పెళ్లయిన 45 రోజులకే భర్త హత్యకు ప్లాన్‌.. భార్య, ప్రియుడు సహా ముగ్గురు అరెస్ట్‌

పెళ్లయిన 45 రోజులకే భర్తను హత్య చేసేందుకు భార్య ప్రియుడితో కలిసి పథకం రచించిన ఘటన వనపర్తి జిల్లా కేంద్రంలోని బ్రహ్మంగారి వీధిలో వెలుగుచూసింది. భర్త షబ్బీర్‌ను హత్య చేసేందుకు ప్రయత్నించినట్లు భార్య షాహిదా బేగం, ఆమె ప్రియుడు షాకీర్‌, అతడి స్నేహితుడు మహేశ్వర్‌ లాల్‌ను పోలీసులు అరెస్ట్‌ చేశారు.

పెళ్లయిన 45 రోజులకే భర్తను హత్య చేసేందుకు భార్య ప్రియుడితో కలిసి పథకం రచించిన ఘటన వనపర్తి జిల్లా కేంద్రంలోని బ్రహ్మంగారి వీధిలో వెలుగుచూసింది. భర్త షబ్బీర్‌ను హత్య చేసేందుకు ప్రయత్నించినట్లు భార్య షాహిదా బేగం, ఆమె ప్రియుడు షాకీర్‌, అతడి స్నేహితుడు మహేశ్వర్‌ లాల్‌ను పోలీసులు అరెస్ట్‌ చేశారు.

వివరాల్లోకి వెళ్తే.. నాగర్‌కర్నూల్‌ జిల్లాకు చెందిన షాహిదా బేగంతో షబ్బీర్‌కు 45 రోజుల క్రితం వివాహమైంది. అయితే, పెళ్లికి ముందే హైదరాబాద్‌కు చెందిన తన సమీప బంధువు షాకీర్‌తో షాహిదా ప్రేమలో ఉంది. వివాహం తర్వాత కూడా అతడిని మర్చిపోలేకపోయిన ఆమె.. ప్రియుడితో కలిసి భర్తను హత్య చేసేందుకు పథకం వేసింది.

తమ ప్లాన్‌లో భాగంగా ఈ నెల 15న షబ్బీర్‌ నిద్రిస్తున్న సమయంలో తన స్నేహితుడు మహేశ్వర్‌లాల్‌తో కలిసి షాకీర్ వాళ్లింటికి వెళ్లాడు. మహేశ్వర్ ఇంటి బయట ఉండగా.. షాకిర్ బయట బైక్‌‌పై కాపలా ఉన్నాడు. అనంతరం షాహిదా తన భర్త చేతులను పట్టుకోగా, షాకీర్‌ బెల్టుతో గొంతు బిగించి హత్య చేసేందుకు ప్రయత్నించాడు. అయితే, షబ్బీర్‌ గట్టిగా కేకలు వేయడంతో కుటుంబ సభ్యులు మేల్కొని తలుపు తట్టారు. దీంతో నిందితులు అక్కడి నుంచి పారిపోయేందుకు ప్రయత్నించారు. అప్రమత్తమైన కుటుంబ సభ్యులు వారిని పట్టుకున్నారు.

ఈ ఘటనపై సమాచారం అందుకున్న పోలీసులు వెంటనే ఘటనాస్థలానికి చేరుకుని షాహిదా బేగం, షాకీర్‌, మహేశ్వర్‌ లాల్‌ను అదుపులోకి తీసుకున్నారు. అనంతరం వారిని అరెస్ట్‌ చేశారు.