రష్యా నుంచి వైదొలిగిన అమెరికా రాయబారి

రష్యా నుంచి అమెరికా రాయబారి జాన్ సుల్లివన్‌ వైదొలిగారు. ఇరు దేశాల మధ్య నెలకొన్న ఉద్రిక్తతల నేపథ్యంలో ఇది కీలక నిర్ణయంగా నిపుణులు భావిస్తున్నారు.

April 20, 2021 / 04:24 PM IST

వాషింగ్టన్‌ : రష్యా నుంచి అమెరికా రాయబారి జాన్ సుల్లివన్‌ వైదొలిగారు. ఇరు దేశాల మధ్య నెలకొన్న ఉద్రిక్తతల నేపథ్యంలో ఇది కీలక నిర్ణయంగా నిపుణులు భావిస్తున్నారు. అమెరికా రాయబార కార్యాలయం ఈ సమాచారం ఇచ్చింది. రెండు దేశాల మధ్య ఉద్రిక్తతలు తగ్గేంతవరకు జాన్ సుల్లివన్ తాత్కాలికంగా అమెరికాలో ఉంటారని రాయబార కార్యాలయం తెలిపింది.

గత వారం జో బైడెన్ ప్రభుత్వం 10 మంది రష్యా దౌత్యవేత్తలను బహిష్కరిస్తున్నట్లు ప్రకటించింది. రష్యాలోని మూడు డజన్లకు పైగా అధికారులు, సంస్థలపై ఆంక్షలు విధించింది. గత ఏడాది జరిగిన అమెరికా అధ్యక్ష ఎన్నికల్లో జోక్యం చేసుకున్నదని, ఫెడరల్ ఏజెన్సీల ఉల్లంఘన వెనుక మాస్కో హస్తం ఉన్నదని రష్యాపై ఆరోపణలు వచ్చాయి.

రష్యాకు చెందినవారు కనీసం తొమ్మిది ఏజెన్సీలు నెట్‌వర్క్‌లను హ్యాక్ చేయడానికి సాఫ్ట్‌వేర్‌ను ఉపయోగించి విస్తృతంగా ఉల్లంఘనలకు పాల్పడినట్లు భావిస్తున్నారు. వారు యూఎస్‌ ప్రభుత్వం నుంచి రహస్యంగా సమాచారాన్ని సేకరించడానికి ప్రయత్నించారని అమెరికా అధికారులు అనుమానిస్తున్నారు. డొనాల్డ్‌ ట్రంప్ తిరిగి అమెరికా అధ్యక్షుడయ్యేలా సాయం చేసే కార్యక్రమాలకు రష్యా అధ్యక్షుడు వ్లాదిమిర్ పుతిన్ ఆమోదించారని అమెరికా అధికారులు గత నెలలో ఆరోపించారు.