JEE Main | మరో 5 రోజుల్లో ముగియనున్న జేఈఈ మెయిన్‌ రిజిస్ట్రేషన్‌ గడువు.. డిసెంబర్‌ 1న కరెక్షన్‌ విండో ఓపెన్‌

ఐఐటీలు, ఎన్‌ఐటీల్లోని బీఈ లేదా బీటెక్‌, బీఆర్క్‌, బీప్లానింగ్‌ కోర్సుల్లో సీట్ల భర్తీకి నిర్వహించే జేఈఈ మెయిన్‌-1లో (JEE Main) రిజిస్ట్రేషన్‌ గడువు మరో 5 రోజుల్లో ముగియనుంది. అక్టోబర్‌ 31న ప్రారంభమైన దరఖాస్తుల స్వీకరణ నవంబర్‌ 27న రాత్రి 9 గంటలకు ముగియనున్నాయి. అదేరోజు రాత్రి 11.50 గంటల్లోగా ఆన్‌లైన్‌లో ఫీజు చెల్లించాల్సి ఉంటుంది.

హైదరాబాద్‌: ఐఐటీలు, ఎన్‌ఐటీల్లోని బీఈ లేదా బీటెక్‌, బీఆర్క్‌, బీప్లానింగ్‌ కోర్సుల్లో సీట్ల భర్తీకి నిర్వహించే జేఈఈ మెయిన్‌-1లో (JEE Main) రిజిస్ట్రేషన్‌ గడువు మరో 5 రోజుల్లో ముగియనుంది. అక్టోబర్‌ 31న ప్రారంభమైన దరఖాస్తుల స్వీకరణ నవంబర్‌ 27న రాత్రి 9 గంటలకు ముగియనున్నాయి. అదేరోజు రాత్రి 11.50 గంటల్లోగా ఆన్‌లైన్‌లో ఫీజు చెల్లించాల్సి ఉంటుంది. ఆన్‌లైన్‌లో దరఖాస్తు సమయంలో ఏవైన పొరపాట్లు చేస్తే సరిదిద్దుకోవడానికి.. కరెక్షన్‌ విండో (Correction Window) డిసెంబర్‌ 1న తెరచుకోనున్నది. అదే నెల 2న రాత్రి 11.50 గంటలకు కరెక్షన్‌ అప్లికేషన్‌ ఫామ్‌ క్లోజ్‌ కానుంది. ఇక మొదటి సెషన్‌ పరీక్షలను 2026 జనవరి 21 నుంచి 30 మధ్య పరీక్షలు నిర్వహించనున్నట్లు నేషనల్‌ టెస్టింగ్‌ ఏజెన్సీ (NTA) ఇప్పటికే ప్రకటించింది. ఏయే కేంద్రాల్లో పరీక్ష కేంద్రాలు కేటాయించేది జనవరి మొదటి వారంలో ప్రకటిస్తామని తెలిపింది. అదేవిధంగా పరీక్షకు మూడు నాలుగు రోజుల ముందు అడ్మిట్‌ కార్డులను విడుదల చేయనుంది. పరీక్షల ఫలితాలను ఫిబ్రవరి 12న ప్రకటించనుంది. తెలుగు, హిందీ, ఇంగ్లీష్‌ సహా మొత్తం 13 భాషల్లో పరీక్షలను నిర్వహిస్తున్నది.

కాగా, ఈ సారి ఫిజికల్‌ కాలిక్యులేటర్లను (Calculators) అనుమతించడం లేదని ఎన్‌టీఏ స్పష్టం చేసింది. కొత్తగా ఆన్‌స్క్రీన్‌ వర్చువల్‌ కాలిక్యులేటర్‌ కంప్యూటర్‌ తెరపైనే ప్రత్యక్షమవుతుందని తెలిపింది. ప్రాథమిక లెక్కల కోసం దీనిని వాడుకోవచ్చని సూచించింది. వివరాల కోసం విద్యార్థులు https ://jeemain.nta.nic.in వెబ్‌సైట్‌ను సంప్రదించవచ్చు. నిరుడు 14 లక్షల మంది విద్యార్థులు దరఖాస్తు చేసుకున్నారు. ఈ సారి దరఖాస్తుల సంఖ్య మరింత పెరిగే అవకాశాలు కనిపిస్తున్నాయి. ఈ పరీక్షను తెలుగు సహా 13 భాషల్లో నిర్వహిస్తున్నారు. 2025లోనే కొన్ని పాఠ్యాంశాలను తగ్గించారు. నిరుటితో పోల్చితే సిలబస్‌, పరీక్షావిధానంలో ఎలాంటి మార్పుల్లేవు.

ముఖ్యమైన అంశాలివే..

• అప్లికేషన్‌ సమయంలో గుర్తింపు నిర్ధారణ కోసం వెబ్‌కామ్‌ ద్వారా లైవ్‌ ఫొటో క్యాప్చర్‌తో ఫొటో తీస్తారు. ఇందుకు వెబ్‌కామ్‌ను అందుబాటులో ఉంచుకోవాలి.
• ఎన్‌ఐటీలు, ఐఐటీల్లో ప్రవేశం పొందాలంటే 12వ తరగతి బోర్డు పరీక్షల్లో 75% మార్కులు సాధించి ఉండాలి.
• సెక్షన్‌-ఏ, సెక్షన్‌ -బీ రెండింటిలోనూ నెగెటివ్‌ మార్కులుంటాయి. సరైన సమాధానానికి 4, తప్పు సమాధానానికి 1 మార్కు కోత విధిస్తారు.
• సెక్షన్‌ -బీలో ఆప్షనల్‌ ప్రశ్నలుండవు. ఈ సెక్షన్‌లో 5 ప్రశ్నలిస్తారు. అన్నింటికి సమాధానాలు రాయాల్సిందే. ఇక సెక్షన్‌ -ఏలో ప్రతి సబ్జెక్టుకు 20 బహుళైచ్చిక ప్రశ్నలుంటాయి.
• ఆధార్‌కార్డులో పేరు, పుట్టిన తేదీలు పదో తరగతి సర్టిఫికెట్‌ ప్రకారం ఉండాలి. ఆధార్‌లో తాజా ఫొటో, ఇంటి అడ్రస్‌, తండ్రిపేర్లు సరిగ్గా ఉండాలి.లేదంటే అప్‌డేట్‌ చేయించుకోవాలి.
• దివ్యాంగ అభ్యర్థులకు యూడీఐడీ కార్డు చెల్లుబాటవుతుంది. ఈ కార్డును రెన్యువల్‌ చేసుకుని ఉండాలి.
• ఈడబ్ల్యూఎస్‌, ఎస్సీ, ఎస్టీ, ఓబీసీ ఎన్‌సీఎల్‌ సర్టిఫికెట్లు చెల్లుబాటయ్యేవి అయి ఉండాలి. పాతవి ఉంటే కొత్తవి తీసుకోవడం ఉత్తమం.