గిన్నిస్‌ రికార్డు గోర్లు.. 30 ఏండ్ల తర్వాత కత్తిరింపు

చేతి వేళ్లకు అతిపొడవైన గోర్లు పెంచి గిన్నిస్‌ రికార్డుల్లో చోటు సంపాదించుకున్న ఓ అమ్మడు.. సరిగ్గా 30 ఏండ్ల తర్వాత ఆ గోర్లను కత్తిరించుకున్నది

April 8, 2021 / 07:34 PM IST

గిన్నిస్‌ రికార్డు గోర్లు.. 30 ఏండ్ల తర్వాత కత్తిరింపు

టెక్సాస్‌ : చేతి వేళ్లకు అతిపొడవైన గోర్లు పెంచి గిన్నిస్‌ రికార్డుల్లో చోటు సంపాదించుకున్న ఓ అమ్మడు.. సరిగ్గా 30 ఏండ్ల తర్వాత ఆ గోర్లను కత్తిరించుకున్నది. గత కొన్నాళ్లుగా తన పొడవాటి గోర్లతో ఇబ్బందులు పడుతుండటంతో వాటిని కత్తిరించుకోవాలని నిర్ణయించుకుని.. ఆ మేరకు వైద్యుల సమక్షంలో గోర్లను తొలగించుకున్నది.

పొడవైన వేలి గోర్లకు గిన్నిస్ వరల్డ్ రికార్డ్ టైటిల్‌ను కైవసం చేసుకున్న టెక్సాన్ మహిళ అయన్నా విలియమ్స్.. చివరకు 30 సంవత్సరాల తర్వాత తన గోళ్లను కత్తిరించుకున్నది. విలియమ్స్ చేతి గోర్లు 2017 లో కొలిచినప్పుడు దాదాపు 19 అడుగుల పొడవు ఉన్నాయి. చాలా పొడవైన వేలి గోర్లకు గిన్నిస్ రికార్డును బద్దలు కొట్టారు. ఆమె తన రెండు చేతుల గోర్లకు నెయిల్‌పాలిష్‌ చేసుకోవడానికి రెండు సీసాల నెయిల్ పాలిష్ అవసరమయ్యేది. అలాగే నెయిల్‌ పాలిష్‌ చేసుకోవడానికి దాదాపు 20 గంటల సమయం పట్టేది.

గత కొన్నిరోజులుగా తన పొడవాటి గోర్లతో ఇబ్బందులు రావడంతో 30 ఏండ్లనాటి గోర్లను తొలగించుకోవాలని విలియమ్స్‌ నిర్ణయించుఉన్నది. టెక్సాస్‌లోని ఫోర్ట్‌వర్త్‌ చర్మవ్యాధి దవాఖానలతో సంప్రదించి వారి సమక్షంలో తన గోర్లను కత్తిరించుకున్నది. ఆ సమయంలో వాటిని కొలవగా.. 24 అడుగుల 0.7 అంగుళాలుగా తేలాయి.

అయన్నా తన పొడవాటి గోర్లతో రోజువారీ ఇబ్బందులను ఎదుర్కొన్నది. వంట చేయడం, వంటపాత్రలు కడగటం, మంచంపై దుప్పట్లు పరవడం వంటి కొన్ని కార్యకలాపాలను చేయలేకపోయింది. ఇప్పుడు గోర్లను కత్తిరించుకోవడంతో అలాంటి పనులన్నింటినీ చిటికెలో చేసేస్తానంటోంది ఆమె. ఇప్పుడు నా గోర్లను అందంగా ముస్తాబు చేసుకుని ప్రత్యేకతను చాటుకుంటానని చెప్తుందా అమ్మడు.