గోదారివాళ్లే సందమామ..

యువ కథానాయకుడు శ్రీవిష్ణుని కొత్తదనానికి చిరుమానాగా చెబుతుంటారు. ప్రతి సినిమాకు వైవిధ్యమైన కథల్ని ఎంచుకుంటూ ప్రేక్షకుల్ని అలరిస్తుంటారు. ఆయన నటిస్తున్న తాజా చిత్రం ‘అర్జున ఫల్గుణ’. తేజ మార్ని దర్శకుడు. మ్యాట్నీ ఎంటర్‌టైన్‌మెంట్‌ పతాకంపై నిరంజన్‌ రెడ్డి, అన్వేష్‌రెడ్డి నిర్మిస్తున్నారు. ఈ సినిమాలోని తొలి లిరికల్‌ పాట ‘గోదారివాళ్లే సందమామ..’ను శనివారం విడుదల చేశారు. గోదావరి జిల్లాలోని ప్రజల మనస్తత్వం, వాతావరణాన్ని ఆవిష్కరిస్తూ ఈ పాట సాగుతుందని చిత్రబృందం తెలిపింది. చైతన్యప్రసాద్‌ రచించిన ఈ గీతాన్ని అమల చేబోలు, అరవింద్‌ ఆలపించారు. ప్రియదర్శన్‌ బాలసుబ్రమణ్యన్‌ స్వరాల్ని అందించారు. టీజర్‌కు మంచి స్పందన లభించిందని, త్వరలో విడుదలకు సన్నాహాలు చేస్తున్నామని నిర్మాత తెలిపారు. అమృతా అయ్యర్‌, నరేష్‌, శివాజీరాజా, సుబ్బరాజు తదితరులు నటిస్తున్న ఈ చిత్రానికి కెమెరా: జగదీష్‌ చీకటి, కథ, స్క్రీన్‌ప్లే, దర్శకత్వం: తేజ మార్ని.