వర్క్‌ ఫ్రం హోంకే మొగ్గు

• 82 శాతం ఉద్యోగుల మనోగతం

న్యూఢిల్లీ, జనవరి 29: కొవిడ్‌-19 సంక్షోభంతో పని విధానంలో వచ్చిన అనూహ్యమైన మార్పులు కొనసాగాలనే అత్యధిక శాతం ఉద్యోగులు కోరుకుంటు న్నారు. ఆఫీసుకు వెళ్లి పనిచేసేకంటే వర్క్‌ ఫ్రం హోం విధానంపైనే 82 శాతం ఉద్యోగులు మొగ్గు చూపిస్తున్నట్లు జాబ్‌సైట్‌ ఎస్‌సికే నిర్వహించిన అధ్యయనం ద్వారా వెల్లడయ్యింది. పాండమిక్‌ కారణంగా తప్పనిసరి పరిస్థితుల్లో అమల్లోకి వచ్చిన ఇంటి నుంచి పని విధానం ఇప్పుడు సాధారణమైపోయిందని, దీంతో కొత్త ఆలోచనలు ఏర్పడ్డాయని ఎస్‌సికే వివరించింది. సర్వేలు, సోషల్‌ మీడియా అభిప్రాయాలు, ఇంటర్వ్యూలు, ప్యానెల్‌ చర్చల ఆధారంగా నాలుగు ఖండాల్లో 100కి పైగా సీ-సూట్‌, హెచ్‌ఆర్‌ లీడర్ల నుంచి పొందిన విశ్లేషణలతో ఈ టాలెంట్‌ టెక్‌ అవుట్‌లుక్‌ 2022 అధ్యయనాన్ని రూపొందించినట్లు సంస్థ తెలిపింది.

• ఇంటి నుంచి చేసే పనిలో తాము మరింత ఉత్పాదకతను సాధిస్తున్నామని, తక్కువ ఒత్తిడికి లోనవుతున్నామని 64 శాతం ఉద్యోగులు తెలిపారు.
• ఫుల్‌ టైమ్‌ ఆఫీసు నుంచి పనిచేసేందుకు ఉద్యోగుల్ని నియమించుకోవడం కష్టతరంగా మారిందని 80 శాతం మంది హెచ్‌ఆర్‌ మేనేజర్లు అంగీకరించారు.
• ఉద్యోగుల్ని ముఖాముఖి కలవడానికి బదులు వర్చువల్‌గా మాట్లాడటం సాధారణమై పోయిందని హెచ్‌ఆర్‌ హెడ్స్‌ పేర్కొన్నారు.
• వర్క్‌ ఫ్రం హోం అనేది ఇక ఉద్యోగికి ఛాయిస్‌గా లేదు. ప్రతీ టెక్కీ యజమాన్యం నుంచి ఇదే కోరుకుంటున్నాడు. మంచి నిపుణుల్ని నియమించుకోవడం, వారిని నిలుపుకోవడంలో సవాళ్లు ఎదురవుతున్నందున యాజమాన్యాలు కూడా వర్క్‌ ఫ్రం హోం విధానాన్ని మార్చాలనుకోవడం లేదు.
• కంపెనీలు..సరిగ్గా వినియోగించుకోలేని ఉద్యోగులకు వెంటనే ప్రత్యామ్నాయాలు లభిస్తున్నాయి. కొవిడ్‌ ముందస్తుకాలంకంటే వేగంగా కంపెనీల నుంచి వైదొలుగుతున్నారు.
• రిమోట్‌ వర్కింగ్‌ అనేది సర్వసాధారణంకావడంతో ఆఫీసులు అప్పుడప్పుడు సమావేశ కేంద్రాలుగా, ప్రత్నామ్నాయ పని ప్రాంతాలుగా మారుతున్నాయి.