రమం తప్పకుండా నీటిని అందించడంతో పాటు ప్రత్యేక సంరక్షణ చర్యలు చేపడుతున్నాం. వర్షాలు కురువగానే పార్కు లు, ఖాళీ స్థలాల్లో, రోడ్లకు ఇరువైపులా మొక్కలు నాటుతాం. -వాణిరెడ్డి, మున్సిపల్‌ కమిషనర్‌, నాగారం