Suneil Anand | బాలీవుడ్‌లో విషాదం.. దేవ్ ఆనంద్ తనయుడు సునీల్ ఆనంద్ కన్నుమూత,సినీ ప్రముఖుల సంతాపం

Suneil Anand | బాలీవుడ్ చిత్ర పరిశ్రమలో విషాదం నెలకొంది. హిందీ సినీ దిగ్గజం, దివంగత నటుడు దేవ్ ఆనంద్ కుమారుడు సునీల్ ఆనంద్ ఇక లేరు. జులై 26న గుండెపోటుతో లండన్‌లో ఆయన తుదిశ్వాస విడిచారు. మరణించే సమయానికి ఆయన వయసు 70 సంవత్సరాలు. ఈ విషాద వార్తను సునీల్ ఆనంద్ మేనకోడలు గీనా నారంగ్ సోషల్ మీడియా వేదికగా అధికారికంగా ధ్రువీకరించారు.

Suneil Anand | బాలీవుడ్ చిత్ర పరిశ్రమలో విషాదం నెలకొంది. హిందీ సినీ దిగ్గజం, దివంగత నటుడు దేవ్ ఆనంద్ కుమారుడు సునీల్ ఆనంద్ ఇక లేరు. జులై 26న గుండెపోటుతో లండన్‌లో ఆయన తుదిశ్వాస విడిచారు. మరణించే సమయానికి ఆయన వయసు 70 సంవత్సరాలు. ఈ విషాద వార్తను సునీల్ ఆనంద్ మేనకోడలు గీనా నారంగ్ సోషల్ మీడియా వేదికగా అధికారికంగా ధ్రువీకరించారు. ఈ వార్త బయటకు రావడంతో బాలీవుడ్ సినీ ప్రముఖులు, అభిమానులు తీవ్ర దిగ్భ్రాంతికి గురయ్యారు.

సునీల్ ఆనంద్ మృతిపై పలువురు సినీ ప్రముఖులు సోషల్ మీడియా ద్వారా సంతాపం వ్యక్తం చేస్తున్నారు. దేవ్ ఆనంద్ కుటుంబానికి ప్రగాఢ సానుభూతి తెలియజేస్తూ, సునీల్ ఆత్మకు శాంతి చేకూరాలని ప్రార్థిస్తున్నారు. సునీల్ ఆనంద్ తన తండ్రి దేవ్ ఆనంద్ అడుగుజాడల్లోనే సినీ రంగంలోకి అడుగుపెట్టారు. దేవ్ ఆనంద్ స్వయంగా దర్శకత్వం వహించిన ‘ఆనంద్ ఔర్ ఆనంద్’ చిత్రంతో హీరోగా వెండితెరకు పరిచయమయ్యారు. ఈ సినిమా ద్వారా మంచి గుర్తింపు వచ్చినప్పటికీ, తండ్రిలా స్టార్ హీరోగా ఎదగలేకపోయారు.

తర్వాత ‘కార్ థీఫ్’, ‘మైన్ తేరే లియే’ వంటి చిత్రాల్లో నటించినప్పటికీ, అవి ఆశించిన స్థాయిలో విజయాన్ని అందుకోలేదు. దీంతో నటుడిగా కంటే దర్శకుడిగా తన ప్రతిభను చాటాలని నిర్ణయించుకున్న సునీల్, ‘మాస్టర్’ అనే చిత్రానికి దర్శకత్వం వహించారు. బాలీవుడ్‌కే పరిమితం కాకుండా హాలీవుడ్‌లో కూడా సునీల్ ఆనంద్ తన అదృష్టాన్ని పరీక్షించుకున్నారు. ‘వాగేటర్ మిక్సర్’ అనే హాలీవుడ్ చిత్రానికి దర్శకత్వం వహించడంతో పాటు అందులో కీలక పాత్రలో నటించారు. అయితే, ఆ తర్వాత క్రమంగా సినిమాలకు దూరమయ్యారు. 2015 నుంచి ఆయన సినీ రంగంలో పెద్దగా కనిపించలేదు.

భారతీయ సినీ చరిత్రలో దేవ్ ఆనంద్ పేరు ఓ అధ్యాయంగా నిలిచింది. అలాంటి దిగ్గజ నటుడి కుమారుడిగా సినీ రంగంలో అడుగుపెట్టిన సునీల్ ఆనంద్ తనదైన ముద్ర వేయాలని ప్రయత్నించినప్పటికీ, తండ్రి సాధించిన స్థాయి విజయాన్ని అందుకోలేకపోయారు. అయినప్పటికీ నటుడిగా, దర్శకుడిగా తనదైన ప్రయాణాన్ని కొనసాగించారు.సునీల్ ఆనంద్ మరణంతో బాలీవుడ్ మరో సినీ కుటుంబ సభ్యుడిని కోల్పోయింది. ఆయన మరణం సినీ వర్గాల్లో విషాదాన్ని నింపగా, అభిమానులు సోషల్ మీడియా ద్వారా నివాళులు అర్పిస్తున్నారు. దేవ్ ఆనంద్ కుటుంబానికి దేశవ్యాప్తంగా సినీ ప్రముఖులు ప్రగాఢ సానుభూతిని తెలియజేస్తున్నారు.