స్టాకబుల్‌ జువెలరీ ఎందుకంత ఆకట్టుకుంటుంది? వీటి స్పెషాలిటీ ఏంటి?

Stackable Jewelry | ఫ్యాషనబుల్‌ ఆభరణాలను ధరించేవారిని అమితంగా ఆకర్షిస్తున్న లేటెస్ట్‌ సిరీస్‌.. ‘స్టాకబుల్‌ జువెలరీ’. నాలుగైదు వరుసల్లో హుందాగా అమరిపోయే ఈ నాజూకు నగలకు ఎన్నో ప్రత్యేకతలు.

Stackable Jewelry | అతివల అలంకరణలో అగ్రస్థానం ఆభరణాలదే. ఒక్కొక్కరిది ఒక్కో అభిరుచి. కొందరు భారీ నగలు ధరించి నిండుగా మెరిసిపోవాలని కోరుకుంటారు, మరికొందరు తేలికపాటి ఆభరణాలతో హుందాగా కనిపించాలని అనుకుంటారు. ఫ్యాషనబుల్‌ ఆభరణాలను ధరించేవారిని అమితంగా ఆకర్షిస్తున్న లేటెస్ట్‌ సిరీస్‌.. ‘స్టాకబుల్‌ జువెలరీ’. నాలుగైదు వరుసల్లో హుందాగా అమరిపోయే ఈ నాజూకు నగలకు ఎన్నో ప్రత్యేకతలు.

సందర్భం ఏదైనా చక్కగా ముస్తాబు కావాలనే కోరుకుంటారు మహిళలు. అందులోనూ సంప్రదాయంతోపాటు ఆధునిక హంగులున్న దుస్తులను ఇష్టపడతారు. వాటికి నప్పేలా నగలను ఎంచుకుంటారు. అలాంటివారికోసం వచ్చినవే.. స్టాకబుల్‌ ఆభరణాలు. ఈ నగలు బంగారం, వెండి, ప్లాటినమ్‌తోపాటు చవకైన లోహాల్లోనూ అందుబాటులో ఉన్నాయి.

అయితే మిగతా వాటికంటే ఇవి కాస్త భిన్నంగా కనిపిస్తాయి. ఒక్కొక్కటిగా కాకుండా నాలుగైదు వరుసల్లో ధరిస్తారు.

ఒకే డిజైన్‌లో వేరువేరు కొలతలున్న గొలుసుల్ని ధరిస్తే.. ఆ ఆకర్షణే వేరు. నెలవంక, నక్షత్రాలు, చిట్టిచిట్టి పూలు, వాన చినుకులను పోలిన చిన్నచిన్న లాకెట్లను వీటికి జతచేస్తారు.

చేతికి నాలుగైదు వరుసల్లో సన్నటి గొలుసుల్ని బ్రేస్‌లెట్లుగా అలంకరించుకుంటారు. ఒకే వేలికి నాలుగైదు వరుసల్లో వింతవింత ఉంగరాలూ ధరిస్తారు. చెవులకు కూడా నాలుగైదు జతలుగా ముస్తాబుచేసుకునే ఆభరణాలూ అందుబాటులో ఉన్నాయి.

ఒకే లోహంతో చేసిన గొలుసుల్ని లేదా వేరువేరు లోహాలతో చేసిన గొలుసుల్ని కలగలిపి వరుసలుగా అలంకరించుకోవచ్చు.

పసిమి ఛాయతో మెరిసే బంగారం మధ్యలో వెండి, ప్లాటినం మరింతగా ధగధగలాడతాయి. టెర్రకోట, త్రెడ్‌, సిల్క్‌, ఫ్యాబ్రిక్‌ ఆభరణాలకూ స్టాకబుల్‌ సొబగులద్దుతున్నారు డిజైనర్లు.

Read More :

“లెద‌ర్‌తో త‌యారు చేసిన బ్యాగులు, బెల్టులు మాత్ర‌మే కాదు.. జువెల్ల‌రీ కూడా ఫేమ‌స్సే !!”