బంగారు కాసులంటే ఆడవాళ్లకు తగని మోజు. మనసుంటే ఆ సంప్రదాయ అలంకరణను స్టయిల్ స్టేట్మెంట్గా మార్చేసి ఫ్యాషన్ వీధిలో ప్రవేశపెట్టవచ్చు. పసిడి పతకాల్లోనే కాదు, రజత పతకాల్లోనూ మెరిపించవచ్చు. అదెలా అంటారా? ఇదిగో ఇలా.. కస్తూరి సొమ్ముల్లో కలిసిపోయిన ‘కాయిన్ నగల’ను చూస్తే మీకే తెలుస్తుంది మరి!
కొత్త అంటే ఆకాశంలోంచి ఊడిపడదు. కొన్నిసార్లు పాతలోంచి కూడా పుట్టుకురావచ్చు. గమ్మత్తుగా కనిపిస్తూ అందరినీ అలరించవచ్చు. నయా ట్రెండ్గా మారిన ‘కాయిన్ జువెలరీ’ కూడా అంతే. మన చేతుల్లో ఆడిన నాణేలు, విదేశాల్లో కనిపించే రూపాయలు, బొమ్మలు చిత్రించిన బిళ్లలనే తన కలెక్షన్లో పొదువుకుంది. వాటికే ఆభరణాల హంగులన్నీ అద్ది ఆకట్టుకునేలా చూపిస్తున్నది. అంతేకాదు, మది దోచే ముస్తాబు విషయంలో పాత నుంచి కొత్తలోకి పరకాయ ప్రవేశం చేసింది. ఇన్ని మార్పులు చేశాక, ఆ బిళ్లల నగలు ఆడపిల్లలను అబ్బో అనిపించకుండా ఎందుకుంటాయి? ఆ తర్వాత అవి మరిన్ని హంగులద్దుకోకుండా ఎందుకు ఊరుకుంటాయి? అందుకే నెక్లెసులు, దుద్దులు, జుంకాలు, ఉంగరాలు, తాళం గుత్తులు… ఇలా సొమ్ములన్నిటిలోనూ కాయిన్ నగలు సొగసులీనుతున్నాయి.
ప్రస్తుతం చెలామణిలో ఉన్న రూపాయి నుంచి పాతకాలం నాటి పదిపైసలు, ఐదుపైసల బిళ్లల దాకా రకరకాల కాయిన్లు వీటిలో ఉంటున్నాయి. అంతేకాదు రాణుల బొమ్మలు, పేర్లు చెక్కిన నాణేలు, మనసైన వాళ్లకు శుభాకాంక్షలు కూడా వీటికి జోడవుతున్నాయి. అమ్మవారు, రాధాకృష్ణుల ప్రతిరూపాలతో తీర్చిదిద్దిన కాయిన్లూ ఇందులో వస్తున్నాయి. మొత్తానికి నగల్లో నాణేలు ఇలా నాణ్యంగా ఒదిగిపోయాయన్నమాట!