BTech | బీటెక్‌ మేనేజ్‌మెంట్‌ కోటా ఫీజులో భారీ పెంపు.. మూడు రెట్లు పెంచే ఛాన్స్‌!

రాష్ట్రంలోని బీటెక్‌ మేనేజ్‌మెంట్‌ కోటా ఫీజులను ఖరారు చేసేందుకు ప్రభుత్వం సన్నాహాలు చేస్తున్నది. బీ-క్యాటగిరీ కోటా ఫీజులను కన్వీనర్‌ కోటా సీట్ల ఫీజుకు అదనంగా మూడు రెట్లు పెంచే అవకాశముంది.

BTech | హైదరాబాద్‌, డిసెంబర్‌ 3 (నమస్తే తెలంగాణ): రాష్ట్రంలోని బీటెక్‌ మేనేజ్‌మెంట్‌ కోటా ఫీజులను ఖరారు చేసేందుకు ప్రభుత్వం సన్నాహాలు చేస్తున్నది. బీ-క్యాటగిరీ కోటా ఫీజులను కన్వీనర్‌ కోటా సీట్ల ఫీజుకు అదనంగా మూడు రెట్లు పెంచే అవకాశముంది. సాక్షాత్తు ప్రభుత్వమే అధికారింగా ఫీజులను పెంచనుంది. ఇందుకు మూడు ప్రతిపాదనలు రూపొందించిన ఉన్నత విద్యామండలి త్వరలోనే ప్రభుత్వం ముందుంచనుంది.

రాష్ట్రంలో బీటెక్‌ బీ-క్యాటగిరీ సీట్ల భర్తీలో అక్రమాలు జరుగుతున్నాయి. సీఎస్‌ఈ వంటి డిమాండ్‌ ఉన్న సీట్లను రూ. 14-16లక్షలకు అమ్ముకుంటున్న దాఖలాలున్నాయి. దీంతో బీ-క్యాటగిరీ సీట్లను ఆన్‌లైన్‌లో భర్తీచేయాలని ప్రభుత్వం నిర్ణయించింది. ఇందుకు కొన్ని కాలేజీలు సైతం సుముఖత వ్యక్తంచేశాయి. కన్వీనర్‌యే ఈ సీట్లను భర్తీచేయనుండటంతో తొలుత ఫీజులను ఖరారు చేయాల్సి ఉంది. ఈ నేపథ్యంలోనే ఉన్నత విద్యామండలి పలు ప్రతిపాదనలను సిద్ధం చేసింది.

ఇవి ప్రతిపాదనలు..

• బీ-క్యాటగిరీ సీట్లను ప్రభుత్వమే కౌన్సెలింగ్‌ ద్వారా భర్తీచేస్తుంది. ఫీజులు ప్రభుత్వ పరిధిలో ఉండవు. నిర్ణయించిన ఫీజులను కాలేజీలు వసూలు చేసుకుంటాయి. మెరిట్‌ ఉన్నవారికే సీట్లొస్తాయి. బీ-క్యాటగిరీ సీట్ల ఫీజులు కన్వీనర్‌ కోటా కన్నా మూడు రెట్లు, సీ-క్యాటగిరీ ఫీజులు మరో రెండు రెట్లు అధికంగా ఉంటాయి.
• బీ-క్యాటగిరీ, సీ-క్యాటగిరీ సీట్లకు ఫీజులను ప్రభుత్వమే నిర్ణయిస్తుంది. కన్వీనర్‌ కోటా కన్నా మూడు రెట్లు ఫీజులు అధికంగా ఉంటాయి. టీఏఎఫ్‌ఆర్‌సీ ఒక కాలేజీ ఫీజు రూ.1.3 లక్షలుగా ఖరారుచేస్తే, బీ-క్యాటగిరీ కింద రూ.3.9లక్షలు, సీ-క్యాటగిరీ కింద మరో రెండు రెట్లు అనుమతిస్తాయి.
• నీట్‌లో ఎంబీబీఎస్‌ సీట్ల భర్తీకి అనుసరిస్తున్న విధానాన్ని అనుసరించాలని మరో ప్రతిపాదన చేశారు. దీంట్లోనూ సీట్ల భర్తీ ఆన్‌లైన్‌లో ఉంటుంది. ఫీజులను ప్రభుత్వమే నిర్ణయిస్తుంది.