అంతులేని అవినీతి!

అక్రమాస్తుల వ్యవహారంలో నిజామాబాద్‌ జిల్లా హాట్‌ టాపిక్‌గా మారుతోంది. రోజురోజుకు పెరుగుతున్న కేసులతో అవినీతి అనకొండలు ఇంకెంత మంది ఉన్నారో? అన్న చర్చ తీవ్రంగా జరుగుతోంది. దొరికితే దొంగ... అన్నట్లుగా పరిస్థితి మారుతోంది. ప్రజలను ప్రతి పనికి డబ్బులు డిమాండ్‌ చేస్తూ పీల్చి పిప్పి చేస్తోన్న అక్రమార్కులంతా పెద్ద ఎత్తున ఆస్తులు కూడబెడుతూ రాజ్యమేలుతున్నారు.

• మొన్న సర్వేయర్‌.. నేడు డీటీసీ..
• ఇబ్బడి ముబ్బడిగా అక్రమాస్తుల జమ
• ఉమ్మడి జిల్లాలో అవినీతిపరులు అనేకులు
• రూ.వందల కోట్లకు పడగలెత్తుతోన్న పలువురు
• బడా వ్యాపారులు, బిల్డర్లతో కలిసి చెట్టాపట్టాల్‌
• ఉద్యోగ సంఘాలను అడ్డం పెట్టుకుని భారీ తతంగం

నిజామాబాద్‌, డిసెంబర్‌ 24, (నమస్తే తెలంగాణ ప్రతినిధి): అక్రమాస్తుల వ్యవహారంలో నిజామాబాద్‌ జిల్లా హాట్‌ టాపిక్‌గా మారుతోంది. రోజురోజుకు పెరుగుతున్న కేసులతో అవినీతి అనకొండలు ఇంకెంత మంది ఉన్నారో? అన్న చర్చ తీవ్రంగా జరుగుతోంది. దొరికితే దొంగ… అన్నట్లుగా పరిస్థితి మారుతోంది. ప్రజలను ప్రతి పనికి డబ్బులు డిమాండ్‌ చేస్తూ పీల్చి పిప్పి చేస్తోన్న అక్రమార్కులంతా పెద్ద ఎత్తున ఆస్తులు కూడబెడుతూ రాజ్యమేలుతున్నారు. నీతులు వల్లిస్తూనే ప్రజలను సతాయిస్తున్నారు. 2024, 2025లో వెలుగు చూసిన అనేక అవినీతి కేసుల్లో రూ.కోట్లలో ఆస్తులు కూడబెట్టిన ఘటనలు అనేకం ఉంటున్నాయి. లంచం పుచ్చుకుంటూ దొరికిన కేసుల్లోనూ కట్టల కొద్దీ డబ్బులు బయట పడడం అవినీతికి పరాకాష్టకు చేరుకుంటోంది.

రెవెన్యూ, పోలీస్‌, సర్వే అండ్‌ ల్యాండ్‌ రికార్డ్స్‌, రిజిస్ట్రేషన్‌, రవాణా, విద్యా, పురపాలక, భూగర్భ గనులు, వైద్యారోగ్య శాఖల్లో చెప్పలేని విధంగా అక్రమాలు వెలుగులోకి వస్తున్నాయి. ఎవడో ఒకడు పూటకోసారి డబ్బులతో పట్టుబడుతున్నప్పటికీ అవినీతి ఉద్యోగుల్లో మార్పు రావడం లేదు. ఏసీబీ వరుస దాడులకు పాల్పడుతున్నప్పటికీ అవినీతి అధికారుల్లో చలనం తీసుకు రావడంలేదు. బలంగా శిక్షలు లేకపోవడమే ఇందుకు కారణంగా నిలుస్తోంది. తాత్కాలికంగా రిమాండ్‌ పంపి వదిలేస్తుండగా కేసులో శిక్షలు పడకపోవడంతో భయమనేది అక్రమార్కుల్లో ఉండటం లేదన్న వాదన వినిపిస్తోంది. లంచంతో అడ్డంగా దొరికిన ఉద్యోగులను సర్వీస్‌ నుంచి డిస్మిస్‌ చేయాలన్న వాదన ప్రస్తుతం ప్రజల నుంచి బలంగా వినిపిస్తోంది.

అక్రమ సంపాదన దారి మళ్లింపు
అక్రమ సంపాదనను గుట్టలుగా పోగు చేసి వాటిని పెట్టుబడులుగా మారుస్తున్నారు. తెలివిగా తమ పేరుపై కొన్ని చోట్ల భూములు, ఇతరత్రా ఆస్తులు కూడబెడుతున్నారు. కుటుంబీకులు, దగ్గరి బంధువుల పేర్లపై భారీ ఎత్తున ఆస్తులు కొంటున్నారు. చట్టం ముందు చిక్కకుండా తప్పించుకుని తిరిగేందుకు అవినీతి పరులు కొత్త ఎత్తుగడలతో పావులు కదుపుతున్నప్పటికీ ఏసీబీ ఆట కట్టిస్తోంది. వారికి నెలవారీగా జీతం రూపంలో వచ్చే ఆదాయాన్ని లెక్కించి ఆస్తులను తేలుస్తున్నారు. ఇతరత్రా మార్గాల ద్వారా డబ్బులు రాబడితే దానికి పత్రాలను, ఆధారాలను అడుగుతున్నారు.

అక్రమార్కులు సరైన ఆధారాలు, లెక్కలు చూపించకపోవడంతో వాటిని అక్రమాస్తులుగా తేలుస్తున్నారు. లంచం, అవినీతి, అక్రమాలతో వచ్చిన డబ్బును భూములు, హోట ళ్లు, ఫ్లాట్లు, బంగారం, విలువైన వాహనాల్లో పెట్టుబడిగా పెడుతున్నారు. ఇందుకు డీటీసీ కిషన్‌ కేసు నిదర్శనంగా నిలుస్తోంది. ఆస్తులు ప్రధానంగా నిజామాబాద్‌లోనే ఉండగా అవన్నీ విలువైన వ్యాపారాల్లోనే ఉండటం ప్రాధాన్యతను సంతరించుకుంది. నిజామాబాద్‌ జిల్లాలో రెండేళ్ల క్రితం వరకు అదనపు కలెక్టర్‌గా పని చేసి రిటైర్‌ అయిన వ్యక్తి సైతం బైపాస్‌ రోడ్డులో అధికారాన్ని అడ్డం పెట్టి ఉద్యోగ సంఘాల నేతలతో కలిసి పెట్టుబడులు పెట్టాడు.

తన మాతృ శాఖకు చెందిన ఉద్యోగ సంఘాల నేతలను తనవైపునకు తిప్పుకుని తెర వెనుక వ్యాపారాలు నిర్వహించినట్లుగా తెలుస్తోంది. చట్టంలో లొసుగులు అడ్డం పెట్టుకుని కుమారులు, కుమార్తెలు, అన్న కూతుర్లు, వదిన పేరిట వ్యాపారాలు నడిపిస్తూ అధికార పార్టీ నేతల అండగా చేతిలో మామూళ్లు ముట్టజెప్పి చక్రం తిప్పుతున్నారు. ఉద్యోగ సంఘాల నేతలుగా ఎదిగి ఉద్యోగుల సంక్షేమాన్ని గాలికి వదిలేసి ఫక్తూ సొంత ప్రయోజనానికి ప్రాధాన్యం ఇస్తోన్న నేతల తీరుపై విమర్శలు పెద్ద ఎత్తున పెరుగుతున్నాయి. వీరి స్వలాభం వల్ల ఉద్యోగ సంఘాలకు అపకీర్తి వస్తోందంటూ సామాన్య ఉద్యోగులు మండిపడుతున్నారు. ప్రజాపాలనలో ఉద్యోగులకు తీవ్ర నష్టం సంభవిస్తుంటే నోరు మెదపకుండా వ్యాపారాల్లో మునిగి తేలుతూ సొంత లాభం కోసం పాకులాడుతున్న తీరును ఉద్యోగ సంఘాల్లోని సభ్యులంతా తప్పుబడుతున్నారు.

ప్రధాన ఘటనలు..

• రెండు రోజుల క్రితం డిసెంబర్‌ 23న మహబూబ్‌నగర్‌ డిప్యూటీ ట్రాన్స్‌పోర్ట్‌ కమిషనర్‌ కిషన్‌ నాయక్‌పై ఏసీబీ దాడులు జరిగాయి. స్వాధీనం చేసుకున్న ఆస్తుల మొత్తం మార్కెట్‌ విలువ ప్రకారం రూ.12.72 కోట్లుగా ఉన్నప్పటికీ బహిరంగ మార్కెట్లో రూ.వందల కోట్లు విలువ చేస్తాయని ఏసీబీ అంచనా వేసింది. ఈ కేసులో డీటీసీ కిషన్‌ నాయక్‌ ఎక్కువగా నిజామాబాద్‌ జిల్లా కేంద్రంలోనే పెట్టుబడులు పెట్టడం సంచలనం సృష్టిస్తోంది. బైపాస్‌ రోడ్డులో లహరి ఇంటర్నేషనల్‌ హోటల్‌లో 50శాతం వాటా, 3వేల చదరపు గజాల స్థలంలో ఫర్నిచర్‌ షాపు, అశోక టౌన్‌షిప్‌లో 2 ప్లాట్లు, 10 ఎకరాల వాణిజ్య భూమి వం టివి ఏసీబీ గుర్తించింది. వాహన రిజిస్ట్రేషన్లు, లైసెన్సులు వంటి సేవల్లో అవినీతి ద్వారా ఇదంతా సంపాదించినట్లుగా ఏసీబీ అంచనా వేస్తోంది.
• సికింద్రాబాద్‌ సర్వేయర్‌ కేసు గత నెలలోనే జరిగింది. 2025 నవంబర్‌లో సికింద్రాబాద్‌ తహశీల్దార్‌ కార్యాలయంలో మండల సర్వేయర్‌ కలువ కిరణ్‌కుమార్‌ అతని సహాయకుడు మేకల భాస్కర్‌లు రూ.1లక్ష లంచం తీసుకుంటూ రెడ్‌ హ్యాండెడ్‌గా పట్టుబడ్డారు. భూమి సర్వే, అనుమతుల కోసం మొత్తం రూ.3లక్షలు డిమాండ్‌ చేశారు. ఇతనికి నిజామాబాద్‌ జిల్లాలోనూ ఆస్తులు కూడబెట్టి ఉండటంతో ఏసీబీ దాడుల్లో పలు కీలకమైన పత్రాలను స్వాధీనం చేసుకుని దర్యాప్తు చేస్తున్నారు. ఇతనికి ప్రధానంగా సర్వే అండ్‌ ల్యాండ్‌ రికార్డ్స్‌ శాఖకు చెందిన సంఘం నాయకుడి పాత్ర తెర వెనుక ఉన్నట్లుగా ఏసీబీ అధికారులు నిర్ధారించారు. సదరు ఉద్యోగ సంఘం నేతపై నిఘా పెట్టినట్లుగా ప్రచారం జరుగుతోంది.
• గత నెలలోనే రూ.20వేలు లంచం తీసుకుంటూ ఆర్మూర్‌ మున్సిపల్‌ కమిషనర్‌ రాజు పట్టుబడ్డాడు. లెక్కకు చూపని రూ.4.30లక్షలు నగదు సైతం ఏసీబీకి చిక్కింది. కట్టల కొద్దీ డబ్బుతో పట్టుబడిన కమిషనర్‌ రాజుపై అనేక ఆరోపణలు ఉన్నాయి. ప్రతి పనికి డబ్బులు వసూలు చేసి ప్రజలను పీల్చి పిప్పి చేసినట్లుగా తెలుస్తోంది.
• నిజామాబాద్‌ జిల్లా ఆర్మూర్‌లో ఈ ఏడాది ఆగస్టులోనే మెటార్‌ వెహికిల్‌ ఇన్‌స్పెక్టర్‌ గుర్రం వివేకానంద రెడ్డి రూ.25వేల లంచంతో దొరికాడు. మే నెలలో మాక్లూర్‌ మండలంలో పంచాయతీ సెక్రటరీ గంగా మోహన్‌ రూ.18వేల లంచంతో ఏసీబీకి చిక్కాడు.
• నిజామాబాద్‌ మున్సిపల్‌ కార్పొరేషన్‌లో 2024 ఆగస్టులో ఏసీబీ దాడుల్లో రెవెన్యూ విభాగం ఇన్‌ఛార్జి దాసరి నరేందర్‌ ఇంట్లో రూ.2.93 కోట్ల నగదు, బంగారు ఆభరణాలు స్వాధీనం చేసుకున్నారు. మొత్తం అక్రమ ఆస్తుల విలువ రూ.6.07కోట్లుగా ఏసీబీ తేల్చింది. ఇది ఎక్కువగా అనుమతుల మంజూరు, ట్యాక్స్‌ అసెస్‌మెంట్‌ వంటి రెవెన్యూ పనుల్లో అవినీతి ద్వారా సమకూర్చుకున్నట్లుగా తెలుస్తోంది. లంచం తీసుకుంటూ పట్టుబడిన అక్రమార్కులు అనేకులు ఉండగా భారీగా నోట్ల కట్టలతో ఏసీబీకి అడ్డంగా దొరికిన కేసులు సంచలనం రేపుతున్నాయి.