చైత్రము కాలు మోపినది చారువనాంతరచూతవృక్షముల్
చిత్రము వోలె నిల్చినవి చేతననొందుచు కొమ్మకొమ్మలన్
పత్రములుల్లసిల్లినవి పచ్చదనమ్ములు మంగళమ్మలై
ఛత్రములై గ్రహాంగణవిచాలనతోరణ దీప్తినిచ్చుచున్!
శోభకృదాఖ్యతో దనరు శుభ్ర నవీనయుగాది వేళలో
శ్రీభరితమ్ములై జనుల జీవన పావన భావనమ్మలే
యాభరణమ్ములై విరిసి హాసనికాసవిలాస భాసవా
గైభవఠీవి దప్పక నివాసములందు వసింప వచ్చెడిన్!
సొగసైన చెలికాడు దిగియె వసంతుడు
మలయజసుమగంధ మాలలొసగ
బెలికాడు మదనుడు చెరుకు విల్లును బట్టి
విరులతో బాణాలు వేయనిలిచె
చూత పత్రాలనే చేత దాల్చిన తన్వి
వాసంతి విరహాన వచ్చి చూచె
చలువ రేడొకవంక మలచి వెన్నెలరేయి
విరహుల కోర్కెలక్ వెచ్చజేసె
ఏమిరా యిట్టి యనుభూతి నెవడొసంగె?
ననును నూహలలో దేలియలరు మదిని
నవ్యవా సంతభామిని దివ్యమైన
పాదమును మోపి పులకల పలుకరించె!
ఈ రమణీయ రాజిత మహీ స్థలమాసము పూర్ణకోశమై
చేరుచు దూరుచున్ జలల జీవనగహములందు విందులన్
దేరుచు మారుచున్ మిగులదీరుచు నవ్యమార్గమున్
బారుచు గూరుచునుండునిక వత్సరమంతయు వెల్లిపోవగా!
చిగురు చిగురున చేతన నగవులొలుక
తరువు తరువున పూతలు తావులీన
మొగ్గమొగ్గల బుగ్గల సిగ్గులాన
వచ్చెనా కొత్తయేుడాది భాసురముగ !
-డాక్టర్ ఆయాచితం నటేశ్వరశర్మ, 9440468557