చెట్టు వసంతాన్ని మోసుకొస్తే
వగరు చిగురు
కోయిలలకు మంజుల స్వరాన్ని వాగ్దానం చేస్తుంది!
ఆకులందున అణగి మణిగిన
గండు కోయిలల స్వరాన్ని
గాలి పరివ్యాప్తం చేస్తుంది!
దేశమొక్కటే
వేయి పూలు వికసించనిదే
నందనవనాలు నేలరాలవు!
అన్నిసార్లూ
యుద్ధ భయాలు గెలిపించవు
ఆలింగనాలే ఎప్పటికీ ఆత్మవిశ్వాసం నింపేవి!
విద్వేషాలకు
పర్యాయపదమే విధ్వంసం
సహనమొక్కటే సమున్నత ధర్మం!
మీ వరుస గెలుపులను చూపి
ధర్మమే గెలిచిందని ప్రచారం చేయకండి
శకుని పాచికలది గెలుపంటే లోకమొప్పుకోదు!
ఈ మట్టిది
భిన్నస్వరాల సంగీత ఝరి
తన్మయం లేనిదే ఆస్వాదన సాధ్యం కాదు!
నా దేశ జాతీయగీతం
ఎన్నడూ ఒంటరి పాట కానే కాదు
సామూహిక గళాల స్వర తరంగ నివేదనం!
ఇంద్ర ధనుసులను కలగన్న
ఓ నవ తెలంగాణా..
మనకు ఉగాదులుంటయి!
ఉషస్సులుంటయి!!
కోట్ల వెంకటేశ్వరరెడ్డి
94402 33261