ఆదిలోనే గుర్తించండి..

వైద్యరంగంలో రకరకాల రుగ్మతలు.. వివిధ చికిత్సా విధానాలు ఉంటాయి. ఒక్కోదానికి ఒక్కో కారణం కూడా ఉంటుంది. అయితే కొన్ని ఆరోగ్య సమస్యలు జన్యుపరంగా వస్తాయి. వాటిలో కొన్ని అరుదుగా కనిపిస్తాయి. ‘బ్లూమ్‌ సిండ్రోమ్‌' అలాంటిదే. ఈ అరుదైన జన్యులోపం వల్ల మనుషుల్లో ఎదుగుదల కుంటుపడటం, సన్‌ సెన్సిటివిటీ (సూర్యరశ్మివల్ల ఇబ్బంది), క్యాన్సర్‌ వచ్చే అవకాశం తదితర రుగ్మతలు సోకుతాయి.

వైద్యరంగంలో రకరకాల రుగ్మతలు.. వివిధ చికిత్సా విధానాలు ఉంటాయి. ఒక్కోదానికి ఒక్కో కారణం కూడా ఉంటుంది. అయితే కొన్ని ఆరోగ్య సమస్యలు జన్యుపరంగా వస్తాయి. వాటిలో కొన్ని అరుదుగా కనిపిస్తాయి. ‘బ్లూమ్‌ సిండ్రోమ్‌’ అలాంటిదే. ఈ అరుదైన జన్యులోపం వల్ల మనుషుల్లో ఎదుగుదల కుంటుపడటం, సన్‌ సెన్సిటివిటీ (సూర్యరశ్మివల్ల ఇబ్బంది), క్యాన్సర్‌ వచ్చే అవకాశం తదితర రుగ్మతలు సోకుతాయి.
ఇవన్నీ బీఎల్‌ఎమ్‌ జన్యువులోని ఉత్పరివర్తనాల నుంచి తలెత్తుతాయి. లక్షణాలు త్వరగా గుర్తించి, జాగ్రత్తలు తీసుకుంటే జీవితాన్ని సాఫీగా సాగించొచ్చు.

లక్షణాలు

• ఈ జన్యుపరమైన సమస్య వల్ల శిశువుల్లో ఎదుగుదల లోపం ఉంటుంది. వయసు పెరిగినా, ఎత్తు మాత్రం ఐదు అడుగుల లోపే ఉంటుంది.
• ముఖం, ముక్కు, చెవులు కుంచించుకుపోయినట్లుగా ఉంటాయి.
• కాస్తంత ఎండ తగిలినా ముఖం ఎర్రగా మారుతుంది. చర్మంపై దద్దుర్లు వచ్చేస్తాయి. వీటితో పాటు చర్మంపై ఎరుపు లేదా గులాబీ రంగుల్లో గీతలు ఏర్పడతాయి.
• స్వరం కూడా గట్టిగా ఉంటుంది.
• బాల్యం నుంచే రకరకాల ఇన్ఫెక్షన్లు ఇబ్బంది పెడతాయి. ముఖ్యంగా చెవి, ఊపిరితిత్తుల సమస్యలు ఎక్కువగా వస్తాయి.
• తెలివితేటలు సాధారణంగానే ఉన్నా, కొందరిలో అభ్యాసనా లోపాలు కనిపిస్తాయి. అలాగే సంతానలేమి సమస్యలు కూడా ఉంటాయి.

ప్రమాద స్థాయి సమస్యలు..

• ఈ బ్లూమ్‌ సిండ్రోమ్‌ ఉన్నవాళ్లకు క్యాన్సర్‌ రిస్క్‌ ఎక్కువగా ఉంటుంది. అక్యూట్‌ లుకేమియా, లింఫోనియా, గ్యాస్ట్రోఇన్టెస్టినల్‌ క్యాన్సర్లు, చర్మ క్యాన్సర్‌ మొదలైనవి వచ్చే ప్రమాదం ఉంది.
• ఇన్సులిన్‌ నిరోధకత ఉండటంవల్ల మధుమేహం వచ్చే అవకాశాలు ఎక్కువగా ఉంటాయి.
• క్రానిక్‌ అబ్‌స్ట్రక్టివ్‌ పల్మనరీ డిసీజ్‌ (సీఓపీడీ)తో పాటు తీవ్రమైన శ్వాసకోశ సమస్యలు వచ్చే ప్రమాదం ఉంటుంది.
• రోగనిరోధక వ్యవస్థలో లోపాలు ఉంటాయి.

చికిత్స-నిర్వహణ..

• ఈ బ్లూమ్‌ సిండ్రోమ్‌కు ప్రత్యేకమైన చికిత్స అంటూ లేదు. కాకపోతే లక్షణాలను బట్టి సమస్య నుంచి ఉపశమనం పొందొచ్చు.
• చిన్నప్పట్నుంచి పోషకాహార లోపం లేకుండా చూడాలి. అన్నిరకాల పోషకాలు ఉండే ఆహారం తినాలి.
• ఎత్తు పెరగడం కోసం ఇతర ప్రయత్నాలు చేయొద్దు. దానివల్ల ట్యూమర్‌ రిస్క్‌ ఉంటుంది.
• ఇన్ఫెక్షన్లు సోకినప్పుడు ఆలస్యం చేయకుండా వైద్యుణ్ని సంప్రదించాలి.
• తరచూ క్యాన్సర్‌ పరీక్షలు చేయించుకోవాలి. దానివల్ల క్యాన్సర్‌ నిర్ధారణ మొదటి స్టేజీలోనే బయటపడి, మెరుగైన చికిత్స తీసుకునే అవకాశం ఏర్పడుతుంది. అలాగే వీళ్లు కీమోథెరపీ, రేడియేషన్‌ లాంటివి తట్టుకోలేరు కాబట్టి, చికిత్స కష్టమవుతుంది.